時間上公平，毋管大細漢好額散，一工攏二四點鐘。好額人開錢買無時間，散赤人的時間賣無錢；時間會緊會慢，艱苦的時，一日
若一冬，歡喜的時，一晃過三冬；目睭瞌落閣褫開，按呢就過一工！目睭瞌落「若」無褫開，按呢就過一世人！時間遮爾仔狡怪，咱就
予伊重來，看會發生偌濟心適代？
咱共地球倒紡，予時間倒退十一冬，你共南投縣政府講，有九二一大地動，叫所有的人緊搬厝，我相信隔工的新聞，就會共你刊佇
第一版───台灣閣加一个痟人。咱共時鐘倒反轉，翻頭倒退八冬，你去共中華航空公司講，七四七的飛行機，千萬毋通起飛，會佇澎湖
天頂爆炸，我相信當工，航空公司就會免費送你出國───台灣閣減一个痟人。時間重來，到底會當改變啥物？閣試看覓，予時間倒退一
禮拜，你開一百箍去買「樂透彩」，結果──當然嘛是著頭彩，毋過──獎金干焦五十箍，因為──全台灣的時間攏重來，兩千萬人公家分
頭彩。若閣毋相信，阿無按呢，咱予日頭西爿出東爿落，時間倒退一工就好。昨昏有一支股票起盡磅，欲買偌濟你緊去傱，結果──當然
嘛是起甲盡磅，這聲卯死矣！不而過──有人買煞無人賣，嘛是無彩工。若準時間會當重來，逐家攏想欲改變大代誌，結果嘛精差毋成
物。就準做咱是神，咱嘛無資格變別人的歷史。
隨人食飯隨人飽，各人造業各人擔。若準時間會當重來，我可能無才調改變別人，毋過──我絕對會當改變家己，改變家己偏差的觀
念佮錯誤的行為。爸母明理的教示，我袂閣應喙應舌；歹聽話會傷著人，我會講予好聽講予輕鬆；阿母辛苦規年迵天，我欲替伊鑢塗跤
洗碗箸；我會逐工好笑神，袂閣烏白受氣。聽講以後的科學，時間真正會當重來。所以，我這馬就愛好好仔做，另日仔若閣轉來現此
時，我就袂閣怨嘆「早若知，當初就不應該。」
人講「千斤力毋值四兩命」，人生，本來就是一个無圓滿的圓，加減攏會缺一兩缺。無要緊，只要咱事事項項照步來，一分一秒過
予足精彩，歡喜做甘願受，無後悔無遺憾，徛算時間會當重來，咱嘛尊重天公伯仔的安排。
(以上由郭永鏜老師撰寫，李旻格同學演說)