2017
2017
Fotò Var Matin
ACAMP GENERAU 2017 : Lou Lu 11 de mars: Sian esta acuhi pèr Lei Barjacaire e soun presidènt Richard Guigoni dins sa salo de classo pèr li teni nouastre acamp generau. Après l’adóucien dei raport mourau e financié de l’an 2016, avèn elegi, coumo mèmbre dóu C A de l’AVEP, Crestiano Faluomi en remplaçamen de nouastre regreta secretàri Rougié Gensollen. Avèn puei parla dei proujèt emé la publicacien de la revisto dins sa nouvello presentacien e dóu rescouantre dei cous que si debanara aquest an aus Arc.
L’après-dina, Lei Barjacaire nous an mena pèr carriero dins sa viloto, chascun à-de-rèng largant sa dicho sus un mounumen vo un site. Ensin an bèn ounoura sa deviso : « un travai parteja, es un travai bèn fa. »
Poudès legi la vesito dóu Lu dins soun entié dins la revisto n°162. Vous n’en dounan un trouas sus lou site : picas sus l’ounglet « nouastro revisto ».
LOU RESCONTRE DEI COUS ASSOUCIATIĖU :
Lous Arc, dissato 10 de jun: Es au coulège J. Prévert que s’es debana l’acampado annalo dei cous de prouvençau dóu Var. Coumo chasco annado, leis assouciacien an presenta d’animacien bèn plasènto, en resulto d’un travai acoumpli dins sei cous de lengo.
An passa sus lou pountin : Acò m’agrado (Lou Muei), Leis Agasso Galoio (Lou Bausset), L’aigo de Flourèio (Flaiò), Lei Barjacaire dóu Lu (Lou Lu), leis escolo de Margarido (Lorgue), dei Moulin (Trans), de l’Oulivié (Lous Arc) e lou Fougau Rurau (Taradèu).
Gramaci à M.-Fr. Guigoni que s’oucupè de touto la preparacien amenistrativo e de l’ourganisacien de l’acamp.
74 enco JOURNADO DE L'A.V.E.P:
Trans, dimenche 15 d’óutobre : L’Escolo dei Moulin nous faguè cachiero pèr aquesto journado de descuberto de Trans. M.-F. Guigoni lou matin, nous presentè l’istòri dóu vilàgi em’ uno proujeicien de doucumen acoumpagna d’esplicacien levado lou mai souvènt deis escri leissa pèr G. Barles.
Lou passo-carriero de l’après-dina, nous permetè de councretisa en situacien lei dire dóu matin. Sian esta fouaço pretouca pèr lei marco dei degai de la darniero inoundacien de jun 2015. Aquélei qu’an pas viscu aquesto terriblo catastrofo an proun peno de lou crèire…