4. A noticia

Presentación

Xornais en galego

A NOTICIA

1. Introdución

A noticia é o xénero xornalístico máis importante. Nunha noticia cóntase un acontecemento de actualidade, que se supón interesante para o público xeral.

Nos xornais as noticias aparecen ordenadas en diferentes seccións nas que se tratan temas determinados: Internacional, Nacional, Local, Economía, Deportes, Cultura…

2. Características

A noticia debe reunir as seguintes características:

• Actualidade: unha noticia debe informar sobre acontecementos que se acaban de producir, anunciar ou descubrir.
• Novidade: o acontecemento que é noticiable non pode ser previamente coñecido.
• Veracidade e obxectividade: a noticia debe ser fiel á realidade que relata.
• Interese público: só e noticia aquilo que poida interesar a un público suficientemente amplo.

3. Estrutura

a. O TITULAR: o titular é un enunciado breve que encabeza a noticia e que presenta a información básica.

En ocasións, o titular pode ir acompañado dun antetítulo ou dun subtítulo que completan o seu titular e van nun corpo de letra máis pequeno.

Os titulares cumpren dúas funcións:

• Ofrecer un resumo do máis importante do contido da noticia.
• Chamar a atención das lectoras e dos lectores. Os titulares son o primeiro que lemos, deben espertar o noso interese para que sigamos lendo o resto da noticia.

Os titulares das noticias poden ser de dous tipos:

• Informativos: resumen a noticia de xeito obxectivo, sen outra intención que a de informar. Ex. Dimite Antón Costa, o adestrador do Raposiños // Os incendios en Galicia arrasaron 49.000 hectáreas
• Expresivos: buscan principalmente chamar a atención dos/as lectores/as. Poden resultar máis subxectivos, incluíndo valoracións do xornal. Tamén poden empregar diferentes xogos de palabras, expresións coloquiais, etc.

b. A ENTRADA: a entrada é un resumo da noticia onde se recolle o esencial do acontecemento, para que quen a lea coñeza o máis importante.

Ás veces pode aparecer destacada cun estilo ou tamaño de letra distinto (xeralmente en cursiva).

Se non aparece destacada, é no primeiro parágrafo onde se recolle o esencial da información facendo que o lector se "enganche" para seguir lendo o resto.

c. O CORPO: No corpo da noticia desenvólvese con detalle o contido da noticia. Nárranse os feitos acontecidos de xeito pormenorizado. Na noticia, os datos ordénanse de maior a menor importancia, é dicir, a información máis relevante aparece ao comezo e a información secundaria, despois.

d. OUTROS ELEMENTOS: Ademais dos titulares, a entrada e o corpo, é habitual que as noticias presenten outros elementos: nome do/a redactor/a, foto e pé de foto, gráficas, hipervínculos, vídeos (nos xornais dixitais)...

4. Contido

A redacción da noticia debe facerse sempre comezando pola información máis relevante e logo concretando os detalles. Para iso hai que redactar de maneira que se vaian contestando seis preguntas (coñecidas como “os seis w”):

• Que pasou?
• Quen foron os protagonistas?
• Cando pasou?
• Onde pasou?
• Por que pasou?
• Como pasou?

Por suposto, as respostas non teñen que ser telegráficas senón que se deben desenvolver debidamente, ofrecendo o maior número de datos posibles. Tamén pode ocorrer que non haxa resposta para todas as preguntas, ou incluso que dúas informacións se superpoñan, haberá que adaptarse en cada caso á información da que se dispoña.

5. Linguaxe empregada

A lingua empregada na redacción da noticia debe ser de fácil comprensión, pois os/as lectores/as son un colectivo amplo formado por persoas de distinto nivel cultural. Para conseguilo terase en conta o seguinte:

• Utilización de léxico común, aínda que non vulgar.
• Utilizar frases curtas e parágrafos breves (de non máis de 4 ou 5 oracións).
• A sintaxe debe ser sinxela: as oracións deben seguir a orde lóxica (suxeito-verbo-complementos) e non introducir demasiadas subordinacións.