ຊ້ານໍ້າກ້ຽງ
ຊ້ານ້ຳກ້ຽງ ໝາຍເຖິງຜະລິດຕະພັນທີ່ເຮັດດ້ວຍມື ສານດ້ວຍໄມ້ຕອກແລບ, ໂອບດ້ວຍມູນສັດ ແລ້ວທາດ້ວຍສີນ້ຳກ້ຽງ ໃຊ້ສຳລັບໃສ່ໝາກ, ໃບພູ, ໃສ່ຢາສູບ, ພາຊະນະບັນຈຸສິ່ງຂອງ ໃນພິທີທາງສາສະໜາ ແລະ ອື່ນໆ.
ປະຫວັດຄວາມເປັນມາ
ສີນໍ້າກ້ຽງ ແມ່ນມີບົດບາດສູງ ໃນສັງຄົມສະໄໝລາວລ້ານຊ້າງ ໂດຍສະເພາະ ສະໄໝເຈົ້າສັກກະລິນ (ລະຫວ່າງປີ ຄ.ສ 1890-1904), ເຈົ້າສີສະຫວ່າງວົງ ແລະ ເຈົ້າສີສະຫວ່າງວັດທະນາ. ເປັນວຽກງານທາງດ້ານສີລະປະ ທີ່ຕ້ອງໃຊ້ຄວາມລະອຽດອ່ອນ ເຊັ່ນ: ໃສ່ຮອງພື້ນ ເພື່ອພອກຕິດຄໍາປິວ, ເຮັດດອກດວງປະດັບປະດາ (ເສົາ, ບັນລັງ, ມົງກຸດ, ໂກດ ແລະ ລາຊະລົດ), ຊ້ານໍ້າກ້ຽງ, ເຮັດຫົວນາງແກ້ວ, ຫົວໂຂນ, ຕູ້, ຈອກ ແລະ ອື່ນໆ.
ຕົ້ນກໍາເນີດ ການນໍາໃຊ້ສີນໍ້າກ້ຽງ ໃນຫລວງພະບາງ ມີຄວາມເປັນໄປໄດ້ 03 ກໍລະນີ ດັ່ງນີ້:
ກໍລະນີ ທີ 01: ອາດມາຈາກອານາຈັກລາວລ້ານຊ້າງໂດຍກົງ, ສັນນິຖານວ່າ ແມ່ນມາຈາກຫຼວງພະບາງ ເພາະວ່າໃນອະດີດຫຼວງພະບາງ ເຄີຍມີຕົ້ນນໍ້າກ້ຽງ ມາກ່ອນ.
ກໍລະນີ ທີ 02: ອາດມີຕົ້ນກໍາເນີດມາຈາກຊາຍແດນສາມຫຼ່ຽມທອງຄໍາ (ລາວ, ໄທ ແລະ ພະມ້າ) ຂອງເມືອງຕົ້ນເຜິ້ງແຂວງບໍ່ແກ້ວ ເນື່ອງຈາກວ່າ ເປັນເມືອງດຽວທີ່ຍັງຫຼົງເຫຼືອຕົ້ນນໍ້າກ້ຽງຫຼາຍທີ່ສຸດໃນລາວ.
ກໍລະນີ ທີ 03: ອາດໄດ້ຮັບອິດທິພົນມາຈາກປະເທດພະມ້າ ໃນສະໄໝການປົກຄອງຂອງບູເລັງນອງ (ຄ.ສ 1561-1581) ທີ່ມີອໍານາດ ແລະ ເຂັ້ມແຂງທີ່ສຸດ ໃນພູມີພາກ ທີ່ໄດ້ເຂົ້າມາຮຸກຮານອານາຈັກ ລ້ານຊ້າງເຖິງສາມຄັ້ງ.
ໄພຂົ່ມຂູ່
ໄມ້ປ່ອງ ທີ່ເອົາມາຈັກສານ ຫາຍາກ ແລະ ສີນໍ້າກ້ຽງ ກໍ່ຂາດແຄນເຊັ່ນດຽວກັນ ຈໍາເປັນຕ້ອງໄດ້ນໍາເຂົ້າຈາກປະເທດ ໄທ, ຫວຽດນາມ, ພະມ້າ.
ຊາວໜຸ່ມມີໜ້ອຍຄົນທີ່ສົນໃຈວຽກງານດ້ານນີ້ ຈຶ່ງໄປຊອກຫາເຮັດ ຫຼື ປະກອບອາຊີບ ອື່ນແທນ.
ຜູ້ສືບທອດ ຫຼື ນັກສິລະປະສະກຸນຊ່າງ ມີທ່າອ່ຽງຫຼຸດລົງ.
ຜູ້ເຖົ້າ-ຜູ້ແກ່ ທີ່ມີບົດຮຽນດ້ານການເຮັດສີນໍ້າກ້ຽງ ກໍ່ເຖົ້າແກ່ ຫຼື ເສຍຊີວິດໄປ ເຮັດໃຫ້ຜູ້ສືບທອດຍິ່ງຫຼຸດລົງ.
ຕົ້ນນໍາກ້ຽງ ແມ່ນຕົ້ນໄມ້ທີ່ລະອອງເກສອນມີພິດ ຄົນທີ່ບໍ່ມີພູມຕ້ານທານພຽງພໍ ອາດເຮັດໃຫ້ເກີດຄັນຄາຍຕາມຜິວໜັງ, ເກີດອາການແພ້ ຕ່າງໆ.
ການລອກຮຽນແບບ ໂດຍນໍາໃຊ້ວັດຖຸດິບອື່ນມາທົດແທນສີນໍ້າກ້ຽງ ແຕ່ວ່າມີລາຄາຖືກກ່ວາ.
ແຜນປົກປ້ອງ
ສະໜັບສະໜູນ ທາງດ້ານນັກວິຊາການ ລົງໄປຝຶກອົບຮົມເພີ່ມຄວາມຮູ້ໃຫມ່.
ຊອກຫາແຫຼ່ງທຶນ ເພື່ອມາສະຫນັບສະຫນູນໃນການຜະລິດ ແລະ ຈັດຫາຕະຫຼາດຈໍາໜ່າຍສິນຄ້າ ໃຫ້ທົ່ວເຖິງ.
ຄວນສົ່ງເສີມການປູກ ເພື່ອສະໜອງວັດຖຸດິບ ໃຫ້ແກ່ການຜະລິດຊ້ານໍ້າກ້ຽງ ແລະ ເພຶ່ອເປັນສິນຄ້າ ສົ່ງອອກ.
ໂຄສະນາ, ເຜີຍແຜ່ ຜະລິດຕະພັນທີ່ເຮັດຈາກສີນໍ້າກ້ຽງ ໃຫ້ເປັນທີ່ຮູ້ຈັກ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ.
ນໍາເອົາຄວາມຮູ້ກ່ຽວກັບການຜະລິດ ບັນຈຸເຂົ້າໃນຫຼັກສູດການຮຽນ-ການສອນ ຂອງໂຮງຮຽນວິຈິດສິນພື້ນເມືອງຫຼວງພະບາງ.
ຖ່າຍທອດ ໃຫ້ຜູ້ທີ່ມີຄວາມຮັກມັກ ແລະ ຜູ້ທີ່ມີຄວາມສົນໃຈ.
ຈົດລິຂະສິດ ເພື່ອປ້ອງກັນການຮຽນແບບ.
ນໍາສະເໜີຊ້ານໍ້າກ້ຽງ ຈົດທະບຽນຂຶ້ນບັນຊີເປັນມໍລະດົກທາງດ້ານວັດທະນະທຳທີ່ບໍ່ເປັນວັດຖຸໃນລະດັບທ້ອງຖິ່ນ.