世界上媠的一首詩，干焦一字────愛！一个人上大的成就，毋是你家己偌有成就，是你佮偌濟人分享你的成就；一个人上大的快
樂，是你予偌濟人得到快樂。一个人從出世開始，若無家庭學校、社會國家共咱鬥相共，敢有可能會成長大漢？所以，幫助別人，是咱
做人一種基本的義務佮責任。
人的能力三不等，欲按怎幫助別人？我今仔日干焦欲講三項，好額散攏做會到的三項──好心、好喙、做好代──這三好，會當隨時
予人歡喜、予人信心、予人希望。第一是好心──替人想。德蕾莎修女講過：「愛的倒反面，無是恨，是冷淡。」雙手插胳，徛懸山看馬
相踢，這種心態，會予咱的社會漸漸失去溫暖。所以，當咱一帆風順的時，愛關心有人不如意；咱有才調的時，愛體諒並咱較頇顢的
人；咱有錢的時，愛想著足濟散赤人，當咧過艱苦的日子。甚至是咱無錢通買鞋仔的時，嘛愛想著有的人連跤都無。
第二是好喙──講好話。人講「相命的無褒，食水都無。」好喙，是全世界上算會和的投資，免本閣多利。一句「你穿按呢有夠
媠」，阿婆仔聽著嘛會心花開；一句「你今仔日面色加足好」，病人聽著會減輕一寡煩惱；一句「你絕對會成功，千萬毋通放棄！」部
屬聽著就會繼續拚落去；一句「只要有進步，阿爸就帶你去玩。」序小聽著功課就會沓沓仔好。講出去的話，袂輸是射出去的箭，是袂
翻頭的。好嘛一句， 嘛一句，咱一世人的好 ，這支喙就已經共咱決定一半矣！所以好壞在心內，喙唇皮仔好款待。咱逐工攏愛共人讚嘆
呵咾、共人安慰褒嗦。
第三是做好代──鬥陣來。若真正想欲幫助較濟人，咱就愛學比爾蓋茲按呢，做好代愛大聲講出來，上好是講甲通人知。親像欲徙走
一支山，只要全台灣的人，同齊掘一工，彼就「眾人扛山山會動」。今年九月開學，我招全班的同學，一个一個月出六十箍，捐予「家
庭扶助中心」，認養兩個散赤兒童。人講「近朱者赤，近墨者赫。戲館邊的豬母，袂曉唱曲，嘛會曉拍拍。」這馬，我聽講有幾若班，
嘛開始綴阮按呢做矣。愛心，毋但會相穢，猶閣會一个湠過一个。
對今仔日開始，咱莫閣向望，莫向望性命中會出現貴人；咱愛發願，發願家己是別人性命中的貴人。欲按怎幫助別人？就是這「三
好」──好心、好喙、做好代──隨時予人歡喜、予人信心、予人希望。咱的心內有偌濟愛，就會當創造偌媠的世界。
(以上由郭永鏜老師撰寫，李旻格同學演說)