Даследчая дзейнасць

Наш музей з'яўляецца даследчыцкай лабараторыяй па вывучэнню працэсаў урбанізацыі, гарадской мінуўшчыны Беларусі праз прызму мікрагісторыі: на прыкладзе мікрараёна горада Гродна “Дзевятоўка”. 

    На базе музея фарміруюцца і развіваюцца даследчыя кампетэнцыі вучняў, а таксама шліфуецца даследчае і педагагічнае майстэрства настаўнікаў. Гэта пацвярджаюць нашы поспехі на  раённых, гарадскіх, абласных, рэспубліканскіх і міжнародных вучнёўскіх навуковых мерапрыемствах, дзе прадстаўляюцца вынікі нашых даследаванняў. Пяць нашых гімназістаў (Карнейчук Кацярына, Багдзевіч Павел, Іода Кірыл, Гулевіч Валерый, Герасюк Аляксей) у выніку перамог на рэспубліканскай канферэнцыі (конкурсе) даследчых работ сталі лаўрэатамі спецыяльнага фонда Прэзідэнта Рэспублікі Беларусь па сацыяльнай падтрымцы адоранай моладзі.

  Адно з нашых нядаўніх навуковых адкрыццяў звязана з даследаваннем старажытных фібул (металічных засцежак для адзення, якія адначасова служылі упрыгожваннем). У музеі захоўваюцца, як нам падавалася, два бронзавых фрагмента фібул, якія датуюцца IV ст. У іх атрыбутацыі нам аказвалі дапамогу навуковыя супрацоўнікі Гродзенскага дзяржаўнага гісторыка-археалагічнага музея. Аднак пры больш дасканалым вывучэнні гэтых прадметаў аказалася, што адзін з гэтых фрагментаў з’яўляецца касметычным пінцэтам. Зрабіць гэта адкрыццё нам дапамагла Аксана Радзікевіч, студэнтка 2 курса ГрДУ імя Янкі Купалы спецыяльнасці “археалогія”, якая выконвае курсавую работу на тэму “Фібулы насельніцтва жалезнага веку на тэрыторыі Гродзенскага і Ваўкавыскага ўзвышша”. Аксана праходзіла педагагічную практыку на базе нашай гімназіі і, наведаўшы нашу экспазіцыю, зацікавілася фрагментамі фібул, экспануемымі ў музеі. Яна, а таксама яе навуковы кіраўнік – старшы выкладчык кафедры гісторыі Беларусі, археалогіі і спецыяльных гістарычных дысцыплін Аляксандр Гаршкоў – падказалі нам сапраўднае прызначэнне адной з іх – медыцына і касметалогія.

 Мал. 1 Прадметы познерымскага перыяду – пачатку эпохі Вялікага перасялення народаў з музея гімназіі №6 г.Гродна. 1 – фібула, 2 – пінцэт.