A diversidade lingüística

Presentación:

Vídeos:

Linguas de Europa:

Fonte: https://normalizach.files.wordpress.com/2011/01/linguaseuropa.jpg

A diversidade lingüística

1. Un mundo de linguas

Na actualidade, fálanse no noso planeta arredor de 5000 linguas diferentes, aínda que só hai uns 200 estados. Polo tanto, o máis habitual no mundo é que os estados sexan plurilingües e non monolingües, é dicir, que neles se fale máis dunha lingua e non unha soa.

Con todo, o reparto de linguas por estado non é equitativo.

• Hai algúns estados (realmente, moi pouquiños) que son monolingües. Ex: Liechtenstein, onde só se fala o alemán.
• O máis xeral é que sexan plurilingües, que neles se falen varias linguas. Ex: Alemaña, onde se fala o alemán, o baixo alemán, o frisón, o dinamarqués, o sorabo e o romaní.

2. Linguas maioritarias e linguas minoritarias

Segundo a porcentaxe de falantes dunha lingua distinguimos entre:

• Lingua minoritaria: é a que ten un menor número de falantes nun territorio determinado.
• Lingua maioritaria: é a que ten un maior número de falantes nun territorio determinado.

Con todo, unha mesma lingua pode ser minoritaria ou maioritaria dependendo do territorio que tomemos como referencia. Así, por exemplo, se tomamos como referencia o conxunto do Estado español, o galego é lingua minoritaria, pero se temos en conta só o territorio de Galicia, o galego é lingua maioritaria; do mesmo xeito, en España, o castelán é lingua maioritaria, mais nos Estados Unidos o castelán é lingua minoritaria.

3. Linguas minorizadas e linguas de prestixio

Unha lingua minorizada é aquela que sofre algún tipo de discriminación ou marxinación con respecto a outra considerada como máis poderosa e idónea para o uso, a que chamamos lingua dominante ou lingua de prestixio. A lingua minorizada ten, polo tanto, un emprego restrinxido: non está presente en todos os ámbitos.

4. A importancia da diversidade lingüística

Hai quen considera a diversidade lingüística como algo negativo, pensando que sería moito máis práctico que só existise unha única lingua para toda a humanidade, para que todas as persoas puidésemos comunicarnos sen problemas… Un mundo cunha única lingua tería quizais vantaxes de comunicación, pero sería un mundo moi aburrido e desde logo moito máis pobre. Ademais de servir para comunicarnos, as linguas tamén son as portadoras de diferentes culturas, con diferentes historias e con diferentes formas de ver o mundo.

Cada lingua supón un modo orixinal e único de describir o mundo, calquera lingua posúe un pequeno tesouro de palabras únicas, orixinais, sen equivalente nin tradución a outros idiomas, conceptos novos ou matices valiosos que se perden sen remedio cando algunha variedade lingüística morre. Non debemos esquecer que as linguas son o vehículo do saber e que polo tanto a morte dunha lingua implica a extinción dunha cultura”.

Manuel Núñez Singala