Sapatos Nang Tata

SAPATOS NANG TATA

neng Almario "amor" C. de Jesus

Nung ackit na la mung Tata, detang sapatos mu ngeni,

E la mu adwang dosena, macapila keng estanti,

At nung abalu na caya, nung magcanu'ng presyu da,

Ing pupul na keng pabanwa, e macagyung panyali na.

Ketang kecang cayanacan, ginale ca keng escwela,

Detang sapatos nang Tata, ila rugung peparam na,

Anya agyang Poeta ca, pasalamat ca cang Tata,

Mibabata na cang tiru, maging macudta ca sana.

Masaya ya ing Tatang mu, ketang maluca nang bili,

Meracal na ca sapatos, tengalan da ca pang Ari,

Ing sapatos a pepasulud, e me sana cacalingwan,

Iti bacas ne ning Tata, king anac nang pacamalan.

Anya salamat o Tata, dacal cu abalu keca,

Cawatasan a tiru mu, tinubu at memunga la.