Përpunimi Parësor i Drurit / Lënda e Sharruar

PËRSHKRIM  I  SHKURTËR 

Moduli është pjesë e programit mësimor për studentët e vitit të dytë, të Ciklit të Parë të Studimeve, Bachelor, në programin e studimit “Inxhinier Përpunim Druri”, duke patur parasysh se sharrimi i trupave është një proçes kryesor, i cili qëndron në themel të industrisë së përpunimit të drurit. 

23 orët e leksioneve formojnë shtyllën për 22 orët e seminareve (praktikave), projektit të kursit dhe të vizitës një ditore në fabrikë, të cilat duhet të zhvillojnë, përmes shëmbujve, njohuritë e marra nga leksionet dhe literatura e rekomanduar, me qëllim për të kuptuar natyrën e prodhimit të lëndës së sharruar.

Gjatë modulit, studenti do të përftojë njohuritë themelore mbi prodhimin e lëndës së sharruar dhe konceptet e projektimit të një fabrike lënde të sharruar. Kriteret e klasifikimit cilësor të lëndës së parë dhe asaj të sharruar do të studiohen duke ju referuar standardeve ISO dhe EN. Pjesët e veçanta të pajisjeve dhe makinerive do të analizohen dhe përshkruhen në kontekstin e sistemit të prodhimit, si edhe në marrëdhënie me makineritë e ndryshme, në respekt të karakteristikave operacionale, kapaciteteve të prodhimit, kërkesave për ruajtjen e lëndës së parë dhe ndikimeve mbi produktin.

Objektivi kryesor i modulit është që të përgatisë studentët për të menaxhuar detyra dhe përgjegjësi të ndryshme, gjatë aktivitetit të prodhimit të lëndës së sharruar. Në përfundim të modulit studenti duhet të jetë i aftë:

1.   të masë dhe klasifikojë trupat dhe lëndën e sharruar sipas standarteve EN;

2.   të konceptojë operacionet dhe të organizojë aktivitetin në të gjithë sektorët e fabrikës;

3.   të përdorë dhe të mirëmbajë pajisjet dhe makineritë e sharrimit;

4.   të llogaritë dhe të regjistrojë parametrat e punimit të pajisjeve, në funksion të intensitetit të punës;

5.   të përzgjedhë teknologjinë dhe modelet e përshtatshme të sharrimit;

6.   të hartojë skema teknologjike dhe të kuptojë vizatimet inxhinierike dhe teknologjike;

7.   të llogaritë rendimentin dhe konsumin specifik të lëndës së parë, si dhe bilançin e prodhimit;

8.     të projektojë një fabrikë moderne të lëndës së sharruar.