從細漢到今，若聽序大人咧講 的經驗，通常攏是講「食一歲，學一歲」、「教一擺乖，學一擺精。」袂輸一定愛對失敗的過程，才
會當學著經驗。我可能較好運，今仔日我欲講的經驗，是一擺歡歡喜喜、足成功、足寶貴的經驗。
舊年歇熱，我代表學校參加台中縣的台語演講比賽，佇網路揣著一个專業的台語老師共我鬥相共，伊毋但對頭共我教到尾，教我誠
濟演講的撇步佮鋩角，閣改變我對真濟代誌的看法。一開始，老師就足嚴肅對我講：「我教你台語，毋是欲予你比賽著等，是希望你學
著較濟的台語智識，會當了解家己的母語。」老師閣專工替我安排五十點鐘的台語課程，教我呼八音、連讀變調、白話音佮文言音，特
別是學台灣俗語，學著足濟課本無學著的智識。「有唐山公，無唐山媽。」我了解唐山過台灣的移民歷史，這馬的台灣人，大部份是平
埔族的後嗣。「爸母疼囝長流水，囝想爸母樹尾風。」序大人對咱的愛真正是無時停，咱愛學會曉感恩。「不孝新婦三頓燒，有孝查某
囝過路搖。」教咱莫欣羨別人，愛寶惜眼前的家庭幸福。「食尾牙面憂憂，食頭牙撚喙鬚。」予我了解土地公的民間信仰。
台語課程讀煞，我參加教育部舉辦的「台語能力認證考試」。當我收著第四級－中高級的合格證書，我歡喜甲 起來跳，我做夢都想
袂到，這世人頭一張證照──竟然是台語證照。較早參加比賽，干焦一直想欲著等，所以上台足 緊張，成績嘛攏無理想。這擺，我聽老師
的話，共比賽當做是學習台語了的一種表演，上台煞顛倒加足在膽，嘛提著第二名。
人生，是一个相連紲的學習過程，這擺的經驗誠寶貴，予我足大的啟示。做任何一層代誌，愛足清楚你的目的是啥物，千萬毋通佇
過程中迷失了目的。代誌的看法若改變，困難度嘛會改變，就會當用較輕鬆的心情，面對閣較大的挑戰。
(以上由郭永鏜老師撰寫，李旻格同學演說)