人，佇病院出世，毋過有一工，若欲走的時，敢會想欲閣轉去病院。若會當躺佇海邊的草埔仔，欶著清芳又閣淡
薄仔鹹甜的空氣，就親像予阿母抱佇胸前，共咱飼的滋味。人，愛知影咱的故鄉佇佗位？
前年歇熱，佮阿母去花蓮看海翁。拄出海的時，白色的海湧一波一波，膨的凹的挨來捒去，坐佇船頂親像紅嬰仔
坐佇搖籃，予阿母的雙手按呢搖來搖去。我想甲當趣味的時，雄雄，咻！咻！咻！對海底射出三支白色的箭，呼！
原來探頭出來相借問的，是三隻海豬，徛佇海湧頂面，尻川扭來扭去，舞步是不止仔媠。海翁出現的時，聽阿母咧落下
頦，伊講「魩仔魚欲嫁予海翁，岩公看甲赤目，加網驚一下吐舌。魩仔魚阿媽煩惱甲袂食袂睏，因為──伊無知影以後
──敢有法度抱伊的外孫。」阿母講甲歡頭喜面，愈講愈紲喙，袂輸欲嫁予海翁的是伊家己。紲落去的好戲，是飛烏佇
空中咧展翼，近看親像燕仔，飛來飛去，遠看袂輸火金蛄，閃閃爍爍。歡喜的時間過了有夠緊，目一下 ，原底浮佇半
天懸的紅日，嘛漸漸墜落海平線。只好抱著依依不捨的心情，佮大海講一聲───我會閣來！
今年歇熱，佇電視閣看著予我足數念的海豬──台灣白海豚。我歡喜甲伸手去摸電視，毋過，一幕一幕看落去，煞
對歡喜轉受氣。全世界最後七十隻的台灣白海豚，佇電視一直頕頭拜託，拜託所有的台灣人，做伙出錢替 買土地，因
為政府為著經濟，欲共 兜出賣。我透過網路才知影，毋但是台灣白海豚，猶閣有蝦猴、花鮡、海毛蟹佮真濟稀罕的動
物，攏生活佇彰化濁水溪，出海口的濕地，無這塊土地， 活袂落去。我買著土地彼一暗，歡喜甲睏袂去，天光隨閣拚
去車頭，四界鬥宣傳，向望鬥相共的，會當愈來愈濟人。我不允準台灣白海豚消失，我希望「魩仔魚嫁予海翁，加網驚
一下吐舌」這款故事，會當予咱的囝囝孫孫，永遠流傳。我甘願放棄佮男朋友約會，嘛袂放捒台灣這塊土地，我欲佮海
豬、海翁約會一世人。
你聽風，敢毋是瑤池金母演奏的仙樂？你看雨，敢毋是牛郎織女歡喜的目屎？日月天星、江河海水，大自然是遐
爾仔媠。地球聽好無人，人，敢會當無地球？「天生萬物以養人」，人，是用啥物來咧報答天？
(以上由郭永鏜老師撰寫，李旻格同學演說)