1. jarduera: Informazioa iturriak kontsultatu eta lehenengo erabakiak hartu

Prozesua

Egizu klik azpiko esteken gainean jarduera bakoitzaren deskribapen zehatza irakur ahal izateko

1. jarduera: Informazioa iturriak kontsultatu eta lehenengo erabakiak hartu

Zehaztu zaizuen erronka berri honetan lau dira menperatu beharko dituzuen teknika bereziak; hiru software mota desberdinak erabiltzeko modu bereziekin lotuta daude eta azkena, argazkiak ateratzeko teknika bitxi batekin. Konkretuki hauek dira lauak:

• • BALLOON MAPPING: heliozko globo bati lotuta argazki kamera digital batetik lur-gainazaleko ortofotoak edo bideoak lortzeko teknikari deitzen zaio. Argazki edo bideo hauek, kasu gehienetan, kamera modu automatikoan konfiguratuz lortzen dira.

  • LUZERA ETA ZALEREN KALKULUA GMAPS-EKIN: mapak aztertzen ditugunean, erabiltzen dugun bistaren zoom-aren arabera, hauen eskala aldatzen joaten doa. Bista jakin batean gaudenean, Google Maps-en leihoaren azpialdean eta ezkerrean, uneko bistaren eskala agertzen da. Printzipioz datu horrekin gai izango ginateke maparen gainean zehaztutako distantzia (edo eremu) baten neurria gutxi gorabehera ezagutzeko. Gure kasuan, Google-en mapak erabiliz, neurri hauek modu zehatz eta azkarrean kalkulatzen dituzten aplikazioak erabiliko ditugu.

  • MAPKNITTER: globoekin ateratako argazki bildumarekin, Ordiziako irudi osoa lortzeko beharrezkoa da hauekin "collage" bat sortzea; alegia, argazki txiki guzti hauek modu egokian konbinatuz, aukeratuko dugun Ordiziako eremu jakin bateko irudi handi bat lortuko dugu. Horixe da, hain zuzen ere, MapKnitter-ek egiten duena.

  • TILT SHIFT: horrelaxe deitzen zaio argazki edo bideoak digitalki ukitzeko teknika berezi bati. Teknika berezi honekin argazki eta bideo digitaletan halako desfokuratze berezi bat sortzen da, emaitzari maketa edo "jostailu" efektu original bat eskainiz. Efektua bereziki interesgarria izaten da altuera handietatik ateratako irudi edo bideoetan erabiltzeko.

Gehienontzat pentsatzen dut goiko teknika horiek guztiak nahiko arrotzak izango direla. Horregatik, lanean hasi aurretik ezinbestekoa da hauetako bakoitzaren inguruko informazioa kontsultatzea, bakoitza zertan datzan ondo ezagutzeko. Teknikaren oinarriak ondo ulertzea bezain garrantzitsua izango da hauekin praktikatzea, azken egunean topatuko ditugun aldagai berdinekin saiakera desberdinak eginez.

Oraingo honetan kontsultatu beharreko informazio iturriak azpiko zerrendetan aurkituko dituzue. Oinarrizko informazio horretaz gain, lagungarriak (ez du balio edozein informazio; zuentzat ulergarria izan behar du eta eduki esanguratsua jaso behar du) diren beste iturri batzuk aurkitzen badituzue, gorde itzazue gero taldekideei aurkeztu ahal izateko.

Aurrera jarraitu aurretik ohar bat.

Normalean informazioa kontsultatzeko prestatutako jarduera mota hauei ez diezue behar heineko garrantzirik ematen. Baina esperientziak dio aurre-ezagutzarik gabeko proiektu gehienek porrot egiten dutela gehienetan. Gauza bat garbi izan behar duzue: materiala eta denbora mugatua duzue proiektu honetan. Ez dago gaizki planifikatu eta garatutako proiektuak behin eta berriro errepikatzen ibiltzeko aukerarik. Beraz, hartu ezazue denbora azpiko iturriak ondo irakurri, ulertu eta zuen artean eztabaidatzeko, horixe izango baita arrakastarako DERRIGORREZKO baldintza!