咱這馬的社會，真濟人攏有受過高等教育，一个人對幼稚園讀到博士，用二十冬的時間，佇學校讀冊、求學問、學智識，目的是為
著啥物？嘛是希望會當用遮的智識做基礎，予咱會當較捌代誌、較會曉做人。因為，一个人會成功，上重要的毋是你偌有智識、偌有能
力，顛倒是你對事的態度佮對人的禮數。
咱攏知影，人際關係是那來那重要，人情世事、陪綴盤撋，有真濟鋩鋩角角，若是毋捌禮數，會予人講尻川後話，講咱無出入內
外，冊讀佇尻脊骿。若是閣予人譬相，講咱無家教，就更加是侮辱著咱的序大人，按呢，就枉費爸母開錢予咱讀遐濟冊矣！
一个人的禮數，對細漢就愛養成好習慣，「細漢若無雕，大漢就熨袂曲。」這馬的學生囡仔，佇學校攏知影愛共老師、校長講 早，佇厝裡煞認為爸母對咱好是天公地道的，顛倒近廟欺神、袂曉欲共序大人請安問好、說多謝。看著厝邊頭尾的阿伯阿姆，干焦烏仁對白仁，嘛毋知影欲好喙相借問，坐車閣較袂曉欲讓位予老大人。像這款學生，無人緣閣臭乞食羶，另日出社會，啥物人會想欲共牽成，按呢，閣偌有智識，嘛是了然、無較縒。
台灣俗語是咱祖先上寶貴的經驗佮智慧，凊彩講幾句仔，就知影禮數有偌爾仔重要。坐愛有坐款，愛「坐予正，才會得人疼。」生理場來往，是「相請無論，買賣算分。」嫁娶的時，是「賒豬賒羊，無賒新娘。」有袂拄好的時，愛「人情留一線，日後好相看。」一个人，千萬毋通愈熟似煞愈靠俗，予人講咱有智識無禮數。愛永遠會記得，會記得咱祖先共咱交待過──隔壁親家，禮數原在。
一个社會，若是人人捌禮數，無仝的族群佮文化互相尊重，無仝的聲音佮意見互相包容，按呢，咱的社會就會那來那和諧，咱的國家毋才有資格做一个先進國家。
(以上由郭永鏜老師撰寫，李旻格同學演說)