Tomas Akinokoa

Tomas Akinikoa, Summa contra gentiles obraren egilea. Irudiaren iturria.

Tomas Akinokoak Pange Lingua himno eukaristikoa idatzi zuen, Corpus Christi kristau jairako, mezatan kantatzeko. Himnoan, kristau doktrinarako funtsezkoak diren gauza asko aipatzen ditu Tomasek: pizkundearen misterioa, Mariaren birjintasuna (bekatuaren orbanik gabekoa), Jainkozko grazia, Azken Afaria... Eta Agustinen testuan tratatzen den zenbait gai ere agertzen da: esaterako, benetako elikagaia ('benetako ogia') Hura Bera (Kristo) dela. Horrez gain, ezagutzeko orduan fedeak zenbateko garrantzia duen ere aipatzen du Akinokoak, bere ikuspuntua argi eta garbi utziz:

Ad firmandum cor sincerum

Sola fides súfficit.

(Nahikoa da fedea bera bakarrik

bihotza egian sendotzeko.)

Bilboko “Mocedades” musika taldeak himno horren bertsio bat grabatu eta kantatu zuen, 1969an. Garai hartan, frankismoaren zentsura indarrean zegoela, Madrilgo apezpikuak debekatu egin zuen kanta Radio Nacionalen ematea, trataera errespetu gabekoa eta erritmoa desegokia zirelakoan. Hala ere, gaur egun, kristau web-orrietan ere topa daiteke Mocedadesen bertsioa, esate baterako hemen.