1. Hoekom moet jy Lewensoriëntering in graad 10-12 neem?

LO is 'n verpligte vak, maar met goeie rede! Hier leer jy van jouself in konteks met die wêreld en die samelewing rondom jou. Jy leer om te dink, te evalueer, goeie besluite te neem, gesond te leef en 'n bydraende lid van die samelewing te wees. Die vaardighede wat jy in hierdie vak kan aanleer, is die vaardighede wat nodig is om 'n suksesvolle, gebalanseerde en gesonde individu te wees.

2. Watter studierigtings kan gevolg word met hierdie vak?

LO is nie 'n vak wat in ag geneem word vir keuring vir spesifieke studierigtings nie. Mense wat die vak LO baie geniet, mag wel moontlik belang stel in enige van die volgende rigtings:

• Sielkunde (BA of BSc)

• Maatskaplike werk (BA)

• Opvoedkunde (B.Ed)

• Sosiologie (BA)

• Filosofie (BA)

• Verpleging (B.Curr)

• Politieke en Ekonomiese Wetenskappe (BA)

• Sportwetenskappe (BA of BSc)

3. Watter opwindende loopbane kan jy volg in hierdie vakrigting?

LO is nie 'n vereiste vir spesifieke loopbane nie. Mense wat baie van LO hou, is wel gewoonlik geneig om in die Geesteswetenskappe rigting te studeer en te werk (dit beteken jy hou daarvan om met mense te werk, eerder as met syfers of objekte).

Loopbane wat dus vir jou 'n moontlikheid kan wees:

• Sielkunde of berading

• Onderwys

• Medies (dokter, verpleegster, arbeidsterapie, fisioterapie)

• Sportafrigter

• Regte (advokaat of prokereur)

• Politiek

• Joernalistiek

• Maatskaplike werk

4. Watter onderwerpe word in hierdie vak gedek?

Die volgende temas word in LO gedek:

• Selfontwikkeling

• Die wêreld van werk

• Demokrasie en menseregte

• Liggaamlike oefening (die praktiese komponent van die vak)

• Sosiale- en omgewingsverantwoordelikheid

• Studievaardighede

5. Watter tipe leerder geniet gewoonlik hierdie vak?

Die leerder wat van LO hou, hou van klasgesprekke en vra graag vrae oor die lewe en die mensdom. Dit is 'n leerder wat besef dat mens ook waarde kan kry uit'n vak wat nie noodwendig tel vir Universiteitstoelating nie, maar wat poog om belangrike lewensvaardighede aan leerders te leer.

Die leerder wat hou van sport en buite wees, geniet ook die praktiese komponent van LO baie.

6. Watter tipe assessering word in hierdie vak gedoen?

• Kwartaal 1: Projek en prakties

• Kwartaal 2: Eksamen en prakties

• Kwartaal 3: Geskrewe taak en prakties

• Kwartaal 4: Eksamen en prakties

7. Aanbevelings vir leerders wat hierdie vak wil neem.

Kom met 'n oop gemoed en 'n oop kop. As jy bereid is om te leer, vrae te vra en te wonder, en saam met jou klasmaats interessante gesprekke te voer, gaan jy mal wees oor hierdie vak!