Setembro
VENRES 29 DE SETEMBRO
Asemblea para explicar e pedir opinión sobre a nova distrubución dos espazos do patio nos recreos. Nesta proposta o campo pequeno está reservado os martes para 1º e 2º, e o patio de baloncesto os xoves. Os venres tocarán xogos sen balón.
Repaso da cantiga de peto deste mes.
Plan de traballo (adxuntado en foto). Había 5 retos que conseguir, a maioría deles en parella: un reto de escritura, outro de lectura, outro de mates, outro dunha manualidade e outro de xogo. Non eran moitos, pero si eran bastante traballosos, polo que non deu tempo de rematalos todos. O luns, despois do recreo, utilizaremos a sesión para acabar. En principio intentaremos traballar deste xeito cada venres (iremos alternando biblioteca e atelier). De momento está custando manter a calma e o orden cunha proposta tan aberta, tamén está sendo complicado que haxa un compromiso e responsabilidade por parte de todos. É importante que pouco a pouco vaiamos asentando esta dinámica, que fomenta a planificación, a autonomía e a responsabilidade. Seguiremos dando pasos durante este curso para conseguilo.
Antes de regresar para casa fomos á charca a cantar a cantiga de peto deste mes.
XOVES 28 DE SETEMBRO
Os xoves tocan adiviñas! Hoxe foron sobre prendas de roupa. Fomos acertando todas con bastante facilidade.
Continuamos coas rutinas da encargada, que hoxe foi Sofía Varela. Díxonos a data e xunto a ela fomos repasando a cantiga dos días da semana, meses, números para atrás dende o 20, de 2 en 2 ata o 20, sumas dobles, muro do 5, muro do 10 (parellas de números que suman 10), números de 10 en 10 ata o 100, de 100 en 100 ata o 1000 e abecedario.A
Logo dunha explicación e práctica colectiva de cálculo e resolución de problemas, realizamos de xeito individual unha ficha de cálculo mental variada. Nela practicamos restas de deces (tipo 80-20), sumas de deces (30 + 30...), sumas dun número alto máis un pequeno (tipo 56 + 3) e de suma de decenas completas partindo dun número (tipo 35 + 10). Para resolver este cálculo nalgúns casos axudáronse da táboa do cen, noutros dos dedos, noutros casos foi mental sen ningún apoio (é bo que cada quen busque as estratexias e materiais que mellor lle resulten en función do momento de resolución de cálculo no que está).
Tamén resolvemos individualmente catro problemas escribindo os datos, operación e resultado dos mesmos. As operacións que necesitabamos realizar para resolver estes problemas eran moi similares ás practicadas na ficha de cálculo mental.
O traballo de matemáticas realizámolo en "modo detective" (falando moi baixiño), o que permitiu que estiveramos moi concentrad@s no traballo e que nos sobrara un pouquiño de tempo para manualidades, lectura, xogos...
Logo de educación física e do recreo tivemos tempo para lectura en parella e rematamos unha das preguntas que nos quedara pendiente onte na sesión de filosofía. Gústache escoitar e participar nas conversacións dos maiores?
Tamén nos deu tempo para comezar unha proposta de expresión escrita, tendo que deseñar o noso propio xardín. Mañá remataremos no plan de traballo.
Na última hora tivemos a última sesión de contextos da semana, tendo unha presentación por parte do/a profe que nos faltaba do que imos realizar con el/ela nas vindeiras semanas. Tamén realizamos actividades grupais para coñecer mellor ao equipo de contextos (10 nenas/os en total, mesturados con 1º) .
MÉRCORES 27 DE SETEMBRO
Os mércores comezamos a mañá cunha pregunta científica. Hoxe tocou... Por que temos unllas? Logo de escoitar varias hipóteses, lemos o contido exposto no libro de Ciencia. Aprendemos varias curiosidades, como que as unllas están feitas de queratina, a mesma proteína da que está feita o pelo ou a pel, que case todos os mamíferos teñen garras menos os humanos, que o home que gañou o récord de unllas máis longas do mundo ten unhas unllas de 10 metros...
Continuamos realizando escrita colectiva. Tiñamos que ampliar frases xa comezadas. Inventamos entre todos e escribimos a frase acordada, contando as palabras para axudarnos a separar á hora de escribir.
Fixemos unha lectura individual de "detectives". Tiñamos que ler a pista dada e acertar de que debuxo se trataba en cada caso.
Os mércores tamén é día de "Circuito matemático". Organizamos 4 estacións para poder ir rotando nelas:
Estación 1: Xeometría. Trazamos na pizarra individual, as liñas propostas (horizontais, verticais, duns cm. concretos).
Estación 2: Numeración. Tiramos os dados (centos, deces e uns) e montamos con regletas, tarxetas Montessori e perlas Montessori.
Estación 3: Lóxica. Con dous atributos negativos, colocamos os bloques lóxicos por quendas, no lugar correspondente.
Estación 4: Percepción/atención viso-espacial. Observamos con atención o reto escollido e facémolo o mellor posible. Os retos propostos son do estilo: copia a figura o máis exacta posible, busca diferenzas, busca os que son iguais, etc.
Logo de inglés e do recreo, fixemos unha sesión de filosofía na charca. Lemos o capítulo "El pequeño Rafa" do libro de filosofía para nen@s "Pepe y Felisa". O plan de discusión xirou en torno "as visitas". Tés visitas en casa? Gústanche? Por que? Gústache estar nas conversas dos maiores? Por que?
No último tramo da mañá acudimos ao noso contexto. Esta semana rotamos nos tres contextos propostos con temática do corpo humano. Temos este primeiro contacto, e para a semana xa estaremos nun contexto só durante 8 días.
Estación 1: Xeometría.
Estación 2: Numeración
Estación 3: Lóxica.
Estación 4: Percepción/atención viso-espacial.
Filosofía na charca
Contextos
MARTES 26 DE SETEMBRO
Escoitamos con atención a lectura da profe de varios poemas de Antonio García Teijeiro do libro "Paseniño, paseniño".
As rutinas foron levadas a cabo por Noa, quen nos dixo a data e axodou a repasar os días da semana, meses, números para atrás dende o 20, muro do 5, muro do 10, números de 2 en 2 ata o 20, sumas dobles, de 10 en 10 ata o 100, de 100 en 100 ata o 1000, abecedario.
Ilustramos unha poesía de Gloria Fuertes co obxectivo de mellorar a comprensión oral. A profe leu a poesía tres veces e debuxamos un indio cos detalles que iamos escoitando.
Continuamos con 5 problemas da serie quinzet. Problemas variados para resolver mentalmente. Escribimos o resultado e corriximos.
Logo de relixión/proxecto, educación física e do recreo, tivemos un tempo para a lectura individual e comezamos unha actividade de escrita creativa (que remataremos mañá).
Tivemos o noso primeiro día de contextos educativos de aprendizaxe! Esta semana rotaremos un día con cada profe encargado do 1º ciclo (Laura, Diego e Magoia) e para a semana xa quedaremos máis tempo cun dos profes.
LUNS 25 DE SETEMBRO
Comezamos a semana coa lectura por capítulos do libro "Pupi e as pantasmas". Pupi quedou a durmir na casa de Nachete e xogan xuntos no cuarto, facendo bastante ruido... Aparece a nai de Nachete enfadada e bótanlle culpa ás pantasmas....
As rutinas da encargada foron levadas a cabo por Sofía Iglesias, quen nos dixo a data, calculamos a diferenza de temperatura do interior da clase con respecto á do exterior, números para atrás dende o 20, de 2 en 2 ata o 20, sumas dobles, muro do 5, muro do 10, números de 10 en 10 ata o 100, de 100 en 100 ata o 1000 e abecedario.
Fixemos o reparto semanal de encargos da clase.
Comezamos unha nova rutina dos luns, na que iremos presentando as diferentes necesidades básicas, que algunhas veces ao non estar cubertas xeneran malestar, tristeza, frustración... e outras emocións que fomos presentando durante o curso pasado. A necesidade que traballamos hoxe foi a de confianza. Falamos sobre a necesidade que temos de que as persoas máis queridas confíen en nós e compartimos algún momento onde a súa confianza e apoio nos axudou moito para poder saír adiante nalgunha situación que se nos deu (nunha competición deportiva, nunha interpretación musical, nunha exposición oral...).
Tivemos tamén tempo para compartir as noticias do fin de semana.
En matemáticas traballamos a numeración, con cálculo mental diverso (+2, +3, +10, + 20, -10, - 20... partindo de calquera número) e números anteriores e posteriores. Fixémolo de xeito individual.
Logo dun recreo un pouco máis longo, fixemos unha lectura comprensiva de instrucións e practicamos a escritura do abecedario con letras minúsculas, esforzándonos na presentación e boa letra.
No último tramo da mañá poidemos rematar tarefas de manualidades comezadas, onde o uso do papel charol é o protagonista.