(以上由郭永鏜老師撰寫，李旻格同學演說)
世間，無人逐工開新車、蹛新厝，偏偏仔是新聞逐工有，有的新閣有的舊。有的是無報無人知，生目睭、發目眉，毋捌看
過遐精彩；有的是歷史一再咧重演，干焦主角換別仙，看著就厭 。嘛有聽一个影，就生一个囝，無影無跡，是講假有跤有
手；閣較譀古的，規氣家己製做新聞，管待伊社會是毋是會舞甲亂紛紛。
無偌久進前，發生一條「歌星義賣T恤做公益，一領衫賣四百捐一百」的新聞，一報就報欲兩禮拜，鬧甲強欲通人知。社
會的反應是好 兩分明，咱先來講 的這爿。這爿是正剾倒削兼譬相，嫌甲無成樣，罵伊根本是借公益廣告咧拍知名度，是一種
推銷家己生理的漚步。人若是白白布硬欲共你染甲烏，就準做是一陣火金蛄，嘛欲講甲變做火燒埔。當事者夆逼甲無法度，公
開解說會失禮，講是行政工課處理無好勢，一切攏是誤會，向望大眾愛繼續支持公益團體，繼續幫助社會。這爿才無咧共你信
篤聽遮濟，顛倒笑伊是「豬母牽去牛墟」，三講四漏氣，愛伊共錢吐出來才會直。咱愛知，厝內事會使凊彩，公益募款這種眾
人代，步步攏愛照起工來。一旦引起人誤解，做甲流汗嘛會夆嫌甲流瀾，明明是好代，嘛會變成「客人穿皮鞋」──足-悲-
哀。咱若做慈善工課，好頭嘛愛好尾，按呢，才袂落人的喙唇皮。一步失覺察、踏重耽，就會拍歹一世人的好名聲。以上的道
理，予咱的啟示，就是──「教一擺乖，學一擺精」，「欲好龜 壁，欲敗水崩山。」
咱閣來講好的這爿。這爿贊聲相伨的人嘛規大陣，呵咾這位歌星一向形象攏袂 ，毋通風聲嗙影共伊害，呼籲社會毋好遐
現實，「九頓米糕無準算，一頓冷糜抾起來囥。」予平平是咧做善事的人，看甲心會酸。公益募款的工課原底就無輕鬆，負責
的人，擔頭是夭壽重。社會每一个人，力量攏無相仝，窮予倚來！「眾人扛山山會動」。毋管你是小卒仔抑是大官，毋管你欲
捐三萬抑是兩箍半，窮予倚來！社會溫暖袂孤單。人的舌是掛佇人的喙，欲按怎講隨在伊，人咧做，天咧看，只要咱問心無
愧，目金的人絕對攏會共你支持。以上的道理，予咱的啟示，就是──「樹頭徛予在，毋驚樹尾做風颱。」「濟塗掩過山，濟
水沖倒岸。」
「勸人做好代，較贏咧食早齋。」咱千萬毋通為著這層代誌，煞對所有的公益團體起懷疑。只要募款單位值得咱信賴，善
款的運用有公開，捐出去的錢就莫閣烏白想，橫直「真布施，毋驚假和尚」。社會是溜溜瞅瞅，萬事食兩蕊目睭，擘予金，看
予明，新聞事件才分會清。