「大人煩惱無錢，囡仔歡喜過年」，莫掠準「囡仔人，跳過溝，食三甌。」就當做阮食飯坩中央的囡仔人，都攏親像阿不倒按呢無煩
無惱。人講「一人煩惱一項，無人煩惱相仝」，讀冊囡的心理負擔嘛不止仔重。功課寫無好勢老師嫌，加看一下仔電視爸母唸；睏眠的
時間是夭壽短，認真補習閣讀無冊；看著好食的是驚大箍，減肥過頭煞s瘦硞硞；一支舊型的手機用到今，同學用的比阮攏較奅。毋過，
這攏猶閣算細攤的，我上煩惱的代誌就是──我的身材──矮閣短！人矮跤短就無自信，唉！予人想著頭較大身。
人矮有偌才，無講無人毋知。物件囥懸別人是凊彩提，阮是架椅仔閣愛躡跤尾，排隊定定磕著人的衫仔裾尾，拍籃球無人欲佮我作
伙， 講一隊五个袂輸若四个，連踅街喝俗貨都無才調佮人 ，上驚的是──查埔囡仔笑阮矮之之，無人會佮意。唉！話若欲講透枝，目屎
是掰袂離。敢講人矮攏總無好處？有！有一工，天若崩落來，有躼跤的替阮托！聽講身懸往往會遺傳，阮大姊佮小弟，有影生做並人閣
較懸，獨獨我，無種著序大人，真正是惱死人。
我咒誓，我堅心欲抽懸，不管過程有偌困難，路途有偌遙遠。我食食照起工，運動閬時無閬工，轉成的祕方食欲十外項。阮日思夜
夢、想空想縫欲抽懸，自按呢拍拚欲一兩冬，無疑悟最後的結果，嘛是──擔沙填海──無彩工！唉！「只恨枝無葉，莫怨太陽偏。」，
真正是「躼--的有躼命、矮--的天注定。」
阿母知影我足煩惱，三不五時嘛會講話共我安慰佮褒嗦，講著「查埔的大甲二五，查某的大甲大肚」、「毋管是躼抑是矮，攏是阿
母的心肝仔寶貝」、「查某囝仔人，好女德、有內才，免驚的e無人愛。」阿母嘛毋是干焦咧講好聽的，斟酌想起來嘛有影，本姑娘今年
才十四，未二五，嘛無大肚，凡勢另--日--仔會躼甲一百七十五，媠甲袂輸咧行路。
對今仔日起，我袂閣怨嘆家己矮，上加後擺加穿兩雙仔懸踏鞋。袂閣食飽換枵傷過閒，煩惱一寡有--的無--的予家己心肝凝。人生的
過程，逐个坎站攏有無仝的煩惱，萬項代誌若攏欲掛意，按怎嘛煩惱袂直。時到時擔當，無米才煮番薯湯，管待伊啥物「小姑欲嫁無嫁
粧、小叔欲娶無眠床」，煩惱伊啥物「天袂光、鴨無卵」，橫直咱囡仔人，食予飽、穿予燒、睏予落眠，按呢，較緊天光啦！
(以上由郭永鏜老師撰寫，李旻格同學演說)