მიწის ნაკვეთის კატეგორიები და მათი შეცვლის პროცედურა

საქართველოს კანონმდებლობის მიხედვით მიწის ნაკვეთები იყოფა ორ კატეგორიად: სასოფლო სამეურნეოდ და არასასოფლო სამეურნეოდ. დეტალურად კი, სასოფლო სამეურნეო კატეგორიის მქონე მიწის ნაკვეთი არის: საძოვარი, სათიბი, სახნავი (მრავალწლიანი ნარგავებით დაკავებული, საბაღე, საბოსტნე) და საკარმიდამო მიწის ნაკვეთი. ხოლო, არასასოფლო სამეურნეო მიწა არის ყველა ის მიწის ნაკვეთი, რომელიც არ მიეკუთვნება სასოფლოს-სამეურნეო მიწის კატეგორიას.

თუ თქვენ გინდათ მიწის ნაკვეთის კატეგორიის შეცვლა, აუცილებლად უნდა იცოდეთ რა პროცედურებთან არის ეს დაკავშირებული და გაითვალისწინოთ. პირველ რიგში, მიწის მიზნობრივი დანიშნულების შეცვლაზე საკითხი დასმის უფლება აქვს: ფიზიკურ ან იურიდიულ პირს, ფიზიკურ პირად ითვლება საქართველოს ან უცხო ქვეყნის მოქალაქე და ასევე მოქალაქეობის არმქონე პირი, ხოლო იურიდიული პირია განსაზღვრული მიზნის მისაღწევად შექმნილი საკუთარი ქონების მქონე ორგანიზებული წარმონაქმნი, რომელიც თავისი ქონებით დამოუკიდებლად აგებს პასუხს და საკუთარი სახელით იძენს უფლებებსა და მოვალეობებს, დებს გარიგებებს.

კერძო საკუთრებაში არსებული მიწების კატეგორიის ცვლილება

როდესაც გადაწყვეტთ შეცვალოთ თქვენ საკუთრებაში არსებული მიწის ნაკვეთის კატეგორია თქვენ დაგჭირდებათ დოკუმენტები, რომლითაც შეგიძლიათ მიხვიდეთ ნებისმიერ იუსტიციის სახლსა თუ მის ფილიალში, აირჩიოთ სივრცე საჯარო რეესტრის მიმართულებით და ჩააბაროთ განცხადება, რომლითაც მოთხოვნილი იქნება მიწის ნაკვეთის კატეგორიის ცვლილება. აღნიშნულ საქმეზე გადაწყვეტილებას იღებს საქართველოს გარემოს დაცვისა და ბუნებრივი რესურსების სამინისტრო. თქვენ ამისთვის დაგჭირდებათ შემდეგი დოკუმენტაცია: განცხადება, სადაც დაწერილი გექნებათ შესაცვლელი მიწის ნაკვეთის მისამართი, ფართობი, საკუთრება და რომელ კატეგორიად გინდათ რომ შეიცვალოს აღნიშნული მიწა. უნდა გქონდეთ საკუთრების დამადასტურებელი დოკუმენტი, ასევე ცნობა, განცხადებაში აღნიშნული დანიშნულება შესაცვლელი სასოფლო-სამეურნეო მიწის ნაკვეთის კატეგორიის თაობაზე, განცხადებაში აღნიშნული დანიშნულება შესაცვლელი სასოფლო-სამეურნეო მიწის ნაკვეთის სავარგულის კატეგორიის თაობაზე და ბოლოს თანხის გადახდის დამადასტურებელი დოკუმენტი. სტანდარტულად 4 სამუშაო დღეში ცვლილების რეგისტრაციის საფასურია 150 ლარი, არის დაჩქარებული მომსახურებაც, რომლის საფასურია 1 სამუშაო დღეში 270 ლარი, ხოლო იმავე დღეს – 350 ლარი. თუმცა აღნიშნულ შემთხვევაში დაჩქარება მიზანშეწონილი არ არის, რადგან აღნიშნული განცხადება ეგზავნება კომისიას და კომისია განიხილავს, რასაც დრო სჭირდება. იმ შემთხვევაში თუ მიწა თანასაკუთრებაშია, აუცილებელია ყველა მესაკუთრემ გამოხატოს თანხმობა ცვლილებასთან დაკავშირებით.

თვითმმართველობის საკუთრებაში არსებული მიწების კატეგორიის ცვლილება 

განსხვავებული მიდგომაა ადგილობრივი თვითმმართველობის საკუთრებაში არსებული მიწებისათვის, ამისთვის საჭიროა: ადგილობრივი თვითმმართველობის აღმასრულებელი ორგანოს განაცხადი, სადაც უნდა აღინიშნოს მიზნობრივი დანიშნულების შესაცვლელი მიწის ნაკვეთის ადგილმდებარეობა, საკუთრება, ფართობი, მიზნობრივი დანიშნულება და სავარგულის კატეგორია, ადგილობრივი თვითმმართველობის წარმომადგენლობითი ორგანოს გადაწყვეტილება, მიწის საკუთრების დამადასტურებელი დოკუმენტი და  საქართველოს კულტურის, ძეგლთა დაცვისა და სპორტის სამინისტროს თანხმობა.

სახელმწიფო საკუთრებაში არსებული მიწების კატეგორიის ცვლილება 

იმ შემთხვევაში თუ სახელმწიფო საკუთრებაში არსებული მიწებისათვის ხდება კატეგორიის ცვლილება საჭიროა: საქართველოს ეკონომიკური განვითარების სამინისტროს მომართვა/გადაწყვეტილება, მიწის საკუთრების დამადასტურებელი დოკუმენტი, საქართველოს კულტურის, ძეგლთა დაცვისა და სპორტის სამინისტროს თანხმობა.

წყარო: https://miwebi.ge/miwis-nakvetis-kategoriebi-da-mati-shecvlis-procedura/