పని, ఫలితం, మరియు ముక్తి
ముఖ్య మైన పనులు ముట్టుకోము మనము
ముందరున్న గాని ఎందు వలన
పనికి రాని పనులు పైకెత్తు కొనుటచె
అసలు పనికి మనకు ఎసరు గలుగు
ఊరకుండ లేము ఊపిరి గలనాళ్ళు
ఒప్పుకున్న మనము ఒప్పకున్న
మాట తోడ గాని మనసు తోనైనను
పనులు చేయురెల్ల జనులు ఇలను
పనులు విడిచి బెట్టి ఫలితమ్ము గోరిన
కార్య మగునె ఉత్తి కల్ల గాక
పనులు చేసినపుడె ఫలితంబు వచ్చును
ఎంత వాడికైన ఎప్పుడైన
పనులు తోడ గూడి ఫలితమ్ములుండును
మనిషి తోడ ఉండు మనసు లాగ
మనిషి లేని నాడు మనసు లేనట్లుగా
కర్మ లేక లేదు కర్మ ఫలము
పనిని చేసి నాము ఫలితమ్ము ఏదని
అడుగ రాదు మనము అన్ని నాళ్ళు
విత్తు నాటి నంత వృక్షమ్ము మొలచునా
ఓపికుండ వలెను కొన్ని నాళ్ళు
మనసు ఫలిత మందు మరగి యున్న యెడల
దృష్టి పనుల మీద ఎట్లు నిలుచు
పనులు కావు, రాదు ఫలితమ్ము గూడను
కనుక విడువ వలెను కర్మ ఫలము
పుట్టినపుడె మనకు చుట్టు కొనును కర్మ
ఉండలేము చేయ కుండ పనులు
పనులు చేసి కోరు ఫలితమ్ము మనుజుడు
కోర్కెవలన మరల గొనును జన్మ
పనులు ఫలితములను వలయమును విడచి
ఉండ గలగు వాడె ముక్తు డగును
ముక్తి గోరు వారు ముందాపి మనసును
తమను చూడ వలెను తాలొ తామె