〈狐狸摎花貓〉

（客語海陸腔）

烏雲遮著月光華，山路濛煙暗冬冬，變身人客个狐狸攔下計程車。

「麻煩神仙餐廳！」矮墩墩个狐狸講。

聽到神仙餐廳，司機心跳差點恬忒，聽滿庄人講，神仙餐廳只有做仙个人才找得到，毋知有影無？

「這駁仔人客愛去老阿婆的香氣茶館。」司機照實講。

「好！改去茶館！」狐狸馬上變面。

斷烏後，佢兜捩捩轉，找不到位所，循著香氣才找到該間茶館。

「承蒙你！」狐狸出聲講。

司機轉頭一看，坐後背个人客不見咧，座位留下一皮葉仔。

原來狐狸係神仙餐廳个頭家。佢時常下山買食鹽，不管麼个山珍海味，總愛添加一息息，味緒鼻著實在香。毋過，一个知總个老阿婆打開窗門，收集這兜味緒放茶罐來賣，香氣的功效可比青草茶退火，鼻著身體康健。

最後狐狸打探到香味飄到哪位，決定尋老阿婆討公道。

「哼，這个賊婆！」

佢來到老阿婆个屋下，發現無窗門，乜無凳仔。眠床頂只有肚枵个嬰兒仔緊噭。狐狸不忍心，遽遽餵嬰兒仔食奶，扮鬼面弄佢笑，該嬰兒仔笑到目眉彎彎，當得人惜。

老阿婆轉屋下，看到啄目睡个狐狸，上前彎腰，「實在失禮，沒東西招待你，請等一下。」

佢見老阿婆站菜園脣，戴笠嫲拍手跳舞，地泥漸漸冒出綠豆芽。老阿婆摘下來還禮，分狐狸帶轉去。

「下擺正來尞。」老阿婆盡細義。

這豆芽咬起來脆脆甜甜，狐狸當歡喜，添加一息鹽就當好食，嗄毋記得討公道。豆芽食忒以後，狐狸歸日想食，乜想拿來做招牌菜。

天甫光，狐狸就去尋老阿婆，「請教仰般種豆芽菜？」

「教你做得，但你做毋得問做麼个。」老阿婆開出條件。

「細事一樁，無問題。」狐狸滿口答應。

老阿婆一面澆水，一面唱歌：「當愛噭，當愛笑，貓子打孔竅。」

「歌詞麼个意思？」狐狸在心肝肚念了好幾遍。

雖然老阿婆教狐狸跳豆芽菜舞，但係豆芽種別个所在，就毋會生筍。狐狸只好逐日來茶館，摎嬰兒仔作伴。

有一擺發風搓，山路崩忒，尋無食物。狐狸擔心老阿婆个安全，遽遽去看望。果然，豆芽菜全部被大水沖走了。屋肚个嬰兒仔噭大嫲聲，噭到喉嗹發炎。該位老阿婆親像耳空聾聾聽毋到，手腳摸著透心涼。

原來老阿婆過身咧，留下一張遺書，講佢早知日子無幾長，怕嬰兒仔沒人照顧，希望狐狸看顧嬰兒仔長大。

狐狸遵照吩咐，摎嬰兒仔共下生活。日仔過當遽。嬰兒仔當愛噭，長大以後當愛笑，摎狐狸共樣尾翹翹。灶下个魚仔有萋無萋，騙毋過佢个鼻空。雖然細人仔有長處，乜有短處。這細人仔常透說大話，撩人客講：「屋下个菜係神仙種个，食忒會長命百歲。」

人客看該樣菜，「明明係普通个豆芽菜！」

細人仔學狐狸講話膨風，狐狸才知當見笑。這下人客全毋信佢講个話，認為頭家毋老實。

「這細人仔不像老阿婆，乜不像人，到底像麼儕？」狐狸納悶。

吂晝頭，餐廳生理毋好，狐狸乜無精神。灶下走出來一隻老鼠偷食菜。旁脣个細人仔露出尖牙利爪，眨一下目，就捉到咧。實在狐狸莫笑貓。

這下，狐狸正知佢養育了一隻貓子，該位老阿婆係一隻貓嫲。

狐狸請貓子過來，講佢應該獨立謀生，因為「狐狸」做毋得摎「花貓」共下，做生理毋好『狐狸花貓』。

貓子謝過狐狸个恩情，但係手藝半鹹淡，逐日追老鼠捩捩轉，等老鼠捉空空，貓子始枵肚屎。狐狸心愁佢愛仰般生活，打算教佢做生理个本事。

「你尋鬧熱个街路租店面，撩窗門打開來，等香氣入來，拿袋仔裝淰淰。」狐狸指示簡單个方法。

貓子照實去做，毋過袋仔輒輒爛洞，貓子懶尸入香氣，拿自家个屁替換。

結果臭肉惹烏蠅，換來人客拳打腳踢，貓子仆地求饒：「下擺毋敢咧。」

從此以後，貓子老實做生理，毋做壞花貓仔。

狐狸心肝肚想，「毋知恁樣教，老阿婆有欣慰嘸？」

聽講滿樹白花簇簇个時節，老阿婆總係企在門脣笑連連，菜園肚个豆芽當遽又生出來了。獲得人客信賴个神仙餐廳跟貓子分店，生理乜緊來緊好，淰山香氣紛飛，人潮毋斷。

（終）

（2021客家兒童文學獎 童話佳作）