2021

Lou dimenche 26 de setèmbre si tenguè à La Crau l'acamp generau de l'AVEP qu'èro esta remanda en cauvo de la pandemié. Maugrat lei restricien sanitàri, lei sòci, urous de pousqué mai si rescountra, venguèron en noumbre pèr aquesto journado mesclant oubligacien estatutàri e acamp festiéu pèr lou cinquantenàri de l'AVEP.

La sesiho si durbè pèr un óumage soulenne ei primadié que foundèron l'AVEP en óutobre de 1971 alentour dóu proufessour Pau Roux. Lou remembre d'àutrei sòci, vengu au fiéu dóu tèms, fuguè evouca, Rougié Gensollen en tèsto qu'oubrè tant pèr nouastro revisto.

L'acamp generau dóu matin si debanè en presènci de M. Dampenon, counseié municipau delega à la culturo. Lei raport sichèron aprouva à l'unanimita; lei proujèt pèr aquesto fin d'annado 2021 seran la publicacien de la revisto dei 50 an (antoulougìo de tèste d'autour mèmbre de l'AVEP) e l'edicien dóu recuei de crounico de prèsso de Reinié Nonjon dei Maioun.

L'après-dina, pèr celebra lei 50 an de l'AVEP,  la lengo prouvençalo tenguè la sceno. Lou triò Nosto Modo (Courino e Patrice Gauthier, Jan-Lu Domenge), recoustituï pèr l'oucasien, nous cantè quàuqueis èr sourti deis enregistramen de Jan-Lu proche leis ancian, èr devengu poupulàri à l'AVEP. Dins lou meme tèms Pèire Imbert e Jan-Lu Domenge diguèron de tèste d'autour varés de nouastre tèms d'aro, moustrant ensin que lou prouvençau si parlo e s'escrive toujour...

Venguè puei lou conte musicau de Roumié Salamon (countaire) e Andriéu Gabriel (musician), « Lou vióuloun dei bouas ». Fuguè un encantamen, musico e tèste en armounìo pèr un conte pouëti basti d'après tres conte traditiounau dei païs d'o.

Rendu comte dins la revisto n°180 de decèmbre 2021.