Dechreuodd y Rhyfel Byd Cyntaf yn 1914 a daeth i ben yn 1918. Dyma'r tro cyntaf y defnyddiwyd arfau cemegol, a'r tro cyntaf y gollyngwyd bomiau o awyrennau. Roedd yn gyfnod o newidiadau mawr, gan roi terfyn ar yr hen drefn a pharatoi'r ffordd i'r drefn newydd. Yn Sir Benfro, y Llongau-U gafodd yr effaith fwyaf ar gymdeithas. Adeiladwyd nifer o safleoedd gwylio o gwmpas yr arfordir er mwyn tracio eu symudiadau. Mae safleoedd llongddrylliadau hefyd yn frith o gwmpas yr arfordir. Llongddrylliad y Lusitania, (Mai 1915), a fu’n galw’n rheolaidd yn Abergwaun, oedd un o ddigwyddiadau erchyll blwyddyn gyntaf y brwydro. Bu porthladd Aberdaugleddau yn ganolog i weithgareddau y llynges ym Môr yr Iwerydd ar hyd y bedair blynedd.

Chwaraeodd David Lloyd George ran ganolog yn hanes y cyfnod. Mae cysylltiadau ganddo ag ardaloedd ger Hwlffordd ac Wdig.

Gwelodd y cyfnod ddatblygiad yn nhechnoleg ffotograffiaeth ac mae hyn i weld yng nghasgliadau amgueddfeydd y Sir. Gwelir lluniau sawl arwr cyfnod y brwydro a oedd yn enedigol o’r Sir. Gwelir hefyd gweithgareddau disgyblion ysgol i gasglu arian ac adnoddau i helpu’r milwyr a morwyr.

Mae cofeb yn sefyll mewn nifer o bentrefi Sir Benfro, naill ai yn yr eglwys, y capel neu ar wal y neuadd. Codwyd sawl Neuadd Goffa hefyd. Pentref Herbrandston yw’r unig bentref yn y sir sy’n cael ei adnabod fel ‘pentref lwcus’ - h.y. ni chollwyd un o’i meibion adeg y brwydro.