今年三月，日本發生東北大地動，核能發電廠爆炸，狀況非常危急。這个時陣，煞有一陣人，甘願留落來收尾，看起來是決定欲自
殺。 他們，毋是軍人，嘛毋是政府官員，並無這个責任來犧牲， ，真正的身份──應該是英雄。佇會當免死的時，煞顛倒選擇為眾生來
死，這──就是正港的英雄！
一个人的性命內底，金錢事業、智識名聲，有遮濟理想，咱欲按怎去追求、選擇？一生中，阻礙困難、坎坷冒險，有遮濟考驗，咱
欲按怎去面對？咱這世人，天公伯仔會予咱幾擺機會？重要的時陣，咱欲按怎去把握？有的人拖拖沙沙、躊躇頓蹬，時機一過，才來怨
歎後悔；有的人堅持理念、拍死無退，勇敢創造出家己性命的價值。
世界上好額的比爾蓋茲，佇十七歲就選擇放棄讀大學，專心研究電腦軟體。今仔日，伊佇電腦事業喝水會堅凍，伊的慈善事業，救
濟規百萬的艱苦人。全世界，上了解家己的人──就是家己。想欲成功的人是窒倒街，有勇氣改變家己的，到底有幾个？驚驚袂著等！比
爾蓋茲，就是佇十七歲的時，憑著伊的勇氣佮膽量，改變世界的未來。成功，毋是因為你的能力；成功，是因為你的態度。
有一款人，講欲一畚箕，做無一湯匙。計劃好的代誌，驚驚膽膽毋敢去做，親像犀牛望月，一月望過一月。等甲欲做的時，又閣
「捏驚死，放驚飛」，這款人，看起來是開花滿天芳，就準做予你偌有才調，到路尾，嘛無結子的一工。
我讀國二的時，袂輸是青盲的毋驚銃，走去擔任學校的播音員。佇全校咧食晝的時，唸一篇有智慧的文章、講一个有啟發性的故
事，透過放送頭，聲聲句句，敢若是山谷的回音，鼓勵同學嘛鼓勵著我家己。這馬，我寫文章的功力進步矣，上台演講足在膽矣，有任
何困難的挑戰，我袂閣再驚惶矣。
人講「驚驚袂著等，無行袂出名。」成功，袂雄雄對天頂跋落來。咱愛心頭掠予定，有自信、敢冒險，責任來的時莫挨推，機會來
的時莫頓蹬。若是暫時無成功，毋免驚！會跋才會大，上起碼會累積較濟經驗佮能力，聽好隨時迎接閣較濟咱想袂到的機會。田螺含水
過冬，春天的雨水一來，就是出頭天的好年冬。
(以上由郭永鏜老師撰寫，李旻格同學演說)