ຟ້ອນນາງແກ້ວ
ຟ້ອນນາງແກ້ວ ມີ 17 ທ່າຟ້ອນ ເປັນບົດຟ້ອນ ທີ່ມີຄວາມອ່ອນຊ້ອຍງົດງາມ, ມີເຄື່ອງແຕ່ງກາຍທີ່ເປັນເອກະລັກ, ມີປະຫວັດຍາວນານ ເຊິ່ງນຳມາຈາກ ປະເທດ ກຳປູເຈຍ ໂດຍເຈົ້າຟ້າງຸ່ມ. ເປັນສິລະປະ ທີ່ຕິດພັນກັບວິຖີຊີວິດ ຂອງຊາວຫຼວງພະບາງ ທັງຍັງເປັນ ມໍຣະດົກ ຂອງຊາວຫຼວງພະບາງ.
Embedded Files
ປະຫວັດຄວາມເປັນມາ
ປະຫວັດຄວາມເປັນມາ
ຟ້ອນນາງແກ້ວ ໄດ້ກໍາເນີດເກີດຂຶ້ນມາໃນສະໄໝເຈົ້າຟ້າງຸ່ມ. ພະອົງໄດ້ນຳເອົາສາສະໜາພຸດ ແລະ ສິລະປະການຟ້ອນລຳຈາກຂະເໝນ ເຂົ້າມາເຜີຍແຜ່ ໃນເມືອງຊຽງດົງ-ຊຽງທອງ. ຟ້ອນນາງແກ້ວ ເປັນການຟ້ອນປະຈໍາພະລາຊະວັງ ເພື່ອຖວາຍເຈົ້າຟ້າງຸ່ມມະຫາຣາຊ ແຫຼ່ງຫຼ້າທໍຣະນີ ແລະ ມະເຫສີແກ້ວເກັງຍາ ເນື່ອງໃນໂອກາດຕ່າງໆ ເຊັ່ນ: ສະຫຼອງງານບຸນສໍາຄັນ, ແຂກຕ່າງປະເທດມາເຂົ້າເຝົ້າ, ເວລາສ້າງວັດວາອາຮາມ ສຳເລັດ. ເມື່ອກ່ອນ ເພີ່ນເອີ້ນການຟ້ອນນີ້ວ່າ “ນາງແກ້ວພົມມະຈາລີ” ຕໍ່ມາ ເຈົ້າຟ້າງຸ່ມ ຈຶ່ງປ່ຽນຊື່ ຂອງການຟ້ອນ ຕາມພຣະນາມ ຂອງມະເຫສີນາງແກ້ວເກັງຍາ ເປັນ “ຟ້ອນນາງແກ້ວ” (ໝາຍເຖິງ ແກ້ວບໍລິສຸດ). ນັບແຕ່ນັ້ນມາ, ການຟ້ອນນາງແກ້ວ ເປັນສິລະປະ ຮີດຄອງປະເພນີ ທີ່ສວຍງາມ ເຊິ່ງຊາວຫຼວງພະບາງ ໄດ້ປົກປັກຮັກສາ ແລະ ສືບທອດຕໍ່ກັນມາ ຮອດປະຈຸບັນ.
ໄພຂົ່ມຂູ່
ໄພຂົ່ມຂູ່
ຄົນຮຸ່ນໜຸ່ມຈໍານວນໜຶ່ງ ບໍ່ມີຈິດໃຈມັກຮັກ ແລະ ບໍ່ມີຄວາມສົນໃຈ ແລະ ຫັນໄປນິຍົມດົນຕີສະໄໝໃໝ່.
ການຟ້ອນນາງແກ້ວ ຈະບໍ່ນັບວ່າເປັນອາຊີບຫຼັກ ພຽງແຕ່ໃຊ້ເວລາຫວ່າງມາສະແດງ.
ນັກສະແດງສ່ວນຫຼາຍ ແມ່ນນັກຮຽນ ເມື່ອຮຽນຈົບແລ້ວ ກໍ່ໄປປະກອບອາຊີບອື່ນຂອງໃຜລາວ.
ທຸກໆປີ ຕ້ອງໄດ້ມີການປະກາດຫາຜູ້ມາຮໍ່າຮຽນ ເພື່ອທົດແທນນັກສະແດງທີ່ແຕ່ງງານແລ້ວ.
ນັກສະແດງ ຕ້ອງມີເງື່ອນໄຂຄົບຖ້ວນ ແລະ ມີພອນສະຫວັນດ້ານການສະແດງຈຶ່ງສາມາດຮັບມາເປັນທີມງານໄດ້.
ການຖ່າຍທອດ ແມ່ນຜ່ານການສິດສອນຝຶກຊ້ອມ ໃນຊ່ວງເວລາພັກແລ້ງ.
ມີຜູ້ອາວຸໂສບໍານານພຽງຄົນດຽວ ເປັນຄູຝຶກທີ່ມີຄຸນສົມບັດຄົບຖ້ວນ, ມີຜົນງານເດັ່ນ ແລະ ປະສົບການຫຼາຍປີ.
ອຸປະກອນ ແລະ ວັດຖຸດິບ ສຳລັບມາຕົບແຕ່ງ ເຄື່ອງແຕ່ງກາຍ ແລະ ຜະລິດເຄື່ອງດົນຕີ ແມ່ນຫາຍາກ.
ແຜນປົກປ້ອງ
ແຜນປົກປ້ອງ
ຄວນປູກຈິດສໍານຶກ ໃຫ້ຊາວໜຸ່ມລາວ ທີ່ເປັນຮຸ່ນສືບທອດ ມີສ່ວນຮ່ວມປົກປັກຮັກສາ ຟ້ອນນາງແກ້ວ.
ຄວນສົ່ງເສີມ ໃຫ້ມີກິດຈະກໍາສະແດງຫຼາຍໆຂຶ້ນ.
ເພີ່ມຫຼັກສູດການຮຽນ-ການສອນ ໃຫ້ສະຖາບັນການສຶກສາ ຕ່າງໆ ເພື່ອມີສ່ວນຮ່ວມ ແລະ ສຶກສາຮຽນຮູ້.
ຄວນຮັກສາແຫຼ່ງຊັບພະຍາກອນ ທີ່ເປັນວັດຖຸດິບ ໃນການເຮັດເຄື່ອງດົນຕີ ຢູ່ໃນທໍາມະຊາດໃຫ້ມີຄວາມຍືນຍົງ.
ອຳນາດການປົກຄອງທີ່ກ່ຽວຂ້ອງ ຂອງບ້ານ, ເມືອງ ແລະ ແຂວງ ຄວນລົງໂຄສະນາເຜີຍແຜ່ ຜ່ານທາງສື່ຕ່າງໆທີ່ມີ ກ່ຽວກັບຟ້ອນນາງແກ້ວ ໃຫ້ນັບມື້ນັບຫຼາຍຂຶ້ນ.
ສ້າງກົດລະບຽບ, ນິຕິກໍາ ເພື່ອຄຸ້ມຄອງ.
ນໍາສະເໜີ ໃຫ້ພາກສ່ວນທີ່ກ່ຽວຂ້ອງ ຈົດທະບຽນເຂົ້າເປັນມໍລະດົກທາງດ້ານວັດທະນະທໍາທີ່ບໍ່ເປັນວັດຖຸ ຂັ້ນຕ່າງໆ.
Google Sites
Report abuse