వేమన స్తుతి
అర్ధవంతమయిన పద్యంబు ఒక్కటి
చెప్పుటెంతొ కష్టమెవనికైన
అట్టి పద్యములను ఎన్నెన్నొ చెప్పిన
వేమనెంత గొప్ప తెలుగు వాడొ
ఒకటి రెండు కాదు పదుల వేల లలోన
పద్యములను చెప్పె పరమ గురుడు
వేరు మార్గమేల వేమనొక్కడె చాలు
భక్తికైన గాని ముక్తి కైన
ముక్తి బాట తెలిపె మురిపతొ వేమన
చదువవేర అతని పద్యములను
ఇంతకంటె సులువు వేరొకటుండునా
చదువుకున్న నీదు కర్మమనుకొ
మంచి మాట లెన్నొ మనమీద ప్రేమతొ
అప్ప గించె వేమనద్భుతముగ
తప్పకుండ చదువు ఆతని తత్వముల్
తెలుగు వాడిననుచు తిరుగు వాడ
మనకు తెలియకుండ మనలోన దాగున్న
తప్పులను తరిమెడి గొప్ప గుణము
వేమ పద్యములలొ విరివిగా కనిపించు
తప్పక చదువతని తత్వములను
భక్తి అనగ ఏదొ ముక్తిమార్గము ఏదొ
మలఁగు టెట్లొ తోటి మనిషి తోడ
అన్ని విషయములను అందించె వేమన
హృద్య మైన తెలుగు పద్యములతొ
వేమనెరుగ పరిచె వేదాల సారము
బుడతడైన గాని ఎరుగు నట్లు
ఋణములెట్లు తీరు ఋషులైన వారివి
ఆచరించ వలెను వారి మాట
కనుల గప్పియున్న మదమెల్ల తొలగించె
తనదు పద్యములతొ తత్వ వేత్త
తెలుగునైతి గాని తెలియకపోతినే
వేమ పద్యములను ఇన్ని నాళ్ళు
గుణములొకటి గాదె గణియించి చూడగ
వజ్రమునకు వేమ పద్యమునకు
విలువ తగ్గ కుండు ఏళ్ళెన్ని గడచినా
వజ్రమైన వేమ పద్యమైన
పట్టుదలను పూని పదినాళ్ళు రాసిన
చచ్చినట్లు వచ్చు ఛందమంత
అభ్యసించి చూడు అబ్బు నిలను అన్ని
వేమ నిదియెచెప్పె వేరు గాను
పూజ లెన్నొ జరిపి పుణ్యాలు చేసినా
తమము తొలగ బోదు తనువు వీడి
తన్ను తాలొ చూడ తమముండబోదని
తెలిపె వేమ గురుడు తొలుత ఇలను
కంద పద్యమెంత అందమై యున్ననూ
చెప్పినాడె వేమ ఎన్నడైన?
తాను పట్టుకున్న ఆటవెలది లోన
ఏల రాసి నాడొ వేలకొలది?