Благодарствени молитви по Светата причест

Откако ќе се удостоиме со доброто причестување на животворните таинствени дарови, веднаш запеваме, заблагодаруваме многу, и вака топло, од душа му велиме на Бога:

Слава Ти, Боже. Слава Ти, Боже.

Слава Ти, Боже. И веднаш потоа, следниве благодарствени молитви:

Благодарствие од непознат сочинител

Ти благодарам, Господи, Боже мој, што не ме оттурна мене грешниот, туку заедничар да бидам на Светињите Твои ме удостои. Ти благодарам, што ме удостои мене недостојниот да се причестам со Твоите пречисти и небесни дарови. Но, Владико, човекољубче, кој заради нас умре и воскресна, и ни ги подари овие страшни и животворни Твои Тајни, за благодејство и осветување на душите и телата наши, дај овие да ми бидат и мене за исцелување на душата и телото, за одгонување на секој противник, за просветување на очите на срцето мое, за мир на душевните мои сили, за вера непосрамна, за љубов нелицемерна, за исполнување со премудрост, за сочувување на заповедите Твои, за умножување на божествената Твоја благодат и за здобивање на Твоето Царство; та во Светињата Твоја од нив чуван, Твојата благодат да ја паметам секогаш, и веќе да не живеам за себе, туку за Тебе, нашиот Владика и добротвор. И така, излегувајќи од овој живот со надеж на вечниот, да стигнам во вечниот покој, каде што е непрестан гласот на оние што празнуваат, и бескрајна е сладоста на тие што ја гледаат неизречивата добрина на Твоето лице. Зашто Ти си вистинската желба и неизречена веселба на оние што Те љубат, Христе Боже наш, и Тебе Те пее целата творба во вековите. Амин.

Благодарствие од свети василиј велики

Владико Христе, Боже, царе на вековите и творче на сè, Ти благодарам за сите добрини што си ми ги дал, и за причестувањето со пречистите и животворни Твои таинства. Те молам, Тебе, благи и човекољубче, сочувај ме под покривот Твој, и под сенката на крилото Твое, и дарувај ми со чиста совест, до последниот мој здив, достојно да се причестувам со Твоите Светињи, за отпуштање на гревовите и за вечен живот. Зашто, Ти си лебот на животот, изворот на светоста, давател на добрини, и Тебе слава ти вознесуваме, со Отецот и со Светиот Дух, сега и секогаш, и во вековите на вековите. Амин.