Bardd, heddychwr, athro, proffwyd a gwrthwynebydd cydwybodol oedd Waldo. Ganwyd ef yn Hwlffordd a bu’n dysgu mewn nifer o ysgolion cynradd y Sir. Roedd yn hoff iawn gan ei ddisgyblion a’r werin bobl, ond yn mynd i drafferthion gyda’r awdurdodau. Aeth i'r carchar am wrthod talu trethi fel protest bwriadol yn erbyn rhyfel. Bu’n byw yn Llandysilio ond roedd yn ffigwr adnabyddus ledled Sir Benfro. Cyhoeddodd gyfrol o gerddi ‘Dail Pren’ yn 1956. Ei hoff gerdd oedd ‘Preseli’. Crëwyd hi tra roedd Waldo yn athro yn Lloegr, mewn ymateb i fwriad y llywodraeth i ddefnyddio y Preselau fel man ymarfer milwrol. Roedd yn teithio o gwmpas Sir Benfro ar gefn beic. Roedd yn byw ‘bywyd gwyrdd’ cyn i bobl y byd ddechrau meddwl am anghenion y ddaear. Roedd yn credu yn gryf mewn cyfartaledd a brawdgarwch.

Roedd Waldo yn rhagweld effeithiau byr a hir dymor Yr Ail Ryfel Byd ar fywyd pobl ar bob cyfandir. Newidiodd bywydau merched, byd technoleg, a’n byd olwg yn fawr iawn. Doedd dim troi nôl - er gwell, er gwaeth. Crëwyd maes awyr RAF yn Nhŷddewi, canolfan storio arfau yn RNAD Trecŵn, moriwyd awyrennau Sunderland yn Noc Penfro a chynhaliwyd profion ffrwydrol yn Rosebush ac ymarferion D Day ar yr arfordir ger Amroth. Bu dynion o Sir Benfro yn brwydro fflamau yn Abertawe adeg Y Blits ac yn cloddio glo gyda’r ‘Bevin Boys’. Daeth aelodau Byddin y Merched o bellter i weithio ar ffermydd ac i dorri gelltydd yn ein sir. Collodd bron pob pentref fechgyn, fel yn y Rhyfel Mawr. Tyfodd y parch at safbwynt heddychwyr yn sgil hyn.

Mae trafod Waldo yn gyfle i ddysgu am bwysigrwydd diogelu heddwch. Gellir trafod gwaith Cymdeithas y Cymod a Llyfr Gwyn Caerfyrddin a’r Deml Heddwch o fewn Cymru, a’r Cenhedloedd Unedig yn fyd eang.