人講「甘蔗好食無雙頭甜，月娘較媠嘛無暝暝圓。」萬項代誌有時仔袂當像咱想的遐如意。佇大自然，水有水壓，愈深壓力會愈
重；空氣有氣壓，那懸喘氣就那困難。人生的過程，為著追求目標佮理想，欲藏較深、 較懸，一定會拄著壓力佮困難。壓力，是一種自
然、必然的現象，有壓力就代表咱有咧重視，並毋是啥物歹代誌。
壓力有真濟種，若是三不五時、甚至是照三頓來的壓力，唯一的辦法，就是勇敢去克服。比喻講學生囡仔面對讀冊、考試的壓力，
愛共考試當做是學生的本份，共讀冊當做是一種興趣，鼓勵家己「艱苦頭，快活尾」，愛少年艱苦一站、食老輕鬆，毋通少年輕鬆、後
擺才來後悔一世人。一生中，啥物時陣無咧考試，若是驚壓力就提早放棄，按呢，壓力顛倒會膏膏纏，早慢會共咱害死。
人生，本來就是一个無圓滿的圓，加減攏會缺一兩缺。失戀、離婚抑是失去親人，這款壓力非常沉重，一定愛揣一个出口來消敨，
毋管是出國旅遊、運動泅水、抑是揣朋友哭苦安慰。這款壓力毋通家己吞，吞愈久會愈鬱悶，壓力喔~袂硩死人，戇戇仔予翕，才會翕死
人。真濟代誌毋是咱的能力會當挽回的，這爿若是缺一缺，咱就共另外一爿補予圓。天邊的璇石，較媠咱嘛模袂著，若是閣再一直想過
去，恐驚會──含眼前的幸福嘛會做伙「拍毋見」。
千斤力毋值四兩命，天公疼戇人嘛會創治人。畫家謝坤山，就因為從少年斷一跤兩手，畫出來的圖，一幅一幅，煞顛倒充滿著奮鬥
的精神佮勇敢的靈魂。作家劉俠，十二歲就帶著真罕見的關節炎，袂當自由行動，伊利用倒佇病床的時間，讀真濟文學作品，變做一个
優秀的作家。面對命運壓力的時，想一百个辦法，不如改變一个想法，樂暢的人會共缺點變做優點，跋一倒，煞顛倒抾著一隻金雞母。
一枝草、一點露，青盲的較精，啞口的較靈，天公伯仔會予一个人有條路，想法若改變，就會看著另外彼條路。
人生，親像是一齣精彩的好戲，一幕一幕，有無仝的歡喜佮傷悲。袂當改變的事實，咱愛有歡喜接受的智慧；會使改善的代誌，咱
愛有堅心拍拚的勇氣。成長的過程，甜中帶苦、苦中帶甜，壓力來來去去。該面對的堅心去面對，該放予去的勇敢放予去，按呢，才會
當體會人生百百款的滋味。
(以上由郭永鏜老師撰寫，李旻格同學演說)