కొండ
ఆ కొండని చూసినప్పుడల్లా నా గుండె మ్రోగుతుంది
బాల్యం నా కళ్ళ ముందు ప్రత్యక్శమౌతుంది
ఎన్ని వేల ఏళ్ళ చరితకు సాక్షిగా నిలిచిందో
నాకైతే తెలియదు కానీ నా ఈ చిన్ని బ్రతుకులో
ఎన్నెన్ని ఘటనలకు గురుతుగా మిగిలిందో
అది కేవలం బండ మాత్రమే కాదు
నా గుండె లోతుల నెరిగిన ఆత్మీయ నేస్తం
అందరు వుండీ నేనొంటరినయినపుడు
నన్ను ఆదరించి అక్కున జేర్చుకున్న
ఏకైక నేస్తం ఆ కొండ
ఎన్నెన్ని ఊసులో ఎన్నెన్ని బాసలో
ఎన్నెన్ని గాధలో ఎందరి గురుతులో
శెలవు దొరికితే చాలు ఆ కొండ పై ప్రత్యక్షం మా దళం
ఏ వేడుకైనా వేదనైనా ఆ కొండ మీదనే మాకు వేదిక
నెలకొక్క తడవైన ఆ కొండనెక్కనిదే
మనసు మాట వినదు గుండె బరువు దిగదు
ఈ నేస్తాన్ని నా పిల్లలకు పరిచయం చేయాలని
దానితో నేను పంచుకున్న మధురానుభూతులని
పెంచుకున్న గాఢానుబంధాన్ని వారికి తెలియజెప్పాలని
నేనెన్నో కలలు కనేవాడిని
కానీ...
ఎవరికో కళ్ళు కుట్టాయి
రాయి కోసం, మట్టి కోసం
ఆ కొండను నిలువెల్లా పెకలించేస్తున్నారు
పగులుతున్నది కొండ కాదు నా గుండె లాగున్నది
ఎంత బాధ పడితే మాత్రం ఏం లాభం
నేనొంటరినై వాళ్ళని ఆపలేక పోయినపుడు?
ఈ రోజు నా నేస్తాన్ని చూడటానికి వెళ్తున్నాను
బహుశా ఇదే కడపటి చూపు కావచ్చు
గుండె అధురుతోంది మనసు బెదురుతోంది
ఎవరైనా నాకు తోడొస్తారా?
/- హరిణి