Irratiko lana
Irratsaio "solteak"
Irratsaio bat edo batzuk ekoiztea izan daiteke eskolako irratiaren xedea. Zenbat saio egingo ditugun eta prestaketaren arduraduna nor izango den erabaki beharko dugu.
Gelako taldean egindako irratsaioa
Ikasturte hasieran, irratsaioak zenbatero egin, zein maila edota zein gelak hartuko duten parte eta talde bakoitzaren irratsaio egunak zeintzuk izango diren zehazten da. Gela bakoitzak badaki bere irratsaio egunak zeintzuk diren, eta gai nagusia zein izango den erabaki dezake. Horrela aste batzuk lehenago irratsaioaren prestaketa hasiko du, eta prestaketa horretan hainbat eduki, helburu eta gaitasun landuko ditu, talde lanean arituta. Taldeari egokitzen zaion egunean irratsaioa emititu edo grabatzen dute.
Adierazpen tailer baten produkzioa
Zenbait eskoletan adierazpen tailerrak antolatzen dira gai ezberdinen inguruan. Ohiko gela-taldeak apurtu eta adin ezberdinetako ikaslez osaturiko talde txikiagoak antolatzen dira. Tailer hauek zenbait asteko iraupena dute eta tarte horretan egindako lanaren emaitza besteei erakusteko aukera izaten dute partaideek. Adierazpen modu ezberdinak lantzen dira tailerretan: dantza, antzerkia, prentsa edo IRRATIA.
Eskolako egituran txertatua
Irratia eskolako egitura didaktikoan txertatu nahi badugu, bertan egiten den lana beste arlo edo txoko guztiak bezala programatu behar dugu, asteko ordutegian eta ikasturteko egutegian lekua emanez. Hori modu ezberdinetan egin daiteke:
Irratsaioa proiektu baten amaierako lana
Metodologia horrekin lan egiten den eskoletan ondo dakiten bezala, proiektu bakoitza ikasleek planteatutako galderak erantzuteko asmoz abiatzen da. Erantzuna bilatzeko informazioa bildu eta aztertzen dute bere ondorioak ateratzeko. Azkenean, ikasitakoaren berri ematen dute ikaskideei egindako lana aurkeztuz. Lan ezberdinak egin daitezke: maketak, mapak, antzerkiak, hormirudiak edo... IRRATSAIOA.
Irratia gelako txoko edo tailer finkoa
Irratia hizkuntza lantzeko funtsezko elementua da eskola batzuetan, Amara Berri eskola sarean lan egiten dutenak esaterako. Erabiltzen duten metodologian jarduera guztiek dute "zertarako" bat. Amara Berri sistemaren aurkezpena egiten duten gune honetan aurkituko duzue eskolako lana antolatzeko moduaren deskribapen zehatza, baita komunikabideek eta, batez ere, irratiak zeregin garrantzitsua dute eguneroko lanean. Irratia eskola zabalik dagoen bitartean dabil, eta Lehen Hezkuntzako hirugarren eta laugarren mailetako ikasleek kudeatzen dute.
Irratsaioa Sekuentzia Didaktiko baten xede
Dolz eta Schneuwly ikerlarien arabera, sekuentzia didaktiko baten eskema orokorrak egitura finko bati jarraitzen dio, ikasleen hasierako gaitasunak ebaluatu ondoren zailtasun berezia duten testu dimentsioak urratsez urrats landuz. Jarduera multzo honen xedea da testu ekoizpen berri bat prestatzea, ikaskuntzan egindako aurrerapenak neurtzeko.
Dolz, J eta Schneuwly, B. (2006) Per a un ensenyament de l'oral. Iniciació als gèneres formals a l'escola.Mintzamena lantzeko Sekuentzia Didaktikoak honako egitura du:
Egoeraren aurkezpena: Ikasleei azken helburu komunikatiboaren berri ematen zaie. Datozen egunetan zer ikasiko duten, nola bideratuko diren lanketak, nola taldekatuko diren, zein gai landuko diren… gisa honetako edukiak jartzen zaizkie mahai-gainean. Azken helburu komunikatiboa konpartitu eta adosten da taldean.
Aurretestua: Inolako lanketarik egin gabe ikasleek azken helburu komunikatiboa izango den testua eraikitzen dute. Eraikitako testua erregistratu egiten du irakasleak (bideo kameraren bitartez, eskuzko apunteak hartuz, transkribapena eginez…).
Moduluak:: Bakoitzean ekoiztuko den diskurtsoari dagokion azalera bat lantzen da. Hainbat jarduera edo ariketa proposatu eta egiten dira, guztiak azken helburu komunikatiboa helburu dutela. Besteak beste honakoak landu daitezke:
a) Testuingurua azken helburu komunikatiboari begira.
b) Testuratze mekanismoak: edukien antolaketa, koherentzia, kohesioa,...
c) Hizkuntza estrategiak: hizkuntzaz kanpoko baliabideak, gramatika, hiztegia, …
Ondotestua: Modulu guztietako jarduerak bideratu ostean, ikasleak ondotestua eraikitzeko prestatzen dira. Azken ekoizpenaren aurretik ikasgelan ikasleekin batera gogoratzen da gure ikaskuntza prozesuan ikasi berri duguna, eta ondotestua ekoizteko garaian aintzat hartu beharreko edukiak zein diren jasotzen da. Kontrol Zerrenda eraikitzen da taldean, ikasleentzat ondotestua eraikitzeko eta ondorengo ebaluazioa bideratzeko tresna izango dena.
Erregulazioa: Ikasleek iraganean eraiki zuten aurretestu hartatik azken ondotestura artean egindako aurrerapausoak zein diren jasotzen da erregulazioaren bitartez. Kontrol Zerrendako edukiak behatuz egiten da ebaluazio eraikitzailea.
Irratsaioa izan daiteke Sekuentzia Didaktiko baten xedea
EIBZk osatu duen "Ahozko hizkuntza irakastea" gunean Sekuentzia Didaktikoaren egitura atalean, Josune Zabala irakasleak hau guztia azaltzen duen bideoak aurkituko dituzu
Esan gabe doa irratia antolatzeko beste hainbat aukera daudela eta behar bada zuen eskolan beste modu batean egiten duzue, hartu tarte bat eta kontaiguzue. Besteek irratia eskolan nola antolatzen duten ikustea interesgarria izan daiteke, baina besteei ere interesatzen zaie zuek zer egiten duzuen. Zuen egiteko modua partekatu nahi baduzue ondorengo inkesta betez egin dezakezue: