Секогаш бидете со Христа.

Молете се кога можете, не кога вие сакате.

Имајте молитвено правило што дисциплинирано ќе го следите во текот на денот, секој ден.

Кажувајте ја Господовата молитва по неколку пати на ден.

Имајте си кратка молитва која ќе ја повторувате секогаш кога вашиот ум нема да биде зафатен со други нешта.

Понекогаш, кога сте во можност, правете метании кога ќе се молите.

Јадете здрава храна во умерени количини.

Придржувајте се до правилата за постење на Црквата.

Поминете одредено време во тишина секој ден.

Правете милостина често, без да се фалите со неа.

Посетувајте редовно литургии во црква.

Исповедувајте се и причестувајте се редовно.

Не навлегувајте во анализа на помислите што ви предизвикуваат немир. Искоренете ги уште во почетокот.

Откривајте ги и искажувајте ги вашите мисли и чувства редовно на личност од доверба.

Читајте ја Библијата редовно.

Читајте добри книги по малку секој ден.

Изградете заедница со светителите.

Однесувајте се како обична личност.

Бидете љубезни со сите.

Одржувајте го редот и чистотата во вашиот дом.

Во слободно време уживајте во здраво хоби што ве исполнува.

Вежбајте редовно, секој ден.

Живејте го секој дел од денот во свое време.

Бидете присутни во моментот со целиот свој ум додека работите нешто.

Бидете искрени, пред сè со себе си.

Сведочете ја својата вера преку мали нешта и во обични, на изглед небитни секојдневни ситуации.

Изработете ја својата работа, а потоа заборавете ја.

Направете ги најпрвин најтешките и најболните работи.

Соочете се со реалноста.

Бидете благодарни за сè што ви се случува.

Бидете расположени.

Бидете едноставни, прикриени, тивки и незабележливи.

Никогаш не привлекувајте внимание на себе си.

Слушајте ги луѓето кога ви зборуваат.

Бидете будни и внимавајте.

Мислете и зборувајте за нештата не повеќе од потребното.

Кога зборувате, зборувајте едноставно, чисто, јасно и директно.

Избегнувајте фантазии и анализи.

Избегнувајте животински, сексуални нагони, во првиот момент кога ќе се појават кај вас.

Избегнувајте жалење, мрморење и ,,плачење” за тоа колку ви е тешко.

Не се споредувајте со никого.

Не очекувајте и не барајте пофалби или сожалување од никого.

Не судете никому за ништо.

Не обидувајте се да убедите никого за ништо.

Не се бранете и не се оправдувајте себеси.

Единствено Бог нека ве ограничува.

Прифаќајте ги критиките со благодарност, но тестирајте ја нивната издржаност критички.

Давајте совет некому само кога е тоа побарано од вас или пак со служба сте обврзани на тоа.

Не правете нешто за некого, што може и треба да го направи самиот.

Изработете дневен распоред на активности, притоа избегнувајќи жалење и каприци.

Бидете милостиви кон себеси и кон другите.

Немајте никакви очекувања во животот освен да бидете жестоко искушувани до последниот здив.

Насочете се единствено кон Бога и светлината, наместо кон гревот и темнината.

Издржете го судот од вашите недостастоци и гревови смирено, затоа што знаете дека Божјата милост е поголема од вашата огревовеност.

Кога ќе паднете, станете веднаш и почнете одново.

Побарајте помош кога ви е потребна, без страв или срам.

• Слава му на Бога за сè!

• Господе Исусе Христе, Сине Божји, помилуј ме грешниот!

• Господе Исусе Христе, Сине Божји, по молитвите на Твојата Пречиста Мајка, помилуј ме грешниот, најгрешниот од сите луѓе!

• Боже, биди милостив кон мене грешниот!

• 
  

Најпрвин треба да се научиме да го славословуваме нашиот Бог и да Му благодариме за се што прави за нас, а потоа да бараме од Него било што. Ако му се молиме на Бога само кога имаме потреба, наликуваме на добро познати бессловесни, кои се сеќаваат на својот господар само тогаш кога ќе огладнат, па се жалат до небесата. Затоа, духовно сити со Небесниот Леб - Христос и напоени со живата вода на Светиот Дух, да се помолиме вака:

Во името на Отецот и Синот и Светиот Дух, сега и секогаш и во вечни векови. Амин.

Цару небесен, Утешителу, Духу на Вистината, Кој си насекаде и се исполнуваш, ризницо на блага и на живот подателу, дојди и всели се во нас, и очисти не од секаква нечистотија, и спаси ги, Благи, душите наши. Свети Боже, Свети Крепки, Свети бесмртни, помилуј не. (3 пати)

Слава на Отецот и Синот и Светиот Дух, и сега и секогаш и во вечни векови. Амин.

Пресвета Троице помилуј не; Господи, очисти ги гревовите наши; Владико, прости ни ги беззаконијата наши; Свети посети не и исцели ги слабостите наши, заради Името Твое.

Господи помилуј. (3 пати)

Слава на Отецот и Синот и Светиот Дух, и сега и секогаш и во вечни векови. Амин

Оче наш, Кој си на небесата, да се свети името Твое, да дојде царството Твое, да биде волјата Твоја, како на небото така и на земјата. Лебот наш насушен дај ни го денес; и прости ни ги долговите наши како што им ги пропштеваме и ние на нашите должници; и не воведувај не во искушение туку избави не од лукавиот.

Господи помилуј.... (12 пати)

Слава на Отецот и Синот и Светиот Дух, и сега и секогаш и во вечни векови. Амин.

Дојдете да му се поклониме на Царот, нашиот Бог. Дојдете да му се поклониме и да припаднеме кон Христос, Царот, нашиот Бог. Дојдете да му се поклониме и да припаднеме кон Самиот Христос, Царот и Бог наш.

Тропари

Ние, недостојните Твои раби, Господи, благодарни за Твоите големи благодетели што ги пројави кон нас, Те славиме и Те восфалуваме, Те благословуваме и Ти благодариме, ја воспеваме и величаме Твојата добросрдечност и со ропска љубов Ти викаме: Благодетелу и Спасителу наш, слава Тебе!

Слава на Отецот и Синот и Светиот Дух.

Владико Господи, ние, недостојните Твои раби, откако се удостоивме дарум со Твоите благодетели и дарови, сесрдно прибегнуваме кон Тебе, според своите сили благодарност Ти принесуваме и како Благодетел и Творец Те славиме и викаме: Слава Тебе. Боже, прештедар! И сега и секогаш и во вечни векови. Амин.

Богородице, помошнице на христијаните, ценејќи го Твоето застапништво, ние, Твоите раби, со благодарно срце Ти викаме: Радувај се, Пречиста Богородице Дево, и со Твоите молитви секогаш избавувај не од сите беди, Ти, Која си единствена брза застапница!

Молитва 1-ва

Господи Исусе Христе, Боже наш, Боже на секаква благост и милосрдие, Твојата милост е безгранична, а Твоето човекољубие - неизмерна длабочина. Со страв и трепет, како недостојни слуги, Ти принесуваме благодарност со смирение. Те славиме, Те фалиме, Те воспеваме и величаме како наш Господ, Владика и Благодетел. Паѓаме пред Тебе и Ти благодариме за Твоето неизмерно и неискажливо милосрдие. Смирено Ти се молиме, милосрден Господи, и понатаму да ги исполнуваш нашите молби. Милостив Боже, сочувај ја Твојата света Црква и овој град (село) од секакво зло и дарувај ни мир и спокој. Удостој не секогаш да Ти принесуваме благодарност Тебе, на Твојот Беспочетен Отец, на Пресветиот, Благиот и Животворен Твој Дух - во едно суштество прославуваниот Бог наш, секогаш да ги славиме и воспеваме Твоите добрини кон нас. Слава Тебе, Благодетелу наш, во вечни векови. Амин.

Молитва 2-ра

Просвети ги очите мои Христе, Боже мој, Кој си ми ја покажал Твојата прекрасна светлина. Господи мој, Господи, кон годините на мојот живот додај уште години за да можам да се покајам за останатите мои гревови и да го исправам својот живот. Амин. Слава Тебе, Господи Исусе Христе, Сине Божји, Спасителу мој, Надеж моја, Прибежиште мое, Господи мој, што си ми ја покажал светлината, слава Тебе!

Молитва 3-та

Нека е благословен денот и часот во кој мојот Господ Исус Христос се роди заради мене, беше распнат и пострада до смрт. О, Господи, Исусе Христе, Сине Божји, во мојот смртен час прими ја душата на Твојот раб, заради молитвите на Твојата Пречиста Мајка, и на сите Твои светии. Амин. Владико, Господи Исусе Христе, Сине на Живиот Бог, Творецу на небото и на земјата, Спасителу на светот, Упование на целиот свет, прими ги молитвите на недостојниот Твој раб, и исполни ги сите мои добри желби, во името на Отецот и Синот и Светиот Дух. Амин.

Ти благодарам, Господи, за сите Твои добрини кон мене!

Ти благодарам, Господи, и за сите искушенија, страдања и гонења, со кои си ме удостоил!

Ти благодарам за се, Господи. Нека е благословено името Твое, сега и секогаш и во вечни векови.

Достојно е навистина блажена да Те нарекуваме Тебе, Богородице, секогаш блажена и пренепорочна, и Мајка на нашиот Бог. Почесна од Херувимите, и неспореджво пославна од Серафимите, Бога Словото нетлено што Го роди, навистина си Богородица, ние Те величаме. По молитвите на светите Отци наши, Господи Исусе Хрисге, Сине Божји, помилуј не. Амин.

*** По тоа правило можеш да си прочиташ: Псалм 117; Ефес. 5, 8-21 и Лука 17,12 -19, и Житието на денот.

Псалм 117

Праведните се радуваат на победата

1 Славете Го Господа, зашто Тој е добар, зашто милоста Негова е вечна.

2 Нека каже сега домот Израилев, дека е Тој добар, дека милоста Негова е вечна.

3 Нека рече сега домот Аронов, дека е Тој добар, дека милоста Негова е вечна.

4 Нека кажат сега сите, кои се бојат од Господ: дека е Тој добар, дека милоста Негова е вечна.

5 Кога бев на мака, Го повикав Господа и Тој ме услиши и на ширина ме изведе.

6 Господ е мој помошник, нема да се плашам: што може да ми направи човек?

7 Господ ми е помошник: и јас победоносно ќе гледам на непријателите мои.

8 Подобро е да се надевам во Господ, отколку да се надевам во човек.

9 Подобро е да се надеваш во Господ, отколку да се надеваш во кнезови.

10 Сите народи ме опколија, но со името Господово јас ги разбив;

11 ме опседнаа, ме обиколија, но со името Господово јас ги победив.

12 Ме опкружија како пчели околу сотка, па се запалија како оган во трње: со името Господово јас им се противставив.

13 Ме турнаа силно за да паднам, но Господ ми помогна.

14 Господ е крепост моја и сила; Тој стана мое спасение.

15 Глас на радост и на спасение се слуша во домовите на праведните; десницата на Господ дава сила!

16 Десницата Господова ме возвишува, десницата Господова дава сила.

17 Нема да умрам, но ќе живеам и ќе ги разгласувам делата Господови.

18 Господ строго ме казни, но на смрт не ме предаде.

19 Отворете ми ја вратата на правдата: ќе влезам во неа, ќе го прославувам Господ.

20 Ете, тоа е вратата Господова, праведните влегуваат низ неа;

21 ќе Те славам, зашто ме услиши и стана спасение мое.

22 Каменот што го отфрлија ѕидарите, стана камен темелник.

23 Тоа е од Господ, и прекрасно е во очите наши.

24 Ова е денот што го создаде Господ за да се зарадуваме и да се развеселиме во него.

25 О, Господи, спаси! О, Господи, побрзај!

26 Нека е благословен оној, кој оди во името на Господ! Ве благословуваме од домот Господов.

27 Бог е Господ и Тој нè осветлува; образувајте празнична придружба до роговите на жртвеникот.

28 Бог мој си Ти и Тебе ќе Те славам; Бог мој си Ти и Тебе ќе Те превознесувам.

29 Славете Го Господа, зашто Тој е добар, зашто милоста Му е вечна.

Ефес 5, 8-21

8 Вие некогаш бевте темнина, а сега сте светлина во Господ: живејте како деца на светлината!

9 Зашто плодот на светлината се состои во се што е добро, праведно и вистинито -

10 одлучете се за она што Му е мило на Бога!

11 Не учествувајте во бесплодните дела на темнината, туку изобличувајте ги!

12 Зашто за она што го прават скришум, срамно е и да се зборува.

13 А се што е изобличено, светлината го прави јавно; бидејќи се што е јавно, светлина е.

14 Затоа е речено: „Стани ти што спиеш, воскресни од мртвите, и Христос ќе те осветли!”

15 Па така, внимавајте добро како живеете! Не како безумни, туку како мудри;

16 ползувајте го времето, зашто дните се лукави.

17 Затоа немојте да бидете неразумни, туку распознајте што е волјата Божја!

18 И не опивајте се со вино, во него има разврат, но исполнете се со Дух.

19 Разговарајте меѓу себе со псалми и славословија и духовни песни, пеејќи и воспевајќи Го Господ во срцата ваши;

20 благодарејќи Му секогаш за се на Бога и Отецот, во името на нашиот Господ Исус Христос;

21 покорувајте се еден на друг во страхопочит Божја.

Лука 17, 12-19

12 кога влегуваше во едно село, Го сретнаа десет лепрозни и застанаа подалеку,

13 па со силен глас повикаа: „Исусе Учителе, смилувај се!”

14 Штом ги виде, им рече: „Отидете и покажете им се на свештениците!” И тие, уште додека одеа, се очистија.

15 А еден од нив, кога виде дека е излекуван, се врати и Го прослави Бога гласно;

16 и падна ничкум пред нозете Негови, благодарејќи Му. А тој беше Самарјанин.

17 Исус, пак, одговори и рече: „Зар не се излекуваа десетмина? Каде се другите девет?

18 Зарем не се најдоа да се вратат и другите и да Му воздадат слава на Бога, туку само овој туѓинец?” 19 И му рече: „Стани, оди си! Твојата вера те спаси!”

(кога ќе станеш од постела, пред секоја друга работа, измиј се и застани набожно со помисла дека стоиш пред лицето на Бога, прекрсти се и прочитај ги следниве молитви)

Во името на Отецот, и Синот и Светиот Дух. Амин

Постој малку молчејќи, додека не се смират сите твои чувства и потоа направи три поклони, велејќи:

Господи Исусе Христе, Сине Божји, помилуј ме грешниот.

Господи Исусе Христе, Сине Божји, заради молитвите на Твојата Пречиста Мајка и на сите светии, помилуј нè. Амин.

Потоа:

Молитва кон Пресвета Троица

Слава Тебе, Боже наш, слава Тебе.

Цару Небесен, Утешителу, Духу на вистината, Кој си насекаде и сè исполнуваш, ризницо на добрини и делителу на животот, дојди и всели се во нас, и очисти нè од секаква нечистотија и спаси ги, Благи, душите наши!

Свети Боже, свети Крепки, свети Бесмртни, помилуј нè! (Трипати)

Слава на Отецот, и Синот, и Светиот Дух, сега, и секогаш, и во вечни векови! Амин!

Пресвета Троица, помилуј нè. Господи, очисти ги нашите гревови. Владико, прости ги нашите беззаконија. Свети, посети ги и исцели ги нашите слабости, заради Твоето име.

Господи помилуј! (Трипати)

Слава на Отецот, и Синот, и Светиот Дух, сега, секогаш и во вечни векови. Амин.

Отче наш, Кој си на небесата, да се свети името Твое; да дојде царството Твое; да биде волјата Твоја, како на небото, така и на земјата; лебот наш насушен дај ни го денес и прости ни ги долговите наши, како што и ние им ги проштеваме на нашите должници; и не воведувај нè во искушение, но избави нè од лукавиот, зашто Твое е царството, и силата, и славата на Отецот, и Синот, и Светиот Дух, сега, секогаш и во вечни векови. Амин.

Потоа овие

Троични тропари, глас 1

Откако станавме од сон, Ти се поклонуваме, Благи; ангелската песна Ти ја пееме, Силни: Свет, Свет, Свет Си, Боже, по молитвите на Богородица, смилуј се на нас.

Слава на Отецот и синот

Од постела и од сон ме дигна, Господи. Просвети го мојот ум и срцето и отвори ми ја устата, па да Те воспеваме, Света Троице: Свет, Свет, Свет Си, Боже, по молитвите на Богородица, помилуј нè.

И сега и секогаш и во вечни векови. Амин.

Ненадејно ќе дојде Судијата и делата на секого ќе се откријат, но со страв во полноќ извикуваме: Свет, Свет, Свет Си, Боже, по молитвите на Богородица, помилуј нè.

Господи помилуј! (12 пати)

Потоа овaa

Молитвa

Помилуј нè, Господи, помилуј нè, зашто ние грешните немаме никакво друго оправдување. Ти ја пренесуваме оваа утринска молитва како на Владар. Ние во Тебе се надеваме; не биди гневен на нас, туку со своето милосрдие погледни и избави нè од нашите непријатели, зашто Ти си Бог наш, а ние сме Твои луѓе, сите сме дело на Твоите раце и го повикуваме Твоето име, сега, секогаш и во вечни векови. Амин.

Молитва

Благословена Богородице отвори ни ги вратите на милосрдието, за да нè пропаднеме ние кои што се надеваме на Тебе, но со Тебе да се избавиме преку тебе од беди, зашто Ти си спасение на родот христијански. Благословено да си Пресвето и неразделиво Тројство! Те славиме зашто постапуваш со нас по своето милосрдие. Господи, Ти си наш Господ! Колку е убаво Твоето име по целата земја! Слава на Отецот, и Синот, и Светиот Дух, сега, и секогаш, и во вечни векови! Амин.

Молитва

Те сакам, Творецу мој, зашто ме сочува оваа ноќ; Тебе Ти ја посветувам својата работа, душата и телото Ти ги предавам. Ти благодарам за сите добрини, особено што оваа ноќ ме чуваше со милост. Нека денешниов ден биде сè во Твоја чест и слава, сè што ќе мислам и зборувам, сè што ќе работам и страдам!

Молитва

Откако станав од сон, Ти благодарам, Света Троице, зашто поради Твојата голема добрина не се разгневи на мене мрзливиот и грешниот, ниту ме погуби заради моите беззаконија, но се покажа, како и обично, Човекољубив, и кога лежев без надеж, ме крена за да станам рано и да ја прославам Твојата сила. И сега просвети ми ги моите духовни очи, отвори ми ја устата, за да се поучувам со Твоите зборови, да ги разбирам Твоите заповеди, да ја извршувам Твојата волја, да Ти пеам со искрена пофалба и да го прославам Твоето пресвето име – на Отецот, и Синот, и Светиот Дух, сега, секогаш и во вечни векови. Амин.

Молитва

Слава Ти, Цару, Боже, Седржителу, Ти Кој со Својата божествена и човекољубива промисла си ме удостоил мене грешниот и недостојниот да станам од сон и да влезам во Твојот светол ден. Господи, прими го гласот на моите молитви, како и светите умни Твои сили, и дај ми со чисто срце и смирен дух да Ти принесувам пофалба со нечистите мои усни, та јас грешниот да бидам со запалената свеќа на мојата душа во редот со мудрите девојки, славејќи Те Тебе во Отецот и Цветиот Дух, славениот Бог Син. Амин.

Потоа:

Дојдете да се поклониме на нашиот Цар и Бог. Дојдете да се поклониме и да паднеме пред Христа, нашиот Цар и Бог. Дојдете да се поклониме и да паднеме пред самиот Христа, наш Цар и Бог. (три пати)

ПСАЛМ 50

Покајничка молитва

1 Помилуј ме, Боже, поради големата Твоја милост, и заради големата Твоја добрина избриши ги беззаконијата мои.

2 Измиј ме темелно од моето беззаконие и очисти ме од мојот грев,

3 зашто престапите мои ги знам и мојот грев е секогаш пред мене.

4 Против Тебе, само против Тебе згрешив и пред Тебе зло извршив, така што Ти си праведен кога ќе пресудуваш и беспрекорен кога ќе судиш.

5 Ете, грешен сум роден, грешник уште од кога ме зачна мајка ми.

6 Ти ја сакаш вистината во срцето, и внатре во мене ме учиш на мудроста Твоја.

7 Пороси ме со исоп, и ќе бидам чист; измиј ме и ќе бидам побел од снег.

8 Дај ми да чујам радост и веселба, нека се зарадуваат коските што Ти ми ги здроби.

9 Одврати го лицето Свое од гревовите мои и избриши ги сите мои беззаконија.

10 Создај чисто срце во мене, Боже, и нов и прав дух стави во мене.

11 Не отфрлај ме од лицето Свое и Светиот Дух Твој не одземај Го од мене.

12 Врати ми ја радоста на спасението од Тебе и благороден дух зацврсти во мене.

13 Тогаш ќе ги научам престапниците да одат по Твоите патишта, ѝ кон Тебе ќе се обраќаат.

14 Ослободи ме од пролеаната крв, Боже, Боже на моето спасение, и јазикот мој ќе пее за Твоето избавување!

15 Господи, отвори ја устата моја, и устата моја ќе ја објави похвалата Твоја;

16 зашто, жртви не ти се мили, кога би ти принел сепаленици, Ти не би ги примил.

17 Жртвата пред Бога е скрушен дух; срце понизно и смирено Ти, Боже, не отфрлуваш.

18 Господи, направи му добро на Сион, според благоволението Свое, обнови ги ѕидовите ерусалимски.

19 Тогаш ќе Ти бидат угодни жртвите на правдата, вознесувањата и жртвите сепаленици; тогаш на Твојот олтар ќе принесуваат телци.

Симболот на верата

Верувам во единиот Бог Отец, Седржител, Творец на небото и на земјата, на сè видливо и невидливо;

И во Единиот Господ Исус Христос, Син Божји, Кој е роден од Отца пред сите векови, Светлина од Светлина, Бог вистински од Бога вистински роден, нестворен, едносуштен на Отца, преку кого сè станало;

Кој заради нас луѓето и заради нашето спасение слезе од небото и се воплоти од Светиот Дух и Марија Дева и стана човек;

И беше распнат заради нас во времето на Понтијскиот Пилат и страдаше и беше погребан;

И вискресна во третиот ден според Писмото;

И се вознесе на небото и седи оддесно на Отца;

И пак ќе дојде со слава да им суди на живите и на мртвите и Неговото царство не ќе има крај;

И во Светиот Дух, Господ, Кој живот твори, Кој излегува од Отца, на Кого се поклонуваме и Го славиме заедно со Отецот и Синот и Кој говорел пророците;

Во една света, соборна и апостолска Црква;

Исповедувам едно крштение за простување на гревовите;

Го чекам воскресението на мртвите;

И животот во идниот век. Амин!

Потоа:

Молитви прва кон Господа, на свети Макариј Велики

Боже, очисти ме мене грешниот, зашто никогаш не сум направил добро пред Тебе, избави ме од лукавиот; да биде во мене Твојата волја, та неосудено да ја отворам мојата нечиста уста и да го восфалам Твоето свето име, на Отецот, и Синот, и Светиот Дух, сега, секогаш и во вечни векови. Амин.

Молитва втора на истиот Светител

Од сон станав, Спасителу, и Ти принесувам полноќна песна; поклонувајќи се пред Тебе, извикувам: Не давај ми да заспијам во гревовна смрт. Ти, Кој доброволно беше распнат на крстот, крени ме мене што лежам во мрзеливост, побрзај да ме спасиш во бдение и молитва, за да стојам пред Тебе и да Ти се молам. А по ноќниот сон, дај да изгрее во мене безгрешен ден, Христе Боже, и спаси ме!

Молитва трета на истиот Светител

Човекољубив Владико, станав од сон и брзам да дојдам при Тебе и по Твојата милост се трудам да ги извршувам Твоите дела. Ти се молам, помагај ми во секое време и во секоја работа; избави ме од секакво светско зло и од ѓаволски искушенија. Спаси ме и воведи ме во Твоето вечно царство, зашто Ти си мојот Создател, Промислител и Дарител на секакво добро. Во Тебе е сета моја надеж, Тебе Те прославувам сега, секогаш и во вечни векови. Амин.

Молитва четврта на истиот Светител

Господи, со Твојата голема добрина и милост Ти ми помогна мене, на Твојот слуга, да ја поминам оваа ноќ без опасност од секакво непријателско зло. Ти, Владико и Создателу, удостој ме со Твојата вистинска светлина, та со просветено срце да ја извршувам Твојата света волја, сега, секогаш и во вечни векови. Амин.

Молитва петта на истиот Светител

Господи Боже, Седржителу, Кој ја примаш од небесните Твои сили Трисветата песна, прими го и од мене недостојниот Твој слуга ова ноќно пеење, и дај ми во сите години од мојот живот, и во секој час Тебе слава да Ти вознесувам, на Отецот и Синот и Светиот Дух, и сега и секогаш, и во вековите на вековите. Амин!

Молитва шеста, кон Господа на свети Василиј Велики

Господи, Седржителу, Боже на силите и на секое тело, Ти живееш во висините и милосрдно погледнуваш на нас смртните. Ти ги испитуваш срцата и јасно ги знаеш човечките тајни. Ти си беспочетна и вечна светлина, во која нема промена или сенка од измена. Бесмртен Царе, прими ги нашите молитви, што, надевајќи се на Твоето милосрдие, Ти ги принесуваме од нашите нечисти усти. Прости ни ги прегрешенијата што сме ги направиле со дела, зборови и мисли, свесно или несвесно. Очисти нè од секаква нечистотија на телото и духот. Ние, кои го чекаме доаѓањето на светлиот и славен ден на Твојот Единороден Син, Господ и Бог наш Исус Христос, кога ќе дојде во слава, како Судија на сите, за да даде секому според неговите дела; дај ни со бодро срце и трезвена мисла да ја поминеме ноќта на сегашниот живот. Да не бидеме безгрижни и мрзливи, туку да бидеме бодри и работливи, за да нè најдеш подготвени, за да влеземе во радоста на божественото живеалиште на Твојата слава, кај што не престанува гласот на оние што празнуваат и неискажлива е радоста на оние што ја гледаат бескрајната убавина на Твоето лице, зашто Ти си вистинската светлина што го просветува и осветува целиот свет, Тебе Те прославува секое создание во вечни векови. Амин.

Молитва седма, на Свети Василиј Велики

Те благословуваме, вишнии Боже и милостив Господе, Ти што секогаш правиш со нас големи и неискажливи дела. Ти ни даваш сон за успокојување на нашата немоќ и за одмор на нашето преморено тело. Ти благодариме што нè си не погубил поради нашите беззаконија, но се покажа, како и секогаш, човекољубив. Нè крена нас, кои безнадежно лежевме за да ја прославуваме Твојата сила. Затоа се молиме на Твојата бескрајна добрина да ни ги отвориш духовните очи и да го разбудиш нашиот ум од длабокиот сон на мрзливоста. Отовори ја нашата уста и исполни ја со пофалби за Тебе, та да можеме смело да Ти пееме и да Те прославуваме Тебе, Кој си во сè и од сите прославуван Бог и беспочетен Отец, со Твојот Единороден Син и Сèсветиот, благиот и животворниот Твој Дух, сега и секогаш, и во вековите на вековите. Амин!

Молитва осма, кон Пресвета Богородица

Ја воспевам Твојата милост, Богородице, Ти се молам да го просветиш мојот ум. Научи ме да одам право по патот на Христовите заповеди. Окрепи ме за да бидам силен во песната што го прогонува сонот на очајанието. Со Твоите молитви, Богоневесто, одврзи ме од синџирите на гневот. Чувај ме дење и ноќе, прогонувајќи ги непријателите што ме напаѓаат. Ти, Која си Го родила Дарителот на животот, оживи ме мене, умртвениот од страстите. Ти, Која си ја родила светлината што не заоѓа, просвети ја мојата ослепена душа. О, пречудна Палато на Господа, направи ме да бидам дом на божествениот Дух! Ти, Која си Го родила Лекарот, излекувај ги многугодишните страсти на мојата душа. Јас сум понесен од брановите на животната бура. Ти се молам, Мајко Божја, да ме насочиш кон патот на покајанието. Избави ме од вечниот оган и од лошиот пеколен црвец. Не дозволувај да станам радост на бесовите, зашто сум виновен за многу гревови. О, Пречиста Мајко, обнови ме мене пропаднатиот, поради моите безбројни гревови! Помогни ми и моли Го Господарот на сите да отстрани од мене секаква мака. Удостој ме да ја добијам небеската радост со сите светии, Пресвета Дево, послушај го гласот на Твојот недостоен слуга. Давај ми, Пречиста Дево, поток од солзи и измиј ја нечистотијата од мојата душа. Непрекидно Ти принесувам срдечни воздишки - биди милостива, Владичице! Прими ја мојата молитва и принеси ја на милосрдниот Бог. Ти, повисока од ангелите, помогни ми да се издигнам над светските работи. Светоносна небеска Сенице, осени ме со духовна благодат. Кревам раце, Пречиста, и ги отворам моите осквернавени усти, за да Те прославам. Избави ме од душепогубни беди и моли Го сесрдно Христа, Кому припаѓа чест и поклонување, сега, секогаш и во вечни векови. Амин.

Молитва деветта, кон Господа Исуса Христа

Многумилостив Боже мој, Господи Исусе Христе, Ти слезе од небото и се овоплоти за да нè спасиш сите. Ти се молам, Спасителу, спаси ме со благодатта, зашто ако ме спасуваш поради делата, тоа не е благодат и дар, туку повеќе е од долг. О, премилостив Христе, Ти си рекол: Кој верува во Мене ќе биде жив и нема да види смрт во векови. Ако верата во Тебе ги спасува очајаните, ете, јас верувам - спаси ме, зашто Ти си мој Бог и Создател. Прими ја мојата вера место дела, зашто, Боже мој, не ќе најдеш дела во мене што ќе ме оправдаат. Но, верата моја да биде достапна за сè: таа да ме заштити, таа да ме оправда, таа да ме направи учесник на Твојата вечна слава. Слово Божјо, да не ме грабне нечестивиот и да се пофали дека ме украл од Твојата рака и од Твојата ограда. Сакал јас или не сакал, Христе, Спасителу мој, спаси ме, побрзај, загинувам. Ти си Бог мој уште од утробата на мојата мајка. Удостој ме, Господи, да Те засакам сега како што некогаш го засакав самиот грев и пак да отпочнам да Ти служам сесрдно, без мрзливост, Тебе, на мојот Господ и Бог Исус Христос, во сите дни на мојот живот, секогаш и во сите векови. Амин. Од ноќ подранува мојот дух кон Тебе, Боже, зашто Твоите повелби се светлина. Научи нè, Боже, на Твојата правда и на Твоите заповеди. Просвети ги нашите духовни очи, за да не заспиеме во гревовна смрт. Изгони секаков мрак од нашите срца. Озари нè со сонцето на Твојата правда и со печатот на Твојот Свет Дух, запази ги чисти нашите души. Упати ги нашите стапки по патот на мирот. Да дочекаме ново утро и нов ден во радости да Те прославиме со утринските молитви, зашто Твое е царството, силата и славата на Отецот, и Синот, и Светиот Дух, сега, секогаш и во вечни векови. Амин.

Молитва десетта, кон Ангелот чувар

Ангелу свет, ти ја просветуваш мојата несреќна душа, ти се молам, не отстапувај од мене поради мојата невоздржливост. Не дозволувај му на лукавиот демон да владее над мене. Закрепи ја мојата слаба рака и упатувај ја кон спасение. О, свети ангелу Божји, чувару и покровителу на мојата несреќна душа и на моето грешно тело, прости ми сè со што сум те нажалил во сите денови на мојот живот. Ако сум згрешил во изминатата ноќ, закрилувај ме во денешниов ден и запазувај ме од секакво ѓаволско искушение, та со никаков грев да не Го разгневам Бога. Моли се за мене на Господа да ме утврди во страв пред Него и да ме направи достоен слуга на Својата благост. Амин.

Молитва единаесетта, завршна утринска молитва кон Пресвета Богородица

Пресвета Владичице моја, Богородице, со своите свети и семоќни молитви изгони ја од мене, смирениот и бедниот слуга Твој: мрзеливоста, заборавеноста, неразумноста, безредието и сите нечисти, лоши и хулни помисли од моето несреќно срце и од мојот помрачен ум, и угаси го пламенот на моите страсти, бидејќи сум беден и несреќен; избави ме од многуте и горчливи спомени и потфати, и ослободи ме од сите погубни дејствија. Зашто Си благословена од сите родови и Твоето Пречесно Име се слави во вековите на вековите. Амин!

Слава на Отца и Сина и Светиот Дух, и сега и секогаш, и во вековите на вековите. Амин!

Госоди помилиј! (Трипати)

Молитва кон светителот што го славиш или чие име го носиш

Свети Божји угодниче (името на светителот), моли го Бога за мене; јас сесрдно брзам кон Тебе, зашто ти си помошник и молител на мојата душа.

Пофална песна на Пресвета Богородица

Богородице Дево, радувај се, благодатна Марие, Господ е со Тебе! Благословена си Ти меѓу жените и благословен е плодот на Твојата утроба, зашто Ти си Го родила Спасителот на нашите души.

Тропар на чесниот Крст

Спаси ги, Господи, Твоите луѓе и благослови го Твоето наследство; победи на сите православни христијани наши, над противниците дарувај им, пазејќи го со Твојот Крст, Твоето жителство.

Потоа:

Господи Исусе Христе, Сине Божји, заради молитвите на Пречистата Твоја Мајка, преподобните и богоносни отци наши и сите светии, спаси ме грешниот. Амин!

Во името на Отецот, и Синот и Светиот Дух, сега и секогаш и во сите векови. Амин.

Господи, Исусе Христе, Сине Божји, по молитвите на Твојата Пречиста Мајка, на преподобните и богоносни отци наши и на сите светии, помилуј нè. Амин!

Слава Ти, Боже наш, слава Ти.

Цару Небесен, Утешителу, Духу на вистината, Кој си насекаде и сè исполнуваш, Ризницо на добрините и на живот Подателу, дојди и всели се во нас, очисти нè од секаква скверност и спаси ги, Благи, душите наши.

Свети Боже, Свети Крепки, Свети Бесмртни, помилуј нè. (трипати)

Слава на Отецот, и Синот и Светиот Дух; и сега и секогаш и во сите векови. Амин.

Господи помилуј. (трипати)

Слава на Отецот, и Синот и Светиот Дух; и сега и секогаш и во сите векови. Амин.

Оче наш, Кој си на небесата, да се свети името Твое, да дојде Царството Твое, да биде волјата Твоја, како на небото, така и на земјата. Лебот наш насушен дај ни го денес, и прости ни ги долговите наши, како што им ги проштеваме и ние на нашите должници и не воведувај нè во искушение, туку избави нè од лукавиот.

ТРОПАРИ, глас 6:

Помилуј нè, Господи, помилуј нè, зашто никакво оправдување немајќи, ние грешните Ти ја принесуваме оваа молитва како на Владика, помилуј нè!

Слава на Отецот, и Синот и Светиот Дух.

Господи, помилуј нè, на Тебе се надеваме. Не гневи се силно на нас и не споменувај ги нашите беззаконија, туку погледни и сега како Милосрден и избави нè од непријателите наши. Зашто Ти си Бог наш, и ние сме луѓето Твои, сите сме дело на Твоите раце и името Твое го повикуваме.

И сега и секогаш и во сите векови. Амин. Дверите на милосрдието отвори ни ги, благословена Богородице, за да не погинеме ние, кои на тебе се надеваме, туку преку тебе да се избавиме од неволјите, зашто ти си спасение на родот христијански.

Господи помилуј. (трипати)

Молитва кон Бога Отецот

Боже вечен и Цару на секое создание, Ти Кој ме удостои сè до овој час да бидам жив, прости ми ги гревовите што ги сторив денес со дело, со збор или со помисла и очисти ја, Господи, мојата смирена душа од секаква скверност плотска и духовна; дај ми, Господи, сонот во оваа ноќ во мир да ми мине, та станувајќи од скромната постела, во сите денови од мојот живот да му угодувам на Твоето пресвето име и да ги победам телесните и бестелесните непријатели, кои со мене војуваат. Господи, избави ме од суетните помисли што ме осквернуваат и од желбите лукави; зашто Твое е Царството, и силата и славата, на Отецот, и Синот и Светиот Дух, сега и секогаш и во сите векови. Амин.

Молитва кон Господа Исуса Христа

Седржителу, Слово на Отецот, единствен совршен Исусе Христе, поради Твоето големо милосрдие никогаш не одделувај се од мене, слугата Твој, туку секогаш биди во мене. Исусе, добар Пастиру на овците Свои, не предавај ме на змиско роптање, ниту на желба сатанска не оставај ме, зашто во мене има семе на гнилеж. Затоа Господи, препрославен Боже, свет Цару, Исусе Христе, чувај ме во сонот со Незалезната Светлина – Твојот Свет Дух, со Кого ги освети Твоите ученици. Господи, дај ми го и мене, недостојниот Твој слуга, спасението Твое на постелата моја; просвети го мојот ум со светлината на знаењето на Твоето свето Евангелие, душата со љубовта на Твојот крст, срцето со чистотата на Твоето Слово, моето тело со Твоите бестрасни страданија, мојата мисла сочувај ја во Твоето смирение и подигни ме во времето определено за Твое славење; зашто вечно си препорославен со беспочетниот Твој Отец и со Пресветиот Дух. Амин!

Молитва кон Светиот Дух

Господи, Цару небесен, Утешителу, Духу на вистината, покажи го Своето милосрдие кон мене, грешниот Твој слуга, и помилуј ме. Отпушти ме мене недостоојниот и дај ми прошка за сè што денес Ти згрешив како човек, но и полошо од човек – како животно. Прости ми ги моите волни и неволни и несакани, знајни и незнајни гревови, оние од младоста и оние од наука злобна, од избрзување и од бесчувствителност. Ако во Твоето име се колнев, или во своите помисли го похулив; ако некого укорив, или оклеветив во гневот свој, или, пак, го растажив; ако поради нешто се разлутив; ако излажав; ако незгодно спиев; ако сиромав при мене дојде и го презрев; ако братот мој го разжалостив, или се карав; ако некого осудив; ако се возвеличав или возгордеав; ако се разгневив; ако стоејќи на молитва, умот мој по светски лукавства се поколеба, или на разврат помислив; ако се прејадов, или опив; ако безумно се смеев; ако лукавство помислив, или доблест туѓа видов и од неа во срцето бев ранет; ако зборував што не треба, или се потсмевав на гревот на својот брат – моите гревови се безбројни; ако за молитва бев мрзлив, или, пак, некое друго лукавство направив – не се сеќавам; но сето тоа и уште повеќе од тоа сторив. Смилувај се, Создателу, Владико мој, над мене, Твојот мрзлив и недостоен слуга, и остави, отпушти и прости ми како Благ и Човекољубив; за во мир да легнам, да заспијам и отпочинам јас блудниот, грешниот и беден. Ќе се поклонам, ќе го воспеам и ќе го прославам Твоето име, со Отецот и единородниот Син Негов, сега и секогаш и во сите векови. Амин.

Молитва

Господи, Боже наш, сè што згрешив во овој ден, со збор, со дело или мисла, прости ми како Човекољубив. Подари ми сон мирен и безметежен и испрати го Твојот Ангел Пазител, кој ќе ме штити и засолнува од секое зло. Зашто Ти си Заштитник на душите и телата наши и Тебе слава Ти вознесуваме; на Отецот, и Синот и Светиот Дух; сега и секогаш и во сите векови. Амин.

Молитва

Господи, Боже наш, во Кого веруваме, и Чие име над секое име го призиваме; дај ни нам, кои заминуваме на спиење, одмор на душата и телото и сочувај нè од секакво мечтаење и мрачни сласти. Сопри ја навалата на страстите и згасни ги распалените желби телесни. Дај ни целомудрено да поживееме во делата и зборовите, та водејќи добродетелен живот, да не отпаднеме од Твоите ветени добра; зашто си благословен вечно. Амин.

Молитва кон Господа Исуса Христа

Господи, Исусе Христе, Сине Божји, поради молитвите на Твојата Пречиста Мајка, и Твоите бесплотни ангели, заради пророкот, Претечата и Крстителот Твој, богоглаголивите апостоли, светлите и добропобедни маченици, преподобните и богоносни отци, и сите светии – избави ме од сегашните демонски напасти. Да, Господи мој и Создателу, Кој не ја сакаш смртта на грешникот, туку да се обрати и жив да биде, дај ми и мене грешниот и недостојниот обраќање. Оттргни ме од устата на змејот пагубен, кој зинал да ме проголта и во адот жив да ме сведе. Да, Господи мој, Утехо моја, Кој заради мене бедниот во тело пропадливо си се облекол, избави ме од секоја беда и утеха дај ѝ на беднава душа моја. Всади во срцето мое да ги извршувам повелбите Твои, лукавите дела да ги оставам; и да ги добијам блаженствата Твои, зашто на Тебе се надевав, Господи, спаси ме!

Молитва кон Пресвета Богородица

Добра Мајко на добриот Цар, Пречиста и благословена Марие, милоста на Синот твој и Бог наш излеј ја на острастената душа моја, и со твоите молитви упатиме на добри дела, та останатото време од мојот живот беспорочно да го минам и преку тебе рај да добијам, Богородице Дево, единствена чиста и благословена!

Молитва кон светиот Ангел пазител

Ангелу Христов, пазителу мој свет, покровителу на душата и телото мое, прости ми сè што згрешив во денов денешен и од секое лукавство на демонскиот противник избави ме, за да не Го прогневам со никаков гнев мојот Бог; туку моли се за мене грешниот и недостојниот слуга и достоен покажи ме на милоста на Сесвета Троица, на мајката на мојот Господ Исус Христос и на сите светии. Амин!

Богородичен кондак

Тебе, Богородице, поборнице – војвотко, ние, слугите Твои, откако од зло се избавивме, песна пофална Ти воспеваме како кон онаа, која има сила непобедлива; од секоја опасност ослободи нè, за да ти повикуваме: „Радувај се, Невесто Неневестна!“

Преславна Приснодево, Мајко на Христа Бога, принеси ја молитвата наша пред Синот твој и Бог наш, за преку тебе да бидат спасени душите наши.

Сета надеж моја во тебе ја полагам, Мајко Божја, сочувај ме под закрилата твоја.

Богородице Дево, не презирај ме мене грешниот, кому помошта и застапништвото твое му требаат. На тебе се надева душата моја, помилуј ме!

Молитва

Надеж моја е Отецот, прибежиште мое е Синот, покров мој е Духот Свет; Троице света, слава Ти!

Достојно е навистина блажена да те нарекуваме тебе, Богородице, присноблажена и пренепорочна и Мајко на нашиот Бог. Почесна од херувимите и неспоредливо пославна од серафимите, нетлено си Го родила Бога Словото, тебе која си Богородица те величаме.

Слава на Отецот, и Синот и Светиот Дух; и сега и секогаш и во сите векови. Амин.

Господи помилуј. (трипати)

Господи благослови!

Господи, Исусе Христе, Сине Божји, по молитвите на Пречистата Твоја Мајка, преподобните и богоносни отци наши и сите светии, спаси ме мене грешниот!