2. jarduera: Materiala lortu eta talde bakoitzaren kokapena mapa gainean zehaztu

2. jarduera: Materiala lortu eta talde bakoitzaren kokapena mapa gainean zehaztu

Atazaren deskribapenean datorren moduan, talde bakoitza dagoeneko banatuko zineten bi bikoteetan, katxarreroak eta saltseroak. Jarduera honetan zeregin desberdinak izango dituzue bikote bakoitzak. Arreta ipini zuen lanean, izan ere, aurrera jarraitzeko derrigorrezkoa izango da bikote batak zein besteak bere lana txukun egitea.

A) Katxarreroak: materiala lortu

Talde desberdinetako katxarrero guztiek bilkura berezia burutuko duzue erabiliko duzuen materiala nork, nondik eta zer kostuan lortuko duzuen erabakitzeko. Proiektua gauzatzeko beharrezkoa duzuen materiala baliabideen orrian daukazue zerrendatuta. Materiala lortzerakoan azpiko irizpide biak jarraitzea eskatzen zaizue:

• • Dagoeneko etxean edo beste edozein lekuan duzuen materiala berrerabili.

  • Derrigorrez erosi beharko duzuen materialaren ezaugarriak/prezio aldagaiak ondo aztertu, jarraian ikastolako administrazioan aurrekontu bat aurkezteko.

Goiko irizpide horiek benetan bete daitezen, baliabideen lorpena eta material eskaerak talde bakoitzak bere aldetik egin beharrean, guztiok  elkarrekin analisi global bat egitea eskatzen zaizue. Analisi horretan laguntzeko, azpian ematen zaizkizue jarraibide batzuk:

1) CHECKLIST HANDI BAT PRESTATU

Marraz ezazue taula handi bat horretarako nahiago duzuen baliabidea erabiliz (arbel zuri handi bat, ordenagailu eta proiektorea, muralak egiteko orri zati handi bat...) Lehenengo zutabean materiala zerrendatzea gomendatzen zaizue eta talde bakoitzeko zutabe bana gehitu. Prestatutako taularen gelaxka bakoitzean, materiala nork lortuko duen eta noizko lortuko duen idatzi beharko duzue. Aurretik erabilitako materiala lortzerik ez badago, gelaxka horietan "Erosteko" idatzi.

2) BERRERABILITAKO MATERIALARI LEHENTASUNA EMAN

Zerrendako material asko etxean izango duzue. Horrela ez denean, zuetako norbaitek ziurrenik jakingo nondik lortu (zuen ezagunen batek eduki dezake, adibidez). Etxean edo kalean galdetu, kontsultatu, bilatu... ipurdia mugitu! Aurrekontuan ahalik eta material gutxien sartzea da helburua.

3) EROSI BEHARREKO MATERIALA KUANTIFIKATU

"Erosteko" bezala identifikatu duzuen materialaren prezioa galdetu aurretik, bakoitzetik beharko duzuena kuantifikatu beharko duzue; zenbat litro, zenbat metro, zenbat unitate.... Guztientzako material nahikoa erosi beharko duzue baina bere neurrian, ondo neurtuta guztia.

4) SALNEURRIAK ZEHAZTU

Aurrekontua isteko erosiko duzuen materialaren prezioa jakitea falta zaizue bakarrik. Aztertu non erosiko duzuen materiala eta zein preziotan. Jar zaitezte harremanetan hornitzaile desberdinekin eta behar duzuen materialaren deskribapena eman ondoren, jaso erantzun desberdinak eta hauen kontrastea egin. Horretarako materialaren ezaugarriak baloratu beharko duzue lehenik, prezio/kalitatea erlazioa, materiala ikastolan edukitzeko epea... Ondo aztertu hori guztia!

5) AURREKONTUA PRESTATU

Materiala non erosiko duzuen erabaki ondoren, aurrekontu txiki bat prestatu beharko duzue eta ikastolako administrazioari aurkeztu beharko diozue. Kontutan hartu administrazioaren baimenik gabe ezingo dugula proiektua aurrera atera, beraz, ondo analizatu zer aurkeztuko duzuen. Aurrekontua onartzen bada, hirugarren jarduerarekin jarraitzeko moduan egongo gara.

B) Saltseroak: talde bakoitzaren kokapena zehaztu

Sekuentziaren sarreran azaldu zaizuen moduan, daukazuen erronketako bat Ordizia osoko ortofoto erraldoi bat lortzea da. Beraz, nola edo hala bermatu behar duzue Ordiziako auzo eta kale guztiak agertuko direla argazki horretan. Ulertuko duzuen bezala, argazkiak globoetatik ezingo ditugu edozein modutara atera, burutu beharreko lana aurretik ondo analizatu gabe. Zeregin hori behar bezala burutzeko, bi dira nagusiki kontutan hartu beharko dituzuen aldagaiak:

• • Herriko zein kaletan kokatuko den talde bakoitza, bertatik ateratako argazki guztiekin collage-a egiterakoan, herri osoa jasota gera dadin ahalik eta argazki kopuru txikienarekin.

  • Zein altueraraino igoko den globoa. Kokapenarekin batera, globoek zein altueratatik  atera beharko dituzten argazkiak erabaki beharko duzue. Geroz eta altuago jasotako eremua zabalagoa izango da baina argazkiaren bereizmena txikiagoa izango da. Azalera/bereizmen erlazioa ondo zaindu beharko duzue.

OHARRA: Azpiko kalkuluekin hasi baino lehen kontuz hurrengoarekin: nahi duzuen argazki kamera digitala erabiltzea daukazue. Bereizmen maximoa, argazkien kalitatea eta bestelako aldagaiek ez dute garrantzia berezirik. Ezaugarri bakarra dago kamerak bete beharko duena: ARGAZKIAK MODU JARRAIAN ATERATZEKO FUNTZIOA DUELA EGIAZTATU BEHARKO DUZUE. Gaur egungo kamera gehienek duten funtzioa da (Canon eta Pentax markako guztiek dute funtzio hori, adibidez) Baina batzuk argazki kopuru txiki bat bakarrik ateratzen dute modu horretan; beste batzuk denbora tarte baten ondoren geratu egiten dira. Honetaz gain, memoria txartel zaharrei asko kostatzen zaie jarraiko argazki-sorta horiek gordetzea eta azkenean geratu egiten dira. Azpiko kalkuluekin hasi baino lehen, mesedez, egiaztatu ondo bi alderdi hauek.

Zuen beharretara egokitzen den kamerarekin behin eman ondoren, goiko bi baldintza horiek zehazteari ekingo diozue. Kontutan izan behar duzue argazki kamera modelo bakoitzak optika oso desberdinak dituela. Beraz, azpiko neurketa eta kalkulu guztiak taldeko saltseroek burutu beharko dituzte. Amaieran, datu bilketarekin amaitzen duzuenean, talde guztietako saltseroak elkartu eta bakoitzaren kokapena zein izango den eta globoek hartu beharko duten altuera zenbateko izan beharko den kalkulatu beharko duzue.

1) DISTANTZIA JAKIN BATERA KAMERAK LORTZEN DUEN ARGAZKIAREN ZABALERA NEURTU

Kokatu zuen argazki kamera pareta batetik distantzia jakin batera, eskuineko argazkian ikusten den moduan (kalkuluak errazagoak egiteko, metro batera ipini dezakezue) Kameraren pareko paretan zabal ezazue zinta metrikoa, bere bi muturrak kamerak aterako duen argazkiaren eremutik kanpo gera daitezen. Prest dagoenean, atera iezaiozue argazkia paretan dagoen zinta metrikoari. Kamerak duen pantailan zoom eginez, kalkulatu zenbatekoa den argazkiak jaso duen zinta zatiaren neurria (kameran ondo ikusten ez bada, jaso argazkia ordenagailuan eta begiratu bertan) Horretarako, argazkiaren ezker eta eskuin ertzetan agertzen diren bi balioen arteko kendura kalkulatu beharko duzue. Hortxe daukazue lehen datu garrantzitsua.

2) LORTUTAKO ARGAZKIAREN AZALERA KALKULATU

Kontutan izanik argazki kamera gehienen irudiek 4:3 proportzioa gordetzen dutela, aurreko atalean lortutako zabaleraren balioaren arabera, argazkiaren altuera kalkulatuko duzue (hiruko erregela sinple batekin lor dezakezu balio hori)

Zabalera eta luzera balioak dituzula, argazkiak jasotako paretaren azalera kalkulatu ahalko duzue. Hortxe daukazue lehen datu garrantzitsua: kamerak, jaso nahi den gainazaletik distantzia jakin batera jarritakoan, argazkian grabatzen duen eremuaren azaleraren balioa. 

Errepikatu aldi pare batean aurreko prozesua, ziur egon arte lortutako datuak zuzenak direla.

3) ALTUERA/AZALERA  ETA PIXEL/METRO ERLAZIOAK JASOTZEN DITUEN TAULA OSATU

Aurreko atalean lortutako kameraren altera/ateratako argazkiaren azalera proportzioa aintzat hartuta, osa ezazue azpiko taula. Bertan, proportzio hori erabiliz, globoa altuera desberdinetara dagoenean aterako dituen argazkietan jasoko den lur-gainazal zatiaren azalera jasoko duzue: