Acamp de Figaniero

Journado à Figaniero

Èro uno bello journado d’estiéu aquéu 15 d’óutobre quouro si sian retrouba à Figaniero.

Après quàuquei mot de moussu lou Mèro, sian ana pèr carriero pèr uno visito dóu vilage coumentado pèr M. Laugier, presidènt de l’assouciacien « Histoire et Patrimoine de Figanières » e seis ami : l’impousanto glèiso Sant-Miquéu e lei capello, la virado de l’aigo e lou lavadou de la Fontvieille, lou jardin dei perfum e lou vilage dei santoun, lou museon de la serro de M. Augier.

Pèr lou dina, l’assouciacien nous alestissè uno soupo au pistou que si n’en sian lipa lei brego, entaula souto d’auvans bèn-vengu pèr nous assousta dóu soulèu…

L’après-dina si tenguè en plen èr : Jórgi Taxil, acoumpagna de sa quitarro, entounè lei cansoun de Pèire Pascal e Andriéu Peyron. Puei, M. Michel nous parlè de soun mestié d’apicultour.

Gramacian Alan Laugier e soun assouciacien pèr l’ourganisacien d’un acamp que sichè dei mai agradiéu.