啥物花會當永遠開甲媠噹噹？無！因為──花無百日紅；啥物人會當永遠予你靠？無！因為──人無千日好。咱敢捌食過甘蔗雙頭
甜？咱敢捌看過月娘暝暝圓？一齣好戲，絕對是一幕一幕，會當感受無仝的歡喜佮傷悲；一桌好料理，一定是一路一路，會當食出無仝
的湯頭佮滋味。
頂日仔過晝兩三點，綴阿母去園裡挽鹽桑仔。敢會是我平常時仔食好做輕可？日頭都已經遮軟仔，嘛猶未落山，我哪會挽甲跤痠
手軟，規身驅大粒汗細粒汗。轉去的時，我佮阿母那行那講，心情不止仔輕鬆，煞無感覺著雙手捾四袋的彼款沉重。鹽桑仔啖起來酸
澀仔酸澀，落喉煞顛倒甘甜仔甘甜。阿母共這擺挽鹽桑仔的經驗，當做一个例，講大細項誌攏是「艱苦頭，快活尾」，真濟滋味攏藏佇
的過程內底，愛我斟酌體會。呼！想袂到，鹽桑仔一粒仔囝，是按呢──甘甘、苦苦、澀澀、甜甜，卻是包括生活當中百百款的滋味。阿
母閣講著伊飼囝過程的苦澀和甜蜜，講甲喙角全泡p歡頭喜面，毋過，我猶幼茈，若欲感受飼囝的滋味，可能愛等到「手抱孩兒，才知爸
母時。」
為著這改欲演講，序大人蓋捷撥工共我鬥相共，雖然討論出來的結果毋是遐完全，煞無意中體會出爸母對咱的感情有偌重。阿母
驚 我比賽袂著等，閣介紹台語老師來教阮按怎下苦工，予阮歡歡喜喜，加學著台語幾若項。台灣俗語真趣味，是咱祖先的經驗佮智慧；
台語發音真正深，有分讀冊文言音、口語白話音；台語詩句真優雅，若欲體會欲學愛冗早。老師針對這斗的主題，鼓勵我誠濟話，我攏
一一記佇心肝底。伊講：「會當放棄祖公仔地，袂使放捒爸母話；只要肯拍拚，一生總有一擺第一名。這───就是甜蜜。」老師咧講台
語，有影加誠媠，伊閣講：「你攑蠓捽仔，蹔塗會地動；人飛雲頂，喝水會堅凍；毋管偌拍拚，人生無彼號永遠第一名。這───就是
苦澀。」我知影欲學好台語，毋是三冬兩冬，過程無咱想的遮輕鬆。不而過，若是老師肯教咱肯學，「有跪，一定會出穗。」總有彼
工，阮的台語學甲有二步七仔，就會當講甲佮老師仝款遐爾仔媠。
人生，本來就是一个無圓滿的圓，加減攏會缺一兩缺；生活，親像咧試食鹹酸甜，愛會記得逐項試，才知影佗一味家己上佮意。
雖然一好往往佮一 ，兩好定定無相排，無要緊！只要咱事事項項照步來，萬項代誌樂暢來看待，按呢，一切就是天公伯仔上好的安排，
跋一倒，有時嘛會抾著一隻金雞母。最後，希望會當藉著蘇東坡的詩詞，咱逐家共同來勉勵佮體會──「人有悲歡離合，月有陰晴圓缺，
但願人長久，千里共嬋娟。」
(以上由郭永鏜老師撰寫，李旻格同學演說)