李永鏜 老師撰稿
《老師定定提醒的一句話》
人講「花無百日紅，無啥物花會當永遠開甲媠噹噹；人無千日好，嘛無啥物人會當永遠予你靠。」從讀冊到今，老師會定定講一寡金言玉語，提醒咱做人做事的道理，「家己栽一叢，較贏看別人。」是老師上捷提醒的一句話。
一樣米飼百樣人，逐个人的命運佮能力攏無相仝。別人種的花，毋管有偌媠、偌紅、偌芳，攏親像是天邊的璇石，較媠咱嘛摸袂著。上好是冗早家己栽一叢，沓沓仔掖子、沃水、落肥，有一工，「開花滿天芳，結子就足驚人。」
畫家謝坤山，從少年就斷一跤兩手，毋過，伊拍斷手骨顛倒勇，干焦靠最後彼支跤，獨立生活，畫出來的圖，一幅一幅，攏充滿著奮鬥的精神佮勇敢的靈魂。作家劉俠，十二歲就帶著真罕見的關節炎，無法度自由行動，只好干焦讀甲小學畢業。伊並無失志，利用倒佇病床的時間，讀足濟文學作品，尾仔變做一个優秀的作家。劉俠彼款樂暢、積極的精神，嘛鼓勵了真濟失志、想欲放棄家己的人。劉俠毋但免倚靠別人生活，猶閣盡心盡力去公益團體做義工，服務其他的殘障人士，顛倒變成真濟人的倚靠。
這馬的社會誠競爭，若無兩步七仔，是無法度佮人徛起、佮人比並。特別是咱學生囡仔，食飯坩中央，無煩無惱，更加愛趁這段時間，好好仔讀冊，培養較濟專長，向望後擺一出社會，毋但免閣倚靠序大人，猶閣會當予規家伙仔倚靠。
「家己栽一欉，較贏看別人。」老師定定提醒的這句話，我會永遠記佇心肝底，我會堅心拍拚，相準目標向前行，一步一跤印，「有跪，一定會出穗！」倚山山會崩，倚壁壁會倒，全世界干焦家己上可靠，靠家己上好啦!
李永鏜老師其他撰稿
1.若準時間會當重來
2.有知識，嘛愛有禮數
3.我上煩惱的代誌
4.生活中的苦澀和甜蜜
5.驚驚袂著等
6.壓力來的時陣
7.我佮大自然有約
8.一擺上寶貴的經驗
9.一條新聞的啟示
10.隨時做環保
11.老師定定提醒的一句話
12.欲按怎幫助別人
非常感謝李永鏜老師不吝分享