వక్ర తుండమునకు వందనములు చేసి
ఎందరెందరొ ఇల నందముగను
రాసె పద్యములను రత్నాల మాదిరి
వారి నందఱకును వంద నములు
వేలకొలది రాసె వేమన్న పద్యాలు
ఆటవెలది లోన ఆపకుండ
అతని పద్యములను ఆరార చదువుగా
అబ్బె నాకు కూడ ఆటవెలది
గురువు లఘువు రాదు, గుర్తెంచ గణములు
తెలియు నొకటె నాకు తెలుగు భాష
అట్టి నేను రాసె ఆటవెలది లోన
ఇంత కంటె వేరె వింత గలదె
రాయ వచ్చు మనము రేయింబవళ్ళును
వేల వేల కొలది వేగముగను
సంఖ్య పెరిగినంత సంపద పెరుగునా
మంచి పద్యమొకటి మనకు చాలు
శ్రద్ధ పెట్టి చూడ శతకమ్ము నైనను
రాసి చూప వచ్చు రాత్రి లోన
మనసు ఒక్కటి మన అదుపులో ఉండిన
మహిని చూప వచ్చు మహిమలెన్నొ
అల్లినంత పద్యమాశువుగా తాను
అధికుడగునె ఉత్తి అహము గాక
తాను ఇలను లేక తనపద్యముండిన
అప్పుడగును తాను గొప్ప వాడు
పద్యమొచ్చినంత పరమాత్ముడవ్వడు
శాస్త్ర మెరుగ కాడు శాస్వతుండు
విద్యవచ్చినంత విర్ర వీగుటదేల
అన్ని విద్య లవియు అన్నమునకె
భౌతికమ్ము అయిన భౌగోళ మైననూ
శాస్త్రమేది అయిన సత్తువున్న
పలుక వచ్చు మనము పద్య రూపమునందు
తెలుప వచ్చు తేట తెలుగు లోన
కంద పద్యమెంత అందమై యున్ననూ
చెప్పినాడె వేమ ఎన్నడైన?
తాను పట్టుకున్న ఆటవెలది లోన
ఏల రాసి నాడొ వేలకొలది?
ఉన్న ఆయువంత ఊరి పనుల పెట్టి
ముక్తి మార్గమెపుడు ముట్టలేదు
బోడి గొప్ప వల్ల బొందిన దేమిరా
మరణమొకటె మిగిలె శరణమునకు
29-Nov-2018
వేమనగారి పద్యాలు పలుమార్లు చదువుగా నాకూ ఆయనలా ఒక పద్యం రాయాలని అనిపించింది. కానీ ఆయనలా నేను ఎందుకు రాయలేనో చెప్పడానికి వ్రాసినదే ఈ క్రింది పద్యం :)
ఆటవెలది:
ప్రాస తప్పకుండ పదములను లయలో
వేసినంత శర్మ వేమనగునె
గాడిదొకటి వచ్చి ఘనముగా గెంతిన
వెఱ్ఱిదగును కాని గుఱ్ఱమగునె?
ఛందోబద్ధంగా నేను తెలుగులో వ్రాసిన మొదటి పద్యం కూడా ఇదే :D