ມີດສະນາກ
ມີດ: ແມ່ນເຄື່ອງມື ທີ່ເຮັດດ້ວຍເຫຼັກມີຄົມໃຊ້ສໍາລັບ ຟັນ, ຜ່າ, ຈັກ, ເຫຼົາ ເຫຼົ່ານີ້ເປັນຕົ້ນ.
-ສະນາກ: ຊື່ມີດຊະນິດໜຶ່ງ ມີຂາສອງຂາໃຊ້ສໍາລັບໜີບໝາກ ແລະສີສຽດ ເອີ້ນວ່າ: ມີດສະນາກ
ປະຫວັດຄວາມເປັນມາ
ການຕີເຫຼັກແມ່ນມໍລະດົກວັດທະນະທຳນາມມະທໍາ ທີ່ນອນໃນຂົງເຂດພູມປັນຍາພື້ນບ້ານ ເຊິ່ງນໍາໃຊ້ວັດຖຸດິບຈາກເຫຼັກມາຜະລິດ. ສະນັ້ນ ສາມາດພົບເຫັນເຄື່ອງມືຫຼາຍປະເພດທີ່ໃຊ້ເຂົ້າໃນການກະສິກຳ ໄດ້ຢູ່ຕາມທ້ອງຕະຫຼາດ ທ້ອງຖິ່ນໃນທົ່ວປະເທດ; ການຕີເຫຼັກ ທີ່ບ້ານຫາດຮ່ຽນ ແມ່ນກໍາເນີດມາຈາກແນວຄວາມຄິດ ແລະຫົວຄິດປະດິດສ້າງຂອງຊາວພວນ, ແຂວງຊຽງຂວາງ ທີ່ໄດ້ອົບພະຍົບມາຕັ້ງຖິ່ນຖານຢູ່ຫຼວງພະບາງໄດ້ຫຼາຍຮຸ່ນຄົນແລ້ວ. ການຕີເຫຼັກແມ່ນຈະຕີເປັນເຄື່ອງໃຊ້ທົ່ວໄປເຊັ່ນ: ມີດ, ພ້າ, ຂວານ, ສຽມ, ຊິ່ວ ແລະອື່ນໆ.
ມີດສະນາກ ແມ່ນເຄື່ອງຫັດຖະກໍາຊະນິດໜຶ່ງ ທີ່ກ່ຽວຂ້ອງກັບວິຖີຊີວິດຂອງຄົນ ຕົ້ນຕໍແມ່ນການຄ້ຽວໝາກ (ການກິນໝາກ) ທີ່ມີມາແຕ່ດົນນານໃນດິນແດນແຫ່ງນີ້ ໂດຍສະເພາະຊາວຫຼວງພະບາງທີ່ເຄີຍນິຍົມການຄ້ຽວໝາກມາແຕ່ດົນນານ ເຊິ່ງມີອຸປະກອນທີ່ສໍາຄັນໃນການນໍາໃຊ້ແມ່ນ ມີດສະນາກ.
ມີດສະນາກທີ່ນິຍົມຕີໃນສະໄໝກ່ອນແມ່ນມີລັກສະນະທີ່ແຕກຕ່າງກັນ, ຢູ່ທີ່ຫົວຂອງມີດສະນາກ ຄື: ມີດສະນາກຫົວນົກ, ມີດສະນາກຫົວໄກ່, ມີດສະນາກຫົວນາກ ເປັນຕົ້ນ.
ມີດສະນາກ ແມ່ນມີ 2 ສ່ວນຄື: ມີໂຕຜູ້ ແລະໂຕແມ່ ເພື່ອປະກອບເຂົ້າກັນໃຫ້ກາຍເປັນມີດສະນາກໜຶ່ງດວງ; ໂຕຜູ້ ແມ່ນມີດທີ່ຢູ່ດ້ານເທິງ ແລະໂຕແມ່ແມ່ນຖານຮອງ.
ໄພຂົ່ມຄູ່
ໃນເມື່ອກ່ອນຊຸມຊົນ ບ້ານຫາດຮ່ຽນ ແມ່ນປະກອບອາຊີບການຕີເຫຼັກກັນ 40 ຄອບຄົວແຕ່ໃນປັດຈຸບັນຍັງ ເຫຼືອ 6 ຄອບຄົວ, ແລະຜູ້ທີ່ຕີມີດສະນາກໄດ້ ເຫຼືອພຽງຜູ້ດຽວ.
ການໂຄສະນາເຜີຍແຜ່ຂໍ້ມູນຂ່າວສານຂອງມີດສະນາກ ຍັງບໍ່ທັນກ້ວາງຂວາງສູ່ສັງຄົມເທົ່າທີ່ຄວນ.
ບັນດາຜູ້ຊົງຄຸນນະວຸດທີ່ມີຄວາມຮູ້ໃນດ້ານການຕີມີດສະນາກນັບມື້ນັບຫຼຸດໜ້ອຍລົງ.
ຂາດງົບປະມານໃນການຈັດກິດຈະກໍາການອະນຸລັກ ແລະຟື້ນຟູ,
ໃນປັດຈຸບັນຄ່ານິຍົມຂອງການຄ້ຽວໝາກມີໜ້ອຍ ເຮັດໃຫ້ຄວາມຕ້ອງການ, ການນໍາໃຊ້ມີດສະນາກຫຼຸດລົງຫຼາຍ.
ມີດສະນາກມີລາຄາສູງ ຖ້າທຽບໃສ່ອຸປະກອນອື່ນທີ່ມີລັກສະນະການນໍາໃຊ້ຄ້າຍຄືກັນ ແມ່ນມີລາຄາຕໍ່າກ່ວາ ແລະຄຸນນະພາບກໍບໍ່ສູງ.
ການຜະລິດມີດສະນາກ ມີຫຼາຍຂັ້ນຕອນຫຍຸ້ງຍາກ ແລະໃຊ້ເວລາດົນ ເພາະມື້ໜຶ່ງຜະລິດໄດ້ພຽງແຕ່ໜຶ່ງດວງເທົ່ານັ້ນ. ຖ້າທຽບໃສ່ການຜະລິດພ້າ, ມີດທົ່ວໄປໄດ້ຫຼາຍກ່ວາ.
ຂາດຜູ້ທີ່ມີຄວາມສົນໃຈໃນການສືບທອດ ເພາະປັດຈຸບັນຊາວໜຸ່ມແມ່ນຫັນໄປສົນໃຈເຮັດອາຊີບອື່ນ ທີ່ມີລາຍຮັບທີ່ດີກ່ວາ.
ການຕີມີດສະນາກມີຄວາມຫຍຸ້ງຍາກ, ຫຼາຍຂັ້ນຕອນຊໍ້າໄປ ຊໍ້າມາ ແລະໃຊ້ເວລາດົນນານຫຼາຍ,
ຜູ້ທີ່ປະກອບອາຊີບຕີເຫຼັກຕ້ອງເປັນຄົນດຸໝັ່ນ, ມີຄວາມອົດທົນສູງ ຈຶ່ງຈະປະກອບອາຊີບນີ້ໄດ້ ເພາະວ່າການຕີເຫຼັກ (ມີດສະນາກ) ແມ່ນຕ້ອງໃຊ້ກໍາລັງຫຼາຍ.
ໃນປັດຈຸບັນມີແມ່ນຜະລິດຕະພັນອື່ນໆ ທີ່ມີລັກສະນະຄ້າຍຄືກັນມາທົດແທນການນໍາໃຊ້ມີດສະນາກ ເຊັ່ນ: ພ້າ, ມີດ.
ແຜນປົກປ້ອງ
ຊຸກຍູ້ ແລະສົ່ງເສີມ ຈັດຕັ້ງກຸ່ມຜະລິດໃນຊຸມຊົນຂຶ້ນ ເພື່ອໃຫ້ກາຍເປັນສູນການຮຽນຮູ້,ຖ່າຍທອດ ແລະການຈັດວາງສະແດງຜະລິດຕະພັນປະຈຳຊຸມຊົນ.
ສົ່ງເສີມການໂຄສະນາເຜີຍແຜ່ ຂໍ້ມູນຂ່າວສານກ່ຽວກັບມີດສະນາກສູ່ສັງຄົມໃຫ້ກ້ວາງຂວາງ ແລະເລິກເຊິ່ງ ເຊັ່ນ: ສ້າງວີດີໂອ, ສາລະຄະດີ, ແຜ່ນພັບຜ່ານທາງສື່ ໂທລະພາບ, ວິທະຍຸ, ໜັງສືພິມ, ສື່ສັງຄົມອອນລາຍ ທັງພາຍໃນ ແລະຕ່າງປະເທດ.
ສົມທົບກັບພາກສ່ວນທີ່ກ່ຽວຂ້ອງ ເພື່ອສ້າງເປັນຫຼັກສູດການຮຽນ - ການສອນ ການຕີເຫຼັກ (ມີດສະນາກ ພື້ນເມືອງ).
ສະເໜີໃຫ້ທາງພາກວິຊາການທີກ່ຽວຂ້ອງ ທາງດ້ານມໍລະດົກວັດທະນະທຳນາມມະທໍາ ຕ້ອງນຳສະເໜີໃຫ້ຈົດທະບຽນບັນຊີເຂົ້າເປັນມໍລະດົກວັດທະນະທໍາໃນລະດັບທ້ອງຖິ່ນເພື່ອເປັນສິນຄ້າ 1 ເມືອງ 1 ຜະລິດຕະພັນ ຫຼື ODOP ແລ້ວນຳສະເໜີລັດຖະບານ ແລະອົງການຈັດຕັ້ງສາກົນ ເພື່ອຂຶ້ນບັນຊີລະດັບຊາດ ແລະລະດັບໂລກ.