Mae'r pecyn hwn yn adeiladu ar lwyddiant gwaith traws-ranbarthol blaenorol a arweiniodd at greu pecynnau Llyfr Glas Nebo a'r Silff Lyfrau. 

Adnabuwyd yr angen am y pecyn hwn gan athrawon, ac ar y cyd â chynrychiolwyr y consortia addysg rhanbarthol, criw brwd a gweithgar o athrawon fu'n gyfrifol am greu'r pecyn. 

Nodau'r pecyn: 

• Cynnig syniadau newydd i athrawon wrth gyflwyno cerddi TGAU

• Galluogi disgyblion i astudio ac adolygu cerddi TGAU yn annibynnol

• Cynnig arweiniad i rieni a gofalwyr sy'n cefnogi eu plant wrth iddyn nhw baratoi ar gyfer arholiad TGAU Llenyddiaeth Gymraeg

Mae'r pecyn yn adlewyrchu gofynion manyleb TGAU CBAC Llenyddiaeth Gymraeg tra'n cynnig amrywiaeth o brofiadau i ddisgyblion wrth astudio'r cerddi gosod. 

Mae nifer o ddeunyddiau'r pecyn yn enghreifftio ymchwil diweddar yn y meysydd canlynol: 

Pwysigrwydd gwybodaeth gefndirol ac adeiladu sgema

"Mae gwybod am bethau yn helpu dysgwyr i ddysgu mwy o bethau."

"Mae angen i ni wneud cysylltiadau defnyddiol rhwng y pethau cymhleth."

Cyfarwyddyd penodol 

"Mae'n effeithiol ac effeithlon addysgu'r hyn sydd angen ei wybod yn benodol i'r disgybylion."

Damcaniaeth llwyth gwybyddol a cyfyngiadau'r cof gweithredol 

"Ni all dysgwyr ddysgu llawer o bethau newydd ar yr un pryd."

"Mae angen i ni addysgu gydag ymwybyddiaeth o sut mae'r cof yn gweithio a pha mor hawdd yw gorlwytho'r cof â gwybodaeth." 

Saib ac adalw

"Mae angen cynllunio ar gyfer ailymweld â'r hyn sydd angen ei wybod trwy amseru gofalus er mwyn sicrhau bod dysgwyr yn cofio."

Metawybyddiaeth, hunaneffeithiolrwydd a hunanreolaeth

"Mae angen i ddysgwyr ddewis y strategaethau cywir i ddysgu'n llwyddiannus."

"Mae angen i ddysgwyr fagu hyder yn eu gallu i ddysgu a gwybod pethau."

"Mae angen i ddysgwyr ymarfer eu gallu i ganolbwyntio a rheoli eu hemosiynau i ddysgu pethau."

Mae'r cyflwyniad isod yn enghreifftio'r defnydd y gall athrawon a disgyblion ei wneud o'r pecyn hwn 

"Mae'r adnoddau wedi bod yn help mawr i fi astudio cerddi. Weithiau mae'n anodd gwybod lle i ddechrau ond roeddwn i'n hoffi bod y rhannau ar bob cerdd yn fy arwain fi trwy gwestiynau'r papur arholiad. Roeddwn i'n hoffi bod modd gwrando ar y gerdd yn cael ei darllen hefyd achos roedd yn help i fi ddysgu'r cerddi. Mae astudio cerddi yn gallu bod yn waith caled ond roedd llawer o amrywiaeth yma ac roedd hynny'n fy helpu i ddal ati." 

Ffion, Casnewydd 

"Mae helpu fy mhlant i baratoi ar gyfer eu harholiadau yn bwysig iawn i fi ond dydw i ddim yn gwybod sut i helpu bob tro. Meddyg ydw i a gwyddoniaeth oedd fy mhrif ddiddordeb yn yr ysgol. Roedd y wefan yn help wrth gefnogi fy mab ac roeddwn i'n hyderus ei fod e'n canolbwyntio ar y pethau pwysig pan oedd e'n defnyddio'r wefan i adolygu. Dw i'n ffyddiog ei fod e'n fwy parod i adolygu am ei fod e'n gallu gwneud hynny ar y sgrin! Dysgais i dipyn wrth weithio gyda fe hefyd a chawson ni dipyn o hwyl yn rhoi profion i'n gilydd a gwneud rhai o'r tasgau fel dylunio tatŵ er nad yw'r un ohonon ni'n debygol o gael un yn fuan! Roedd yn ffordd hwylus o feddwl am linellau pwysig yn y cerddi." 

Chris, Tregwilym 

"Bu'r adnodd hwn yn gymorth mawr wrth i fi addysgu barddoniaeth TGAU am y tro cyntaf yn ystod y pandemig ac ar ôl hynny. Mae'r deunyddiau ysgogol yn tanio diddordeb dysgwyr a'r ymdriniaeth strwythuredig â'r cerddi yn gymorth wrth iddyn nhw ddysgu'r grefft o ymateb i gerdd. Roedd gallu cyfeirio fy nisgyblion at rannau penodol o'r wefan cyn neu ar ôl gwersi yn hynod ddefnyddiol wrth baratoi i gyflwyno cerdd newydd neu adolygu cerdd gyfarwydd. Rydw i'n credu bod amrywiaeth dda yn y deunyddiau ar y wefan hefyd." 

Bethan, Caerdydd