Wrth edrych ar dirlun Sir Benfro heddiw, mae’n anodd credu fod cloddio glo wedi bod mor bwysig yma ar un adeg. Ym 1601, mae George Owen, yr hanesydd o Drefdraeth yn ysgrifennu am faes glo Sir Benfro gan ddweud “…Gellir ystyried glo fel un o brif gynhyrchion ein sir ac mae mor angenrheidiol fel y byddem mewn trallod mawr hebddo." Gorffenwyd mwyngloddio yma yn y 1950au, ac yn awr mae'n anodd dod o hyd i'r ychydig dystiolaeth o'r diwydiant hwn sy'n weddill.

Ym mhentref Lanshipping, ceir cofeb syml ar gyfer pennod drist yn yr hanes. Collwyd 40 o lowyr y ‘Garden Pit’ yn 1844. Roedd 23 ohonynt o dan deunaw oed. Poddi gwnaethant wrth weithio mewn darn o’r pwll a oedd yn ymestyn i wely’r môr. Roedd y to yn fregus oherwydd pwysau’r llanw a daeth y cyfan i lawr ar eu pennau. Gellir trafod rôl plant yn hanes y diwydiant glo yng Nghymru a sut y deddfwyd er mwyn diogelu plant. Gellir cymharu effaith y drychineb hon gydag effaith ‘Cwymp Aberfan, 1966’.

Mae llawer o adnoddau addysgol ar safle ‘Amgueddfa Big Pit’ sydd yn adrodd hanes y diwydiant yn Sir Benfro, yng Nghymru ac ar draws Prydain. Yn yr 1970au roedd dros hanner cant o lofeydd yng Nghymru. Oes glofeydd yn dal i weithredu yng Nghymru heddi? Pam nad yw glo mor bwysig? Beth yw manteision ‘Ynni Gwyrdd’? Beth fedrwch chi ddarganfod am y ‘Ddeddf atal llosgi glo mewn tai 2023.’ Cewch wybodaeth ar safwe Canolfan y Dechnoleg Amgen, Machynlleth. Mae’r Ganolfan wedi bodoli ers degawdau, ac yn ddolen bwysig yn rhwydwaith ymchwil byd ar gyfer ynni hydro, solar, biomas ay