Embedded Files
Acamp generau de Ramatuelo – 17 de mars 2019
Dins la grando e superbo salo de l’Espàci Albert Raphaël, L’AVEP a tengu soun acamp generau en presènci de Mmo Amiel, 1èro ajouncho au Mèro e escoulano dóu « Cantoun Prouvençau », e de mai de quatre-vint sòci presènt vo representa.
Après l’acamp estatutàri ourdinàri dóu matin, avèn passa dins la salo vesino pèr un bèu dejuna anima de pouësìo sus lou loup e l’agnèu !…
L’après-dina avèn barrula pèr carriero pèr descurbi un bèn poulit vilage. Giselo Caïetti nous en diguè quàuquei secrèt de soun istòri.
Tóutei nouàstei gramaci à Mirèio Raphaël, presidènto dóu « Cantoun Prouvençau » e soun burèu qu’an ourganisa la journado de bello façoun.
Si retroubaren à Lorgue, lou 1é de jun pèr lou rescouantre dei cous assouciatiéu de prouvençau.
LOU RESCONTRE DEI COUS ASSOUCIATIĖU :
Lorgue, dissate 1 de jun:
Si sian retouba lou 1é jour de jun dins la bello salo lorguenco de l’Espàci Mitterand pèr nouastre rescouantre annau dei cous de prouvençau.
Sous passa sus scèno : Escolo de Margarido (Lorgue), Escolo dei Moulin (Trans), e Acò m’agrado (Lou Muei) tres cous beileja pèr Marìo-Franço Guigoni que venguè acoumpagnado tambèn de tres de sei pichouns escoulan ; Lei Barjacaire (Lou Lu) toujour autant noumbrous, soun animatour Glàudi Iroir en tèsto ; Mèstre Teisseire (Taradèu) venguè nous dire soun pouèmo coumo va fa despuei quàuqueis an.
Pouèmo, sceneto de tiatre, coumtino e cansoun si sucedèron dins un après-dina pèr uno lengo vivo. Après « la vihado dóu mouart », sian ana « au super-marcat » puei avèn assista à « uno partido de lotò », tout acò dins un umour bèn prouvençau. Lei pichoun an juga de tèste bèn counoueissu : « L’ ecò » e « Merle e merlato ». « La Grand » e « Lou Papet », en proso e pouësìo, an coumpleta poulidamen lou prougamo emé la cansoun « L’estaco ».
Acamp de Triganço – dimenche 13 d’óutobre 2019
Erian un trentenau de sòci de l’AVEP vengu passa uno journado de descuberto dóu naut païs varés. A Triganço, Roubert Liouns nous countè soun vilage e nous menè pèr carriero e placeto enjusqu’au castèu superbamen restaura. De la terrasso, lou bèu-vesé sus lei proumié mount aupen qu’envirounon lou vilage, nous leissè sènso vouas. Au dabas Jabroun èro sens aigo… La leiçoun de toupounimìo, de Jan-Lu Domenge, endrudissè cadun dei presènt.
L’après-dina, Roubert Liouns nous presentè un riche museon agricole parteja en douas partido dins un même lue : lei eisino agricolo pèr lou travai de la terro – de l’araire à la ventarello, dóu toumbarèu à l’estranjo meissounuso-ligarello – autant de machino que sei rèire n’en fasien usage dins sa vido pacano. D’un autre biais, dins un oustau famihau, quantita d’óutis de touto meno e de bèu panèu sus lei saupre-faire pèr viéure en coumunien emé la naturo.
VIDEO de Pau UCELLI
Google Sites
Report abuse