2018

ACAMP GENERAU 2018:

   Flassans, dimenche 11 de mars : Erian à la sousto de la plueio dins la bello salo Gavoty pèr teni nouastre acamp generau. Jan Icard, presidènt de l’assouciacien « Flassans, Passé, Présent » durbè lou tai e dounè la paraulo à Moussu lou Mèro B. Fournier, que diguè soun plesi de nous acuhi à Flassan. Lou presidènt O. Neige durbè puei la sesiho en seguissènt l’ordre dóu jour… De nouta l’aproubacien generalo pèr l’aumentacien de l’escoutissoun (5€) e de l’abounamen à la revisto (20€) à parti dóu 1é de janvié 2019. Richard Guigoni es esta elegi au C A de l’AVEP en plaço de Gui Revest demissiounàri. D’acamp soun previst à Eiguino e Lorgue.

   L’après-dina, duvian ana vèire de proche lou castèu vièi qu’es en pleno restauracien dóumaci l’obro bèn-fasènto dei sòci de l’assouciacien de Sauvo-gardo dóu Castèu dei Pouante. M. Morel, soun presidènt, nous moustrè un doucumen videò , lou marrit tèms nous permetènt pas d’ana sus plaço. Avèn acaba journado emé de cansoun prouvençalo. 

LOU RESCONTRE DEI COUS ASSOUCIATIĖU :   

Lorgue, dissate 2 de jun: 

Aquest an, la recampado dei cous de prouvençau de Var tournè à Lorgue. Doumenico Perrin, cabiscòu de l’Escolo de Margarido e Oulivié Neige, presidènt de l’AVEP diguèron quàuquei mot de presentacien deis animacien de l’après-dina.

Puei, uno deseno d’assouciacien passèron à-de-rèng sus sceno. Soulet vo en group mai vo mens impourtant, leis escoulan dei cous e seis animatour an presenta pouèmo, cansoun, sceneto tiatralo leissant uno grando plaço à de creacien óuriginalo. Encaro un còup, si sian estrassa dóu rire emé lei pichòtei coumèdi jugado emé talènt.

Coumplimen eis assouciacien presènto : 

Acò m’agrado (Lou Muei) – Leis Agasso Galoio (Lou Bausset) – Lei Barjacaire (Lou Lu) – Centre Culturel Provençal (Draguignan) – Escolo dei Mantenèire Prouvençau (Plan-de-la-Tourre) emé Lou Cantoun Prouvençau (Ramatuelo) – Escolo de Margarido (Lorgue) – Escolo dei Moulin (Trans) – Foyer rural (Taradèu) –Lou Raioulet (Sièis-Four).

De mai, avèn agu lou plesi d’acuhi d’enfant emé lei pichoun de l’ Escolo dei Moulin (Trans) e leis escoulan dóu fougau soucio-culturau dóu coulège Pau Cézanne (Brignolo).

En fin d’après-dina, l’Escolo de Margarido pourgè lou got de l’amista em’ un rejauchoun bèn vengu.

75 enco JOURNADO DE L'A.V.E.P: 

Carnoulo, dimenche 21 d’ óutobre    

Pèr uno bello journado d’autouno, l’acamp à Carnoulo coumencè proche la garo. Aqui, si passè la mai grando tragedìo dóu vilage emé lou boumbardamen de la garo, qu’èro d’uno impourtanço majouro sus la ligno Marsèio – Niço, en mai 1944. Si sian puei retrouba dins l’ancian moulin d’òli, belamen restaura, ounte avèn regarda un pichot cap-d’obro : un filme realisa, coumenta e ilustra pèr l’artiste pintre e escrivan Pau Cèze sus la vido dóu vilage au tèms de la vapour. Après uno virado à la boutigo « Flour de camin », tout à-n-un còup cantoun prouvençau e negòci de proudu dóu terraire, si sian entaula « Chez Doudou ». L’après-dina sian mounta à Castèu-Reiau pèr de coumentàri de J.-G. Babois e avèn acaba journado au pichoun moulin d’òli mouderne de Deyssia.

 Nouàstei gramaci au Rigau carnoulen, Bastian Psaïla, pèr l’ourganisacien d’aquesto flamo journado.

 Lou rendu comte d’aquest acamp sera dins la revisto à veni, pèr parèisse en febrié 2019.