A Neda de hoxe ten 23,8 quilómetros cadrados divididos en catro parroquias: San Pedro de Anca, Santa María, San Nicolás e Santo André de Viladonelle. Pertencemos á provincia da Coruña e á comarca de Ferrolterra e, segundo os últimos datos oficiais, somos 5.112 habitantes.

Na actualidade sabemos cales son os límites do noso Concello, marcados en parte polos ríos Xubia, Castro e Belelle. Sabemos que ao outro lado da ría está Narón -con quen lindamos ao norte- que ao sur temos Fene, que ao surleste tocamos un chisquiño coa Capela e que polo leste, ao outro lado da Louseira, temos San Sadurniño.

Pero antigamente, hai centos e milleiros de anos, non había esas divisións do territorio. Nin sequera Neda se chamaba Neda, aínda que diso falaremos un pouco máis adiante. Agora o que queremos saber é onde comeza a nosa historia, quen eran os nosos antepasados, os pobos máis antigos que viviron aquí antes ca nós.