HELBURU OROKORRAK
Irratia tresna pedagogiko bezala erabili
Ikasleen ardura, autonomia eta berekiko konfidantza lortu
Euskal kultura ezagutu eta baloratu
Ikasleen kultura orokorra zabaldu
Ikasleen euskaraz duten komunikatzeko gaitasuna garatu: Iritzi, sentimendu, nahiak, ideiak, edukiak …. euskaraz komunikatzeko adierazpen-bide desberdinak erabiltzen ikasi
Nahiz ahoz, nahiz idatziz mezuak euskaraz ulertzeko eta sortzeko gaitasuna garatu, kontestuan eman ohi diren aldagaiak kontutan hartuz
Ikasleen euskararen ahozko adierazpena hobetu
Euskara erabiltzeko motibazioa sustatu, hizkuntza hau edozein egoeratan komunikazio tresna bihur dadin
Elkarlana taldean egin, partaidetza, kooperazioa, integrazioa eta errespetua bultzatuz
Eskola eta Alde Zaharreko eragile eta pertsonen artean dauden hartu-emanak sendotu eta bultzatu
Familiek eskolan duten partaidetza bultzatu eta handitu
Irrati saio bat astero burutu
OINARRIZKO KONPETENTZIAK
Pentsatzen eta ikasten ikasi:
Informazioaren interpretazioa: ulermenean oinarrituta
Informazioa sortzea: pentsamendu sortzailearen garapena
Informazioaren ebaluazioa: pentsamendu kritikoa. Egindako lana baloratzea. Arazoak konpontzea eta horren arabera, erabakiak hartzea hobetu ahal izateko.
Komunikatzen ikasi
Ahozko hizkuntza, idatzizko hizkuntza, beste hizkuntza batzuk.
Gizarte komunikabideen baliabideak
Kontzientzia sozio-komunikatiboa
Informazio eta Komunikazio Teknologiak
Elkarrekin bizitzen ikasi
Pertsonen arteko harremana
Parte hartze demokratikoa eta errespetuan oinarrituta
Elkarlana eta talde lanaren oinarrituta
Gizarte bizikidetzarako arauak
Genero eta kultur aniztasuna
Arazoak konpontzeko jarrera positiboa
Norbera izaten ikasi
Kontrola eta oreka emozionala
Autonomia
Norberaren estimua
Integrazio pertsonala
Sensibilitate estetikoa
Egiten eta ekiten ikasi
Fase analitikoa: informazioa lortzea, aztertzea eta gordetzea
Sortze fasea: informazio edo ideia berriak lantzea.
Berritzea fasea: izandakoa gauzatzea
Ebaluazio fasea: egindakoa baloratzea eta hobetzeko bideak bilatzea
Azken fasea: aplikazioa. Sortutako edo antolatutako lana aurrera eramatea.
HELBURU ESPEZIFIKOAK
Irrati emisoraren tresnak ezagutu eta erabiltzen ikasi
Informazioa jasotzeko estrategia eta teknika desberdinak landu
Jasotako informazioa antolatu, ordenatu, laburtu… zentzu kritikoa erabiliz, mezuak zuzendutako entzulegoaren arabera modu egokiz aurkezteko
Ahozkotasuna garatu irratian lan daitezkeen genero ezberdinen bidez: elkarrizketa, narrazioa, deskribapena, irakurketa dramatizatuak, albisteak, bertsoak, txisteak, gai monografikoak, iragarkiak, lehiaketak…
Aho espresioa landu eta euskara hizkuntzaren kalitatea hobetu, aho erregistroa indartuz.
Tonuera egokia landu
Komunikazio kolokialaren ahozko hizkeraren esamoldeak ezagutu eta erabili
Komunikabideek bidaltzen dituzten mezuen bidez pertsonengan izan dezaketen eraginaren kontzientzia hartu, jasotzen den informazioaren aurrean kritikoa izaten
Entzuleekin komunikazio hobea lortzeko hizkuntz baliabideez kontzientzia hartu
Esatari lanetan dagoenean hiztun trebeziak egoera ezberdinetara egokitzen ikasi, jendaurrean hitz egiten ikasiz
Idatzizko ekoizpena garatu landuko diren genero ezberdinen bidez: elkarrizketa, ipuinak, bertsoak, komikiak, denbora-pasak, albisteak, laburpenak, iragarkiak…
Irakurketaren ulermena eta irakurketa espresiboa landu
EBALUAZIO ADIERAZLEAK
Behar duen gaia/atalari buruzko informazioa, formato desberdinak erabiliz, biltzen du eta baliogarria dena bereizten daki.
Informazio nagusia eta bigarren mailakoa bereizten ditu
Lortutako informazioarekin gidoia idazten du, beharrezkoak diren hizkuntz baliabideak erabiliz
Informazioa nola eman erabakitzen du betiere nori zuzenduko dion (entzuleria) kontuan hartuta. Esaterako, ikasleei zuzendutako informazioak modu erakargarrian aurkezten ditu, irakasleek eskolan egiten dutenaren itxuratik ihesiz. Gurasoei zuzendutako irratsaioek, berriz, haien arreta bereganatu beharko dute, eta, beraz, eskola informaziotik harago joan.
Esan nahi duena besteek ondo uler dezaten, esaldi bakoitzari dagokion intonazioa, abiadura eta ahoskera ematen dizkio: hitz batzuk azpimarratzen ditu, ideia batzuk nabarmentzen ditu, sentimenduak adierazteko intonazioa erabiltzen du...
Baliabide ez linguistikoak erabiltzen ditu azaltzerakoan, hala nola: musika, hotsak…
Ahoz euskara zuzen erabiltzen du
Sortzen diren bat-bateko egoeren aurrean egokitzen da.
Beharrezkoak diren erabakiak hartzen ditu
Bere ikaskideen txanda, erritmoa eta irizpideak errespetatzen ditu eta lasaitasunez onartzen ditu.
Berari dagokion lana aurrera eramaten du eta bere ardura hartzen du talde lana erraztuz
Jarrera baikorra adierazten du prozesuan
Talde lan egokia egiten du dagokion atala ongi garatuz
Aurkezten duena koherentea da eta elementuen artean kohesioa somatzen da
Ziurtasuna eta naturaltasuna adierazten ditu
METODOLOGIA, JARDUEREN ANTOLAKETA OROKORRA ETA DENBORALIZAZIOA
OROKORREAN:
Informazioaren teknologiaren oinarriak hezkuntza-plangintzan sartu behar dira
Tresneria erabiltzen ikasten dute ikasleek: irratsaioak sortzeko interneten erabilera ona bultzatu behar da prozesuan (soinuak eta musikak lortzeko esaterako).
Irratsaioak konplexuagoak, muntaketa estetiko eta artistikoak lortzen saiatu behar dute, pixkanaka.
Gustuko musika edota guztien artean sortutakoa…
Irakasleak hori dena bideratu eta helburu pedagogikoetara moldatu behar dute.
Gidoia egiteko txantiloia sortu behar da irakasleen taldean
DENBORALIZAZIOA:
AZAROA-ABENDUA
Iruñeko Eguzki Irratian programa bat burutu:
Aurrezagutzak ezagutu
Irratsaio bat aztertu eta ikasitakoa zehaztu
Irrati-saioa gelan sortu, entsaioa grabatu eta aztertzeko entzun. Analisian antzematen diren beharrak zehaztu.
URTARRILA-MAIATZA bitartean
Ekoizpenak egin: irrati-saioak
Tailer batzuk burutu ikusi diren beharrak ikasleekin lan egiteko eta ziurtasuna lortzeko. Hala nola: gidoi bat nola egin, bat-batekotasuna lantzeko, irakurketa ozenki, tresneriaren ezagutza… (beharren arabera)
Hemeroketa osatzen joan:
Musika (Gure irratsaioak identifikatzeko sor daiteke musika- irakasleekin batera melodia bat, saio guztietan erabil daitekeena).
Ahozko euskarazko baliabideak: esamoldeak, atsotitzak, ipuinak, bertsoak, olerkiak, txisteak....
EKAINA
Ebaluazioa
Irakasleak
Ikasleak
Familiak
Parte hartu duten Alde Zaharreko eragileak/pertsonak...
5. eta 6. mailako gela bakoitzak txandaka eginen du irratsaioa, horrela batetik bestera aste batzuk egonen dira egindako programa entzuteko eta aztertzeko eta programa berria sortzeko gela bakoitzean.
Prestaketa horrela eginen dugu: partaide guztion artean parrillan sartuko diren edukiak erabakiko dira. Programazioa antolatu eta gero, talde bakoitzak dagokion irratsaio-tartea osatuko du. Zeregin hori arrakastatsua suerta dadin, oso ondo planifikatu behar dira edukiak, eta horretarako gidoia osatu beharko dute. Gidoian bi atalak bereiztuko dira: literarioa (esatariek esango/irakurriko dutena) eta teknikoa (kontrol-arduradunei dagozkien oharpen teknikoak). Era berean, sartuko diren ordenan antolatzen dira edukiak gidoian eta bakoitzari dagokion denbora-tartea eta iraupena ere zehazten dira.
Irakaslearekin egindako lana errebisatuko dute eta beren kabuz entsaioak eginen dituzte. Hasierako programetan entsaio orokor bat egingo da gelan, benetako irratsaioa egin baino lehen.
Irratsaioak grabatu eginen dira eta emititu ondoren, gelan entzungo da bere analisia egiteko pauta baten laguntzaz, hurrengo irratsaioa egin baino lehen baliagarria izateko hainbat aspektu hobetzeko, aldatzeko…
Horrez gain, eskolako gainerako geletan ere entzunen da irratsaioa.
EDUKIAK
Hizkuntza bera (Erabili ahala jabetzen gara hizkuntzaz)
Formala eta informala. Informala benetan beharrezko dutena da. Honetarako:
Euskara gustuko duten eremuekin lotzeko pausuak emateko beharrezkoa dena: hiztegia, euskararen neologismok, SMSak... hizkera informala lantzeko aukera, mezu zehatzak, abstrakzioak utzita...
Ahozko adierazpenaren lanketa: esaten jakiteak ere ezinbesteko garrantzia du pertsonen arteko komunikazioa hobetzeko; ikasitakoa besteei azaltzeko erak; komunikazioa eta elkarrizketa nola egin; intonazioaren garrantzia; gauzak esateko moduaren garrantzia, hitzak nola azpimarratu ahoz; erlaxazio ariketak, irakurketaren aurrean lasaitzeko metodoak; erremerreen arazoaren lanketa; mantso irakurtzen dutenen lanketa; bat-bateko diskurtsoaren lanketa; egindako lana entzuteko prozesuaren garapena, akatsak zuzentzeko, ulermena lantzeko eta hobetzeko.
Inguruarekiko harremana: ingurunea ezagutu: elkarrizketa eta erreportajeen bidez kazetarien paperaren garapena; jarduera kulturalak, artistikoak, kiroletakoak, zientifikoak…; xede komunikazioaren araberako diskurtsoaren sortze prozesua: gelakideak, eskola, irakasleak, beste eskolak, gurasoak…; informazioaren kudeaketa: ERRETORIKA
Gizarte-ohiturak eta balioak ikasteko tresna: erantzukizuna, ardura, norbanakoa, taldekoa; Autonomia: irakaslen gidatzeko lanaren onarpena ikasleek irratsaioa aurrera eraman ahal izateko; elkarlana: lan banaketa, ikasle bakoitzaren konpromisoak; Kritika eta autokritikarako prestutasuna; Gatazkak gainditzeko jarrera ona.
Sormena: soinu-baliabide ezberdinak: musika, hotsak, isiltasuna…; genero ezberdinak; umorezko azalpenak; irudimena; musika muntaketa.
Entzutearen garrantzia: inguruan integratzeko tresna
IRRATSAIO BATEN ATALAK:
PLANIFIKAZIOA: zein da gure helburua? Zer nahi dugu?
SAIORAKO EDUKIAK: partaide guztien artean parrillan sartuko diren edukiak erabaki
IRRATSAIOA OSATU: talde bakoitzak irratsaioa osatu behar du eta GIDOIA sortu. Ondoren, dagozkion EDUKIAK antolatu eta banatu.