Дуслары - дус, ишләре - иш иде
Әле кичә генә дөньяда.
Исем тапмыйм бүген берсенә дә,
Әверелеп җансыз кыяга,
Басып торам кыл уртада -
Алар
Әйләнә дә, никтер тулгана,
Керфек күтәреп бер карасам да,
Төсләреннән күңел болгана.
Җавап көткән кебек соравына,
Тора алар... аннан дәшәләр...
Күз алдымда бары - теткәләнеп,
Сәләмәгә калган рәшәләр.
Дуслары - дус, ишләре - иш иде.
Ярлары да - бераз яр сыман.
Исем тапмыйм бүген.
Берсенә дә.
Барысын да - бердәй ятсынам.