佇三百萬冬前，人類來到地球，佇遮借蹛。地球，是一个慈悲慷慨的厝頭家，包食包蹛閣免厝稅。想袂到，煞拄著歹厝跤一堆的漚
客，無生雞卵都足害矣、閣放雞屎，癩 爛癆遺甲一四界，等到規間厝強欲崩落去矣，才知影欲覺醒。人，因為自私自利，煞害人害己，
害一下險險家己死。
人，為著發展經濟，排碳量一冬並一冬較濟，氣候漸漸兩極化，毋是做水災，就是大洘旱；毋是透風颱，就是火燒山。若照目前的
款勢，地球可能會燒袂退，一百冬後，溫度會提高兩度，海平線會漲懸七公尺。今仔日，我猶閣算誠萬幸，會當徛佇講環保，講甲喙角
全全泡，若等到阮囝 孫彼時陣，毋知欲徛佇佗位，因為──台中市早就沉佇海底阿!咱人，為著欲享受較濟，四界剉樹林開發土地，害猴
山仔無地覕，印度象無地蹛，只好走出來討食、佮咱搶地盤。人咧做，天咧看，今仔日咱共人侵門踏戶，明仔載萬物就會共咱倒欱。蜂
若消失，人類四冬後就會滅亡；人類若滅亡，蜂就永遠袂閣消失。天生萬物以養人，天公伯仔所賜的禮物咱愛珍惜，毋好閣繼續蹧躂家
己。
六月初五是「世界環保日」，彼日我看著一支影片，教咱愛隨時做環保，日常生活欲按怎節約能源。食外口愛家己攢碗箸，出門紮
水、三不五時食一下仔素食；盡量坐公車騎鐵馬，紲手禁電源關電火，紮手巾仔、用紙較袂遐討債；洗身軀上好是用沖水、莫浸佇浴池
拍損水。資源愛回收，糞埽愛分類，歹銅舊錫會當抾去賣，洗米水聽好提來沃花。講起來誠矛盾，人若著重病，食藥、看醫生，一日都
毋敢停。這馬，地球都已經著癌症矣，毋免閣定啥物環保日，對今仔日開始，逐日攏是環保日，隨時做環保，就愛對家己本身做起。毋
通看輕一个人會當為地球做啥物，一个人若是好的加做一項， 的減做一項，全世界七十億个人，眾人扛山山會動。
日月天星、江河海水，大自然共咱的徛家裝潢甲遐爾仔媠，破害環境的共業，咱真正是擔袂起。地球聽好無人，人，敢會當無地
球？保護環境就是保護咱人類，疼惜地球就是疼惜咱家己。天堂地獄，干焦一念之差，咱對地球付出偌濟愛，就會當住佇偌媠的世界。
(以上由郭永鏜老師撰寫，李旻格同學演說)