Zer eta nola
1. Ikaslearen ekoizpenaren ebaluazioa
Behin baino gehiagotan adierazi dugunez, ikaslearen ekoizpenak grabatzea ezinbestekoa da ahozkoaren ebaluazioa egiteko eta ebaluazio hori formatiboa izateko. Aurretestua zein ondotestua grabatuko ditugu, bien arteko aldea eta bilakaera aztertzeko. Ahozkoa grabatzen ez badugu, erregistratzen ez bada, informazioa joan egiten da eta galdu egiten da sistematikoki ebaluatzeko aukera. Gainera, bideoei esker, ikasleek ahozkoaren kontzientzia lortzen hasi dira.
Nola ebaluatu ikaslearen ekoizpena:
Prozesuan parte hartzen duten eragile guztiek dute hitza, horregatik ebaluazio eraikitzailea deitzen zaio: norberak bere buruaren balorazioa egiten du, ikaskideena batzen zaio eta irakaslearenak beste biek adinako balioa du.
Ahozko ebaluazioa idatzizko parametroetatik urrundu eta ahozkoaren ezaugarriak kontuan hartuko ditugu. Adibidez: ahozkoan gaia errepikatzea ez galtzeko modua da eta hiztegi soila erabiltzea ahozkoaren baliabide bat da.
Sekuentzia didaktikoetan jasotako kontrol zerrenden araberako ebaluazioa eginen da, hau da, ikasleen ebaluazioa kontrol zerrenden araberakoa izanen da. Dena ebaluatu beharrean landu dena bakarrik (modulu bakoitzean bizpahiru elementu) ebaluatuko dugu. Horretarako komenigarria da sekuentzian landutako elementu guztien zerrenda eskura izatea eta horiekin kontrol zerrendak osatzea. Ikasleak egindako ekintzekin zertan gaitu den jakingo da.
Ikaslearen ebaluazioan ikuspegi ezkorra erabili beharrean, hau da, gaizki egindakoa aipatu beharrean ongi egindakoa indartzea komeni da.
Ebaluazioa ikasteko prozesua da, hau da, ikaslea ahozkoan baloratu eta motibatu egin behar da. Esate baterako, lotsatia denari hasieran gehiegi ez behartu eta konfiantza hartu ahala aurrera egin dezan animatu, ikasleak lasaitu eta abar. Erlatiboa da, hau da, zenbait ataletan gehienok ados egon gaitezke eta antzera ebaluatu, baina, kontuan hartu behar dira norberaren izaeraren ezaugarriak; ebaluazioa arrazoitu egin behar da, ez da nahikoa "oso ongi egin duzu" esatea; esan behar da "oso ongi egin duzu hau egin duzulako edo bestea egin duzulako".
2. Sekuentzia didaktikoaren ebaluazioa
SDren ebaluazioa egiteko bi atal izanen ditugu kontuan:
Sekuentzia bera ebaluatzea, hau da, SDren ebaluazioaren baitan sartuko ditugu honakoak: SDa ongi diseinatua dagoen helburu komunikatiboa lortze aldera; adibidez: aurreikusitako elementu guztiak landu diren, ea egokiak diren testu motaren arabera, ea aurreikusi diren jarduerak egokiak izan diren landu nahi ziren elementuak lantzeko, ea ikusitako ereduak eta materialak egokiak izan diren, zer den ongi egindakoa eta zer den hobetu beharrekoa...
Sekuentziaren transposizio didaktikoa, hau da, nola gelaratu dugun sekuentzia eta horrek zer eragin izan duen didaktikan eta ikaste-irakaste prozesua hobetzeko orduan.