Adibide errealak

Irratiko teknikariak 3. zikloko lau geletako ikasle bana izaten dira. Hala, egun batean egon den ikasleak berria iristen den ikasleari irakasten dio. Ikasleak txandaka eta bikoteka aritzen dira teknikari lanetan. Denek, gutxienez egun bat, albistegian eta irratsaioan ere parte hartuko dutela ziurtatzen da.

Bi emanaldi mota egiten dituzte:

ALBISTEGIA: Astean bitan (astearte eta ostiraletan) emititzen da, goizeko 9:00tatik 9:30tara.

Saio honetarako aldez aurretik, LMH5 eta LMH6 mailetako ikasleek, txanda begiratuz,  tokatzen zaien albistea prestatzen dute eta emisioa baino lehen irratiko irakasle arduradunarekin errepasatzen dute. LMH3 eta LMH4 mailetako ikasleak ere, launaka, parte hartzen dute. Menua, Zenbaki sarituak eta Eguraldia saioekin. Berri hauek eredua duen koaderno batetan LMH5 eta LMH6 mailetako ikasleek albisteak ematen duten bitartean prestatzen dituzte.

IRRATSAIOA: Ostiraletan emititzen da 9:30tatik 10:30tara.

LMH5 eta LMH6 mailetako ikasleak bakarrik aritzen dira teknikari, kontrolatzaile eta esatari moduan. Irakasle bat izaten da gelatik kanpo entzuten, emisioa egokia den ziurtatzeko. Irratsaioan geletan egindako lanak aurkeztuko dituzte.

Irratsaioan dauden ikasleen artean, ardurak banatuko dituzte: Teknikaria alde teknikoaz arduratzen da, kontrolatzailea irratiko funtzionamendu orokorraz arduratzen da eta esataria airean irtengo denaz arduratuko da.

2018ko Urola Kostako Jardunaldi Pedagogikoetan Zestoako eskolak irratian egiten duten lana azaltzeko bideo hau erabili zuten.

Irratiko teknikariak 2. zikloko bi geletako bi ikasle izaten dira. Bat, 3. mailakoa, eta bestea, 4. mailakoa. Egun osoz aritzen dira txandak katean eginez, horrela goizean aritu den ikasleak arratsaldekoari irakasten dio. Irratian hasten denak teknikari lana egiten du, eta besteak –irakasle lana egiten duenak– kontrolatzaile-lana. 

Teknikaria alde teknikoaz arduratzen da. Soinu-mahaian egiten du lana: bolumena doitzen eta musika egokia jartzen (programa tartean edo isiluneetan)

Kontrolatzailea irratiko funtzionamendu orokorraz arduratzen da. Egunean zehar egiten diren programen izenak eta egileak apuntatzen ditu kontrol-fitxan. Ordu berean programa bat baino gehiago iristen bada, txanda ere ematen du. Aurreko arratsaldean edo goizean lanean aritu denez, teknikariari lagunduko dio bere lana betetzen. Egunaren bukaerean balorazioa egiten dute horretarako duten fitxa betez.

Irratira inor ez badator, prentsan argitaratutako idazlan batzuk irakurriko dituzte. Orokorrean ziurtatu behar dute hamabost minutuz behin programa bat emititzen dela.

HELBURUAK:

• Planifikatzeko gaitasuna garatzea. 

• Kritika garatzea. 

• Informatikaren balioa aurkitzea eta bere aukeretara irekitzea.

• "Hemen eta orain"-arekin konektatzea 

• Eskola-komunitatea gizarte antolatutzat hartu eta haren egiturak eskola-kolektibitatearen zerbitzura jartzea.

• Mundu hurbileko gertaerak albiste bihurtzea. 

• Ikaslea gizarte ireki eta anitzari begira jartzea ikuspegi zabaleko gizarterantz apurka gerturatzeko.

2015-16 ikasturtetik aurrera Frantzisko Deuna Ikastetxe Publikoan aurrera eramaten den proiektu honen bidez, eskolako haurrek irratsaioak egiteko eta antenan jartzeko aukera dute.

Hasiera batean, Iruñeko Eguzki Irratiak luzatutako gonbidapenari esker irratiaren funtzionamendua nolakoa den ezagutu dute: gidoia, irratsaioaren atalak, doinua, entonazioa... eta, zailena, ikusten ez den entzulea kontuan hartzea.

2016-17 ikasturtetik aurrera, hartutako esperientziarekin, ikasle eta irakasleen ilusioa eta helburua eskolako irratia martxan jartzea da. Seguraski, ikasi dutenak lagunduko die beren nahia lortzen.

Eskolak irratiaren inguruan duen proposamen didaktikoa edozeinentzat eskuragarri dago baita irakasle zein ikasleentzat proposatzen diren jarduerak. Horren ondorioz sortutako irratsaioak ere entzungai ditugu sarean. 

KOXKOX irratia 1999-2000 ikasturtean prestatzen hasi ziren: Gela bat antolatu, behar ziren aparatuak jarri, zerbitzu teknikoen arduraduna izendatu eta irratiaren izena aukeratu ondoren, 2000-2001 ikasturtean emititzen hasi ziren 107,5 FM sintonian. Lehen Hezkuntzako 3., 4., 5. eta 6. mailako ikasleek hartzen dute parte. Azken xedea irrati saio bat emititzea da.

HELBURUAK

• Irakur eta idatz adierazpena garatu.

• Ahozko adierazpena eta euskara garatu.

• Ahozko erregistroa indartu.

• Irratia komunikabide bezala ezagutu.

• Irratian dauden baliabideak era arduratsuan erabiltzen ikasi.

• Entzuleari interesko informazio helaraztea

• Entzulearekin interakzioa galdera erantzunen bidez

METODOLOGIA

Irrati saikoarako edukia, idatziz, Ekipo jardueren tartean prestatzen dute. Talde txikietan antolatzen dira. Hizkuntza arloak dituen atal ezberdinak kontuan hartuta, taldeko kide bakoitzak bere zatia prestatzen du. Eta eduki hori izango da irratsaioan irakurriko duena. 

Irrati saioak egitura zehatz bat du eta atalka prestatzen da. Horretarako eta emanaldia prestatzeko irakasle arduradunarekin koordinatzen dira.

5. eta 6. Mailako ikasleen kasuan, idatziz Langile Ikastolako Aldizkarian (LIA) argitaratzen da irratsaiorako prestatutakoa. Ikasleek egiten dute maketazioa eta egin beharreko guztia.

Irrati saiorako heldu batek teknikari lana egiten du.