Os textos administrativos
Convocatoria
A convocatoria é un texto formal dirixido a unha persoa ou a un grupo para acudir a algunha reunión ou a algún acto. Nela debe figurar o nome da entidade ou da persoa que convoca o acto, a data, hora e lugar en que se vai celebrar e a sinatura. Nas convocatorias de reunión, tamén se debe incluír a orde do día.
Acta
A acta é un documento que serve para recoller os aspectos tratados en calquera reunión que teña un carácter formal: quen asistiu, que se tratou, acordos que se tomaron... Presentan as seguintes partes:
- Asistentes: nomes das persoas que asistiron á reunión
- Encabezamento: ao comezo da acta ponse o lugar, data, hora e o obxecto da reunión.
- Corpo: recóllense as intervencións máis salientables e os acordos tomados.
- Remate: ao final do documento ponse a fórmular de remate e a sinatura.
Regulamento
Un regulamento é un documento no que se fixan regras ou normas de uso e funcionamento (dunha biblioteca, dun centro de ensino, de instalacións deportivas...) que se usa de maneira colectiva. Nel deben aparecer ben detallados todos os aspectos de uso para que a súa utilización sexa o máis práctica posible e non cree problemas de organización.