Xuño
Venres 21 de xuño. Exposición do PDI I.A. Intelixencia artesanal. Fin de curso.
Foi un auténtico pracer ser a profe deste grupo de nenas e nenas tan marabilloso. Despídome moi orgullosa deles e con pena, porque sei que os botarei moito de menos. Síntome moi agradecida por todas as mostras de cariño recibidas hoxe. Grazas familias e grazas nenas e nenos. Desfrutade moito no verán!!
Xoves 20 de xuño
Comezamos a mañá cun enigma científico. Era sobre un chiringuito na praia e as posibilidades de que se bañara máis xente ou menos no mar... Comentamos diferentes hipóteses e finalmente resolvimos e lemos a resposta científica, que tiña que ver co cambio climático e a subida da temperatura das augas.
Realizamos as rutinas da mañá, escribindo a data e repasando a cantiga dos días da semana, meses, series de numeración, muros do 5 e do 10 e abecedario.
Nacho realizou a súa exposición oral sobre que lle gustaría ser de maior. Comentou que lle gustaría ser piloto de avión. Falou de todos os puntos do guión, acompañando as explicacións de fotos proxectadas na pantalla. Ao rematar, puxo un vídeo moi gracioso dos Minions pilotando un avión. Finalmente realizamos a valoración persoal da exposición.
De forma tranquila, realizamos unha mandala con multiplicacións. Mentras, fomos rematando pequenos detalles que quedaron pendientes do PDI (unindo banderillas de papel, ensaiando a exposición oral dos distintos grupos de artesáns, etc.)
Entregamos as fichas de traballo do curso e os cadernos de expresión escrita, club de lectura, matemáticas e filosofía. Quedan na casa e non fai falta traelos para o curso que vén. Ao empezar novo ciclo, comezarán con novos cadernos.
Mércores 19 de xuño
A pregunta científica de hoxe foi: Por que é máis valioso o diamante que o cuarzo? Escoitamos diversas hipóteses que tiñan que ver coa dureza do diamante, con que o cuarzo é un mineral común... e logo lemos a resposta científica, que tiña moito que ver coas hipóteses anteriores.
Escribimos un caligrama sobre as nosas vacacións soñadas. Fixémolo con detalle e ilusión, dado que o tema resultou bastante apetecible a estas alturas de xuño.
O circuito matemático fixémolo na biblio coa profe Rosana, aproveitando os xogos de mesa da mesma.
Logo da hora de ler e do recreo, escribimos na axenda, rematamos o noso caligrama e tamén algunha ficha de mates destes días.
Na última hora, fomos ensaiar co profe Diego o baile de fin de curso, tamén ensaiamos algúns equipos de artesáns as intervencións orais sobre os proxectos de artesanía (para a exposición final do venres).
Martes 18 de xuño
Escoitamos a lectura de tres poemas do libro "Día lebre" que nos prestou Noa.
Sofía Iglesias guiou as rutinas, dicíndonos a data e repasando con todos os días da semana, meses, series de numeración e abecedario. Logo realizou a súa exposición oral sobre o que lle gustaría ser de maior, que no seu caso sería veterinaria. Falou de todos os puntos do guión e ao rematar fixemos a valoración personal.
Fixemos 5 problemas da serie Quinzet. Correximos e compartimos estratexias.
Logo de proxecto e educación física (que foi ensaio do baile de fin de curso co profe Diego), Olivia realizou a súa exposición oral, querendo ser tamén veterinaria. Explicou cada punto do guión acompañando a exposición dunha presentación na pantalla e ao final tivo lugar a valoración.
Escribimos na axenda e realizamos unha ficha de sumas de cálculo mental.
Fixemos unha visita á que será a clase de 3º e preguntámoslle aos nenos e nenas de 4º todas as dúbidas de como será o cambio de ciclo.
Ao rematar, tivemos un pouco de tempo de descanso.
Luns 17 de xuño
Rematamos o libro de "Perro apestoso". O último capítulo sóubonos a pouco...quedamos con ganas de ler máis libros da mesma colección.
Escribimos a data, repartimos os encargos da semana e realizamos as rutinas guiadas por Hugo.
Hugo tamén fixo a súa exposición oral sobre que lle gustaría ser de maior. No seu caso escollería ser garda civil de tráfico. Foi falando de todos os puntos do guión, acompañando as explicacións cunha presentación proxectada na pantalla. Ao rematar fixemos a nosa valoración persoal.
Continuamos coas noticias do fin de semana na zona das follas. Había moitas ganas de contar... e alargamos un pouquiño o tempo para que todos poideran participar.
En matemáticas continuamos repasando as táboas cunha ficha de multiplicacións para logo colorear según os resultados.
Logo de inglés e do recreo, recibimos ao alumnado de 5 anos de Infantil na clase. Fixeron moitas preguntas de como será estar en 1º de Primaria e, por quendas, fomos contestando. Nós tamén quixemos contarlle cousas e darlle consellos e mensaxes de tranquilidade.
Logo fixemos a axenda, rematamos a tarefa de matemáticas e tivemos un tempo de descanso. Máis tarde rematamos a lectura do libro de Ñum Ñum na zona das follas. Gustounos o final!!!
Venres 14 de xuño
O conto que escoitamos hoxe ía sobre como nos pode axudar a serenidade en momentos de nerviosismo. O dito "despacio que hai presa" viña moi a conto na moralexa do mesmo.
Tomás fixo a súa exposición oral. De maior gustaríalle ser perruqueiro. Falou de todos os puntos do guión acompañándose de diapositivas na pantalla. Ao rematar fixemos a valoración persoal.
Fomos á biblioteca a devolver os libros de casa. Xa non podemos levar libros de préstamo ata o vindeiro curso. Logo tivemos uso libre do espazo: algúns decantáronse polos Lego, outros polas pulseiras, lectura, xogos de mesa, etc...
Logo de música e do recreo, escribimos na axenda e fixemos unha ficha para repasar a táboa do 7. Mentras, por equipos, fomos facendo papel reciclado. O luns veremos como quedou (está a secar...).
Xoves 13 de xuño
Enigma científico. Se poñemos a rodar dous ovos, un deles cocido e o outro cru... e parámolos co dedo, podemos saber cal é o cru. Por que? Logo de escoitar hipóteses do máis variado, descubrimos que tiña que ver co movemento e a inercia, que no caso do ovo cru, ao estar a clara e a xema líquida, queda movéndose aínda que se lle pare.
Sofía Varela guiou as rutinas do día, dicindo a data e repasando xunto a ela os días da semana, meses, números para atrás dende o 20, muro do 5, muro do 10, números de 2 en 2, sumas dobles, números de 5 en 5, de 10 en 10, de 10 en 10 partindo do 13 e abecedario.
Logo realizou a súa exposición oral sobre que lle gustaría ser de maior. No seu caso escolleu ser veterinaria. Falounos de todos os puntos do guión acompañando as explicacións de diapositivas na pantalla. Ao rematar mostrounos o seu traxe de veterinaria así como la, pelo da ovella. Tamén quixo mostrarnos un vídeo onde tivo que guiar a un rebaño de ovellas. Ao rematar, fixemos a valoración persoal da exposición.
Fixemos 5 problemas da serie Quinzet. O último foi o máis complicado: "10 amigos déronme 1/4 de mazá cada un, cantas mazás me deron en total?"
Tivemos un tempo de cálculo e numeración para resolver de forma individual: series de diferentes tipos partindo dun número, sumas, restas e sacos de Paco.
Logo de educación física e do recreo, escribimos na axenda e continuamos con diferentes fichas de mates que tiñamos sen rematar. Logo rematamos de ler na pantalla a revista que tiñamos empezada sobre castelos de area.
Na última hora, por quendas fomos pasando por troceado de papel (para poder facer mañá o papel reciclado), decoración de avións de papiroflexia, colocación no panel gris dos diferentes traballos rematados, busca de información con Rosana...
Mércores 12 de xuño
A pregunta científica de hoxe foi: Por que se levan mal os cans e os gatos? Fixemos as nosas hipóteses de forma voluntaria: porque uns rabuñan e outros morden, porque uns son máis independentes e outros necesitan máis contacto... E logo lemos a resposta científica, que según parece, leva pasando dende hai 20 millóns de anos.
Mateo Piñeiro realizou a súa exposición oral sobre o que lle gustaría ser de maior. A el gustaríalle ser fontaneiro. Falou de todos os puntos do guión mentras mostraba diferentes diapositivas na pantalla. Logo mostrou unha cartolina con ferramentas necesarias para un fontaneiro e por último, ensinounos esas ferramentas e utensilios. Ao rematar valoramos a exposición.
Escribimos de forma colectiva un texto sobre como facer papel reciclado.
No circuito matemático tivemos xogos diversos dos que poidemos facer circulación libre: código secreto (cálculo), fruits (numeración), xogos de construción, de lóxica, etc. Mentras, algúns nenos/as remataron o seu colar de bugallos, outros avanzaron nos carteis informativos para o PDI.
Logo de inglés e do recreo, escribimos na axenda algo que aprenderamos. Logo fixemos unha ficha cunha sopa de letras e de comprensión lectora. Mentras, fomos rotando a facer un cartel informativo sobre como facer unha tartaruga de barro (coa profe Rosana), tríptico sobre o acibeche do equipo xoias, colares de bugallos (profe Magoia), decoración de avións de papel, cortar anacos de papel para poder facer o papel reciclado e un cartel de como facer papel de reciclaxe (pasar a limpo o escrito no caderno).
Martes 11 de xuño
Comezamos escoitando a lectura de tres poemas do libro "Día lebre" de Clara López, que trouxo Noa para compartir coa clase. Gustounos especialmente o poema que lle dá título ao libro... desexando a gran maioría ter pronto un "día tartaruga".
Mateo Fernández guiou as rutinas do día, poñendo a data e repasando as secuencias temporais e numéricas. Logo realizou a súa exposición oral. De maior gustaríalle ser profesor de educación física. Falou de todos os puntos do guión acompañando cada apartado dunha diapositiva en pantalla. Ao rematar valoramos a exposición.
Continuamos realizando un plan de discusión sobre os dous capítulos lidos onte no club de lectura. A Sindo xúrdelle un dilema... Ñum Ñum di que foi o seu pai quen o cazou cando era un osezno... Sindo colle forzas e decide preguntarllo... Que farías ti se foras Sindo? Como axudarías a Ñum Ñum se esto fora certo?
Logo de relixión/proxecto, educación física e recreo, escribimos na axenda e realizamos unha lectura comprensiva individual.
Na pantalla, entre todos, investigamos sobre como facer papel reciclado (algo que lle quedou pendiente ao equipo artesáns de papel), buscando e lendo información ao respecto. Comezamos a realizar o primeiro paso, romper papeis en anacos pequenos.
Na última sesión, dous nenos de 6º viñeron axudar co PDI. Neste caso axudaron rematando carteis e infogramas informativos dalgúns dos equipos de artesáns, no ordenador. Algúns nenos/as decoraron avións de papel, outros continuaron co proceso do papel de reciclar, outros fixeron o cartel para o stand de telleiras de Meaño e por último, algúns remataron o seu colar de bugallos.
Luns 10 de xuño
Escoitamos a lectura do capítulo "Perro Apestoso salva a sus amigos" , sabendo que nos vai dar o tempo xusto para rematar o libro o luns que vén (só queda un capítulo).
Lucas guiou as rutinas do encargado, cos días da semana, meses, series de numeración, muros e abecedario. Logo realizou a súa exposición oral. De maior gustaríalle ser motorista de moto GP. Falou de todos os puntos do guión apoiándose dunha presentación na pantalla e ao rematar fixemos a valoración da mesma.
Continuamos coas noticias na zona das follas.
Escribimos a nosa autoavaliación, que será incluída no informe final que vai para as casas. Que foi o máis doado de 2º?. Que penso que debo seguir practicando e por que?. Que actividades foron as máis emocionantes do curso?
Realizamos unha pirámide matemática.
Logo de inglés e do recreo fomos ler a charca e ao barco. Comezamos en gran grupo e rematamos a lectura en parellas ou tríos. Desfrutamos dos capítulos 6 e 7 do libro de Ñum Ñum. Parece que acaba de atopar ao home que o cazara no bosque...
Na última sesión, varios grupos foron gravar á radio un programa sobre o seu proxecto. Outros pintaron bugallos para o seu colar, avanzamos en carteis informativos... Tamén houbo algún momento de descanso.
Xoves 6 de xuño
Enigma científico. Hoxe titulado "O estanque xeado" e ía sobre dous peixes que nadaban debaixo da superficie conxelada dun lago... Onde sobrevivirían mellor? No lago conxelado ou nun acuario colocado nunha terraza? Logo de escoitar varias hipóteses descubrimos que debaixo do xeo a auga non baixa de 3ºC, e fóra, en lugares fríos, a temperatura pode chegar a ser moito máis baixa (polo que non sobrevivirían).
Rutinas da encargada. Olivia axudounos a escribir a data e repasar as series de numeración, temporais e abecedario.
Fixemos 5 problemas da serie Quinzet e compartimos resultados e estratexias de cálculo.
Organizámonos coma onte, con traballos individuais autónomos e mesas de traballo sobre o PDI de artesanía.
No traballo individual fixemos unha ficha onde tiñamos que calcular multiplicacións e colorear en función dos códigos.
Na mesas do PDI fomos rotando e fixemos:
Mesa de bugallos.- Pintamos os bugallos como nos gustou para poder facer logo un collar.
Mesa multiusos.- Rematamos de pintar as figuriñas de barro con témperas, rematamos o laberinto do equipo xoguetes e fixemos algunha xoia cos materiais aportados.
Mesa da profe.- Fomos metendo os bugallos no fío de coiro cunha agulla para rematar os nosos colares.
Nas últimas sesións, o equipo de candeas foi ao atelier a rematar as súas velas, nesta ocasión, grazas a colaboración de dúas nais.
Outros equipos foron co profe Diego a rematar de gravar os anuncios de radio para o PDI.
Mércores 5 de xuño
Pregunta científica: "Por que non se recoñecen moitos animais cando se miran nun espello?" Logo de escoitar diversas hipóteses relacionadas fundamentalmente co cerebro dos animais, lemos a resposta científica que efectivamente tiña relación con este aspecto. Tamén coa importancia do olfacto para a maioría dos animais...
Lucca realizou a súa exposición oral sobre que lle gustaría ser de maior. A el gustaríalle ser piloto profesional de motos. Ao rematar fixemos a nosa valoración personal.
Organizamos a mañá con propostas de traballo individual autónomas e propostas de mesas de traballo, polas que iamos pasando por quendas.
No que respecta ao traballo individual decoramos a nosa portada das fichas do curso e realizamos unha ficha de repaso das táboas de multiplicar.
No que respecta ás mesas de traballo tiñamos:
Unha mesa con témperas, rematando deste xeito a maqueta da casa e pintando figuriñas de barro.
Outra mesa con rotuladores Posca, rematando con eles a decoración das figuriñas de pan tradicionais e comezando a pintar bugallos.
Outra coa elaboración do cartel de instrucións de como facer un tirafondas.
Outra mesa (a da profe) onde rematamos por equipos os anuncios de radio. (Na última sesión fomos gravar algúns á radio co profe Diego).
Martes 4 de xuño
Escoitamos varios poemas onde a protagonista era a letra A, do libro "Palabras brancas". Gustounos moito o do mar.
Ruy encargouse das súas rutinas, dicíndonos a data e repasando os días da semana, meses, números para atrás dende o 20, muro do 5, muro do 10, números de 2 en 2, de 5 en 5, de 10 en 10 e abecedario.
Escoitamos con atención a exposición oral de Ruy, a quen lle gustaría ser taxista. Foi falando dos distintos puntos do guión acompañándose dunha presentación na pantalla. Ao rematar fixemos a nosa valoración personal.
Realizamos 5 problemas da serie Quinzet e compartimos corrección e estratexias de cálculo. O que máis nos custou foi: Cantos pares son 7 pares de zapatos?
Logo de relixión/proxecto e recreo, escoitamos varios anuncios de radio creativos. Entre todos buscamos características comúns destes anuncios. Apuntámolas no encerado e puxémonos en equipo a crear o noso anuncio de radio para anunciar a exposición final do PDI de artesanía.
Na última hora avanzamos pintando as figuriñas de pan tradicionais, con carteis de instrucións, adornos diversos para o PDI e un grupo foi gravar un podcast á radio (co profe Diego).
Luns 3 de xuño
Capítulo 4: Perro apestoso no Museo dos Horrores. Escoitamos a lectura deste capítulo do libro, onde nos segue a preocupar o destino deste can ao que lle estamos collendo cariño...
Rutinas levadas a cabo por Lucca, quen nos dixo a data e axudou a repasar todas as series de numeración, muros, días da semana, meses e abecedario.
Tivemos tempo para as noticias do fin de semana, con festas, cumpreanos, praia...
En mates fixemos numeración de xeito individual, comparando números. Tamén cálculo mental a través dunha pirámide de sumas.
Logo de inglés e do recreo fomos á charca a ler dous capítulos do libro "El oso que leía niños". Hoxe Ñum Ñum leu a Andrea, a Aitor e a moitos nenos máis... Logo de participar tod@s na lectura, fomos a clase a inventar un fragmento do libro onde o oso Ñum Ñum nos lía a nós mesmos...
Escribimos na axenda e tivemos tempo de descanso, alternando con tarefas do PDI: pintar figuriñas de pan, gravar na radio un podcast sobre o proxecto, etc.